4. සමථක්ඛන්ධක

පුච්ඡා – අසම්මුඛීභූතානං ආවුසො භික්ඛූනං තජ්ජනීයං වා නියස්සං වා පබ්බාජනීයං වා පටිසාරණීයං වා උක්ඛෙපනීයං වා කම්මං කරොන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ අසම්මුඛීභූතානං භික්ඛූනං කම්මං අකංසු තජ්ජනීයම්පි නියස්සම්පි පබ්බාජනීයම්පි පටිසාරණීයම්පි උක්ඛෙපනීයම්පි, තස්මිං භන්තෙ වත්ථුස්මිං පඤ්ඤත්තං.

පුච්ඡා – සතිවෙපුල්ලපත්තස්ස ආවුසො භික්ඛුනො සතිවිනයං දානං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ මෙත්තියභූමජකෙ භික්ඛූ ආරබ්භ අනුඤ්ඤාතං මෙත්තියභූමජකා භන්තෙ භික්ඛූ ආයස්මන්තං දබ්බං මල්ලපුත්තං අමූලිකාය සීලවිපත්තියා අනුද්ධංසෙසුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කතිපනාවුසො එත්ථ ධම්මිකානි සතිවිනයදානානි.

විස්සජ්ජනා – පඤ්චිමානි භන්තෙ ධම්මිකානි සතිවිනයස්ස දානානි, සුද්ධො හොති භික්ඛු අනාපත්තිකො, අනුවදන්ති ච නං, යාචති ච, තස්ස සඞ්ඝො සතිවිනයං දෙති ධම්මෙන සමග්ගෙන, ඉමානි ඛො භන්තෙ පඤ්ච ධම්මිකානි සති විනයස්ස දානානි.

පුච්ඡා – අමූළ්හස්ස ආවුසො භික්ඛුනො අමූළ්හවිනයං දාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ ගග්ගං භික්ඛුං උම්මත්තකෙන චිත්තවිපරියාසකතෙන අජ්ඣාචිණ්ණෙන ආපත්තියා චොදෙසුං ‘‘සරතා යස්මා එවරූපිං ආපත්තිං ආපජ්ජිතා’’ති, සො එවං වදෙති ‘‘අහං ඛො ආවුසො උම්මත්තකො අහොසි චිත්තවිපරියාසකතො, තෙන මෙ උම්මත්තකෙන චිත්තවිපරියාසකතෙන බහුං අස්සාමණකං අජ්ඣාචිණ්ණං භාසිතපරික්කන්තං, නාහං තං සරාමි, මූළ්හෙන මෙ එතං කත’’න්ති. එවම්පි නං වුච්චමානා චොදෙන්තෙව ‘‘සරතා යස්මා එවරූපිං ආපත්තිං ආපජ්ජිතා’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කති ආවුසො අධම්මිකානි අමූළ්හවිනයස්ස දානානි, විභජිත්වා කථෙහි.

විස්සජ්ජනා – තීණි භන්තෙ අධම්මිකානි අමූළ්හවිනයස්ස දානානි, ඉධ භන්තෙ භික්ඛු ආපත්තිං ආපන්නො හොති, තමෙනං චොදෙති සඞ්ඝො වා සම්බහුලා වා එකපුග්ගලො වා ‘‘සරතායස්මා එවරූපිං ආපත්තිං ආපජ්ජිතා’’ති, සො සරමානොව එවං වදෙති ‘‘න ඛො අහං ආවුසො සරාමි එවරූපිං ආපත්තිං ආපජ්ජිතා’’ති. අඤ්ඤො සරමානොව එවං වදෙති ‘‘සරාමි ඛො අහං ආවුසො යථා සුපිනන්තෙනා’’ති. අඤ්ඤො අනුම්මත්තකොව උම්මත්තකාලයං කරොති ‘‘අහම්පි ඛො එවං කරොමි, තුම්හෙපි එවං කරොථ, මය්හම්පි එතං කප්පති, තුම්හාකම්පෙතං කප්පතී’’ති. එසං සඞ්ඝො අමූළ්හවිනයං දෙති, අධම්මිකං භන්තෙ අමූළ්හවිනයස්ස දානං. ඉමානි ඛො භන්තෙ තීණි අධම්මිකානි අමූළ්හවිනයස්ස දානානි.

පුච්ඡා – කති ආවුසො ධම්මිකානි අමූළ්හවිනයස්ස දානානි, විභජිත්වා කථෙහි.

