3. ඔවාදවග්ග, 3-4. භික්ඛුනුපස්සය, ආමිස සික්ඛාපුච්ඡා

පුච්ඡා – භික්ඛුනුපස්සයං ආවුසො උපසඞ්කමිත්වා භික්ඛුනියො ඔවදන්තස්සච ආමිසහෙතු ථෙරා භික්ඛූ භික්ඛුනියො ඔවදන්තීති භණන්තස්සච පාචිත්තියං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – භික්ඛුනුපස්සයං උපසඞ්කමිත්වා භික්ඛුනියො ඔවදන්තස්ස පාචිත්තියං භන්තෙ සක්කෙසු ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ භික්ඛුනුපස්සයං උපසඞ්කමිත්වා භික්ඛුනියො ඔවදිංසු, ආමිසහෙතු ථෙරා භික්ඛූ භික්ඛුනියො ඔවදන්තීති භණන්තස්ස පාචිත්තියං සාවත්ථියං ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ආමිසහෙතු ථෙරා භික්ඛූ භික්ඛුනියො ඔවදන්තීති භණිංසු, තස්මිං භන්තෙ වත්ථුස්මිං පඤ්ඤත්තං.