2. භූතගාමවග්ග, 5. දුතිය සෙනාසන සික්ඛාපුච්ඡා
පුච්ඡා – සඞ්ඝිකෙ ආවුසො විහාරෙ සෙය්‍යං සන්ථරිත්වා අනුද්ධරිත්වා අනාපුච්ඡා පක්කමන්තස්ස පාචිත්තියං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.
විස්සජ්ජනා – සාවත්ථියං භන්තෙ සත්තරසවග්ගියෙ භික්ඛූ ආරබ්භ පඤ්ඤත්තං, සත්තරසවග්ගියා භන්තෙ භික්ඛූ සඞ්ඝිකෙ විහාරෙ සෙය්‍යං සන්ථරිත්වා අනුද්ධරිත්වා අනාපුච්ඡා පක්කමිංසු, තස්මිං භන්තෙ වත්ථුස්මිං පඤ්ඤත්තං.
පුච්ඡා – කස්ස ආවුසො වචනං.
විස්සජ්ජනා – භගවතා භන්තෙ වචනං අරහතො සම්මාසම්බුද්ධස්ස.
පුච්ඡා – කෙනාවුසො ආභතං.
විස්සජ්ජනා – පරම්පරාය භන්තෙ ආභතං.
පුච්ඡා – අත්ථි නුඛො ආවුසො එත්ථ කොචිපි විරද්ධදොසො.
විස්සජ්ජනා – නත්ථි භන්තෙ.
සඞ්ඝස්ස ඤාපනං
සුණාතු මෙ භන්තෙ සඞ්ඝො, අහං භන්තෙ ආයස්මන්තං විචිත්තසාරාභිවංසං ඉමෙසං පන්නරසන්නං සික්ඛාපදානං නිදානාදීනි පුච්ඡිතබ්බානි අනෙකානි ඨානානි පුච්ඡිං, සො ච පුට්ඨො පුට්ඨො විස්සජ්ජෙති, ඉති හිදං භන්තෙ නිම්මලං සුපරිසුද්ධං තස්සෙව භගවතො වචනං අරහතො සම්මාසම්බුද්ධස්ස, තස්මා යථාපුරෙ මහාකස්සපාදයො මහාථෙරවරා පොරාණසංගීතිකාරා බ්‍රහ්මචරියස්ස චිරට්ඨිතියා බහුජනහිතාය බහුජනසුඛාය ලොනුකම්පාය අත්ථාය හිතාය සුඛාය දෙවමනුස්සානං ධම්මවිනයං සංගායිංසුචෙව අනුසංගායිංසුච, එවමෙව මයම්පි දානි ඡට්ඨසංගීතිමහාධම්මසභා පරියාපන්නා යථානුප්පට්ඨානතො පට්ඨාය ඉමානි සික්ඛාපදානි එකතො ගණසජ්ඣායං කත්වා සංගායෙය්‍යාම.