12. දුබ්බච, සඞ්ඝාදිසෙස සික්ඛාපුච්ඡා

පුච්ඡා – යං තෙන ආවුසො භගවතා…පෙ… සම්මාසම්බුද්ධෙන දුබ්බචස්ස භික්ඛුනො යාවතතියං සමනුභාසනාය අප්පටිනිස්සජ්ජන්තස්ස සඞ්ඝාදිසෙසො කත්ථ පඤ්ඤත්තො.

විස්සජ්ජනා – කොසම්බියං භන්තෙ පඤ්ඤත්තො.

පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තො.

විස්සජ්ජනා – ආයස්මන්තං භන්තෙ ඡන්නං ආරබ්භ පඤ්ඤත්තො, ආයස්මා භන්තෙ ඡන්නො භික්ඛූහි සහධම්මිකං වුච්චමානො අත්තානං අවචනීයං අකාසි, තස්මිං භන්තෙ වත්ථුස්මිං පඤ්ඤත්තො.