විස්සජ්ජනා – තීණි භන්තෙ ධම්මිකානි අමූළ්හවිනයස්ස දානානි, ඉධ භන්තෙ භික්ඛු උම්මත්තකො හොති චිත්තවිපරියාසකතො තෙන උම්මත්තකෙන චිත්තවිපරියාසකතෙන බහුං අස්සාමණකං අජ්ඣාචිණ්ණං හොති භාසිතපරික්කන්තං, තමෙනං චොදෙති සඞ්ඝො වා සම්බහුලා වා එකපුග්ගලො වා ‘‘සරතායස්මා එවරූපිං ආපත්තිං ආපජ්ජිතා’’ති, සො අස්සරමානොව එවං වදෙති ‘‘න ඛො අහං ආවුසො සරාමි එවරූපිං ආපත්තිං ආපජ්ජිතා’’ති. අඤ්ඤොපි අස්සරමානොව එවං වදෙති ‘‘සරාමි ඛො අහං ආවුසො යථා සුපිනන්තෙනා’’ති. අඤ්ඤොපි උම්මත්තකොව උම්මත්තකාලයං කරොති ‘‘අහම්පි එවං කරොමි, තුම්හෙපි එවං කරොථ, මය්හම්පි එතං කප්පති, තුම්හාකම්පෙතං කප්පතී’’ති. එසං භන්තෙ තිණ්ණං භික්ඛූනං සඞ්ඝො අමූළ්හවිනයං දෙති, ධම්මිකං භන්තෙ අමූළ්හවිනයස්ස දානං. ඉමානි ඛො භන්තෙ තීණි ධම්මිකානි අමූළ්හවිනයස්ස දානානි.

පුච්ඡා – අප්පටිඤ්ඤාය ආවුසො භික්ඛූනං තජ්ජනීයාදීනි කම්මානි කරොන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ අප්පටිඤ්ඤාය භික්ඛූනං කම්මානි අකංසු තජ්ජනීයාදීනි, තස්මිං භන්තෙ වත්ථුස්මිං පඤ්ඤත්තං.

පුච්ඡා – කථං ආවුසො අධම්මිකං හොති පටිඤ්ඤාතකරණං.

විස්සජ්ජනා – අඤ්ඤථා භන්තෙ ආපත්තිං ආපජ්ජන්තස්ස අඤ්ඤථා පටිජානන්තස්ස යථා සො පටිජානාති, තථා සඞ්ඝො කාරෙති, එවං ඛො භන්තෙ අධම්මිකං හොති පටිඤ්ඤාතකරණං.

පුච්ඡා – කථං ආවුසො ධම්මිකං හොති පටිඤ්ඤාතකරණං.

විස්සජ්ජනා – යං භන්තෙ ආපත්තිං ආපජ්ජන්තස්ස තමෙව පටිජානන්තස්ස තෙනෙව සඞ්ඝො කාරෙති, එවං ඛො භන්තෙ ධම්මිකං පටිඤ්ඤාතකරණං.

පුච්ඡා – යෙභුය්‍යසිකාය ආවුසො අධිකරණං වූපසමෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ භණ්ඩනජාතා කලහජාතා විවාදාපන්නා අඤ්ඤමඤ්ඤං මුඛසත්තීහි විතුදන්තා විහරිංසු, න සක්කොන්ති තං අධිකරණං වූපසමෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කථං ආවුසො අධිකරණං යෙභුය්‍යසිකාය වූපසමෙතබ්බං.

විස්සජ්ජනා – පඤ්චහි භන්තෙ අඞ්ගෙහි සමන්නාගතො භික්ඛු සලාකග්ගාහාපකො සම්මන්නිතබ්බො, තෙන භන්තෙ සලාකග්ගාහාපකෙන සලාකා ගාහාතබ්බා යථා බහුතරා භික්ඛූ ධම්මවාදිනො වදන්ති තථා තං අධිකරණං වූපසමෙතබ්බං, එවං ඛො භන්තෙ යෙභුය්‍යසිකාය අධිකරණං වූපසමෙතබ්බං.

පුච්ඡා – කති ආවුසො අධම්මිකා සලාකග්ගාහා.

විස්සජ්ජනා – දස භන්තෙ අධම්මිකා සලාකග්ගාහා, ඔරමත්තකඤ්ච අධිකරණං හොති, න ච ගතිගතං හොති, න ච සරිතසාරිතං හොති, ජානාති ‘අධම්මවාදී බහුතරා’ති, අප්පෙව නාම අධම්මවාදී බහුතරා අස්සූති, ජානාති ‘සඞ්ඝො භිජ්ජිස්සතී’ති, අප්පෙව නාම සඞ්ඝො භිජ්ජෙය්‍යාති, අධම්මෙන ගණ්හන්ති, වග්ගා ගණ්හන්ති, න ච යථාදිට්ඨියා ගණ්හන්ති, ඉමෙ ඛො භන්තෙ දස අධම්මිකා කලාකග්ගාහා.

පුච්ඡා – කති ආවුසො ධම්මිකා සලාකග්ගාහා.

විස්සජ්ජනා – දස භන්තෙ ධම්මිකා සලාකග්ගාහා වුත්තවිපරියායෙන.

පුච්ඡා – පාපුස්සන්නස්ස ආවුසො භික්ඛුස්ස තස්ස පාපියසිකා කම්මං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ උපවාළං භික්ඛුං ආරබ්භ පඤ්ඤත්තං, උපවාළො භන්තෙ භික්ඛු සඞ්ඝමජ්ඣෙ ආපත්තියා අනුයුඤ්ජියමානො අවජානිත්වා පටිජානාති, පටිජානිත්වා අවජානාති, අඤ්ඤෙනඤ්ඤං පටිචරති, සම්පජානමුසා භාසති, තස්මිං භන්තෙ වත්ථුස්මිං පඤ්ඤත්තං.

පුච්ඡා – කති ආවුසො ධම්මිකානි තස්සපාපියසිකා කම්මස්ස කරණානි.

විස්සජ්ජනා – පඤ්චිමානි භන්තෙ ධම්මිකානි තස්සපාපියසිකා කම්මස්ස කරණානි. අසුචි ච හොති, අලජ්ජී ච, සානුවාදො ච, තස්ස සඞ්ඝො තස්සපාපියසිකා කම්මං කරොති ධම්මෙන සමග්ගෙන, ඉමානි ඛො භන්තෙ පඤ්ච ධම්මිකානි තස්ස පාපියසිකා කම්මස්ස කරණානි.

පුච්ඡා – තස්ස පාපියසිකාකම්මකතෙන ආවුසො භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – තස්ස පාපියසිකාකම්මකතෙන භන්තෙ භික්ඛුනා අට්ඨාරසසු වත්තෙසු සම්මා වත්තිතබ්බං. න උපසම්පාදෙතබ්බං, න නිස්සයො දාතබ්බො, න සාමණෙරො උපට්ඨාපෙතබ්බො, එවමාදීසු භන්තෙ අට්ඨාරසසු වත්තෙසු සම්මා වත්තිතබ්බං.

පුච්ඡා – කති ආවුසො අධිකරණානි සමථෙහි වූපසමෙතබ්බානි.

විස්සජ්ජනා – චත්තාරිමානි භන්තෙ අධිකරණානි සමථෙහි වූපසමෙතබ්බානි, විවාදාධිකරණං අනුවාදාධිකරණං ආපත්තාධිකරණං කිච්චාධිකරණං, ඉමානි භන්තෙ චත්තාරි අධිකරණානි සමථෙහි වූපසමෙතබ්බානි.

පුච්ඡා – කිං ආවුසො විවාදාධිකරණස්ස මූලං.

විස්සජ්ජනා – ඡ භන්තෙ විවාදමූලානි විවාදාධිකරණස්ස මූලං, තීණිපි අකුසලමූලානි විවාදාධිකරණස්ස මූලං, තීණිපි කුසලමූලානි විවාදාධිකරණස්ස මූලං, ඉදං භන්තෙ විවාදාධිකරණස්ස මූලං.

පුච්ඡා – කිං පනාවුසො අනුවාදාධිකරණස්ස මූලං.

විස්සජ්ජනා – ඡ භන්තෙ අනුවාදමූලානි අනුවාදාධිකරණස්ස මූලං, තීණිපි අකුසලමූලානි අනුවාදාධිකරණස්ස මූලං, තීණිපි කුසලමූලානි අනුවාදාධිකරණස්ස මූලං, කායොපි අනුවාදාධිකරණස්ස මූලං, වාචාපි අනුවාදාධිකරණස්ස මූලං, ඉදං ඛො භන්තෙ අනුවාදාධිකරණස්ස මූලං.

පුච්ඡා – කිං පනාවුසො ආපත්තාධිකරණස්ස මූලං.

විස්සජ්ජනා – ඡ භන්තෙ ආපත්තිසමුට්ඨානා ආපත්තාධිකරණස්ස මූලං, අත්ති භන්තෙ ආපත්ති කායතො සමුට්ඨාති න වාචතො න චිත්තතො, අත්ථි භන්තෙ ආපත්ති වාචතො සමුට්ඨාති න කායතො න චිත්තතො, අත්ථි භන්තෙ ආපත්ති කායතො ච වාචතො ච සමුට්ඨාති න චිත්තතො, අත්ථි භන්තෙ ආපත්ති කායතො ච චිත්තතො ච සමුට්ඨාති න වාචතො, අත්ථි භන්තෙ ආපත්ති වාචතො ච චිත්තතො ච සමුට්ඨාති න කායතො, අත්ථි භන්තෙ ආපත්ති කායතො ච වාචතො ච චිත්තතො ච සමුට්ඨාති, ඉමානි භන්තෙ ඡ ආපත්ති සමුට්ඨානානි ආපත්තාධිකරණස්ස මූලං.

පුච්ඡා – කිං පනාවුසො කිච්චාධිකරණස්ස මූලං.

විස්සජ්ජනා – කිච්චාධිකරණස්ස භන්තෙ එකං මූලං සඞ්ඝො.

පුච්ඡා – සමථං ආවුසො පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සමථං භන්තෙ විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ ද්වෙ ආපත්තියො.