10. භික්ඛුනික්ඛන්ධක

පුච්ඡා – අට්ඨහි ආවුසො ගරුධම්මෙහි උපසම්පදා භගවතා කත්ථ අනුඤ්ඤාතා, කස්ස අනුඤ්ඤාතා, කිස්මිඤ්ච වත්ථුස්මිං අනුඤ්ඤාතා.

විස්සජ්ජනා – වෙසාලියං භන්තෙ මහාපජාපතියා ගොතමියා අනුඤ්ඤාතා, මහාපජාපති භන්තෙ ගොතමී සූනෙහි පාදෙහි රජොකිණ්ණෙන ගත්තෙන දුක්ඛී දුම්මනා අස්සුමුඛී රුදමානා බහිද්වාරකොට්ඨකෙ අට්ඨාසි, අථ ඛො භන්තෙ ආයස්මා ආනන්දො මහාපජාපතිං ගොතමිං තං කාරණං පුච්ඡිත්වා භගවන්තං චතුක්ඛත්තුං යාචි මාතුගාමස්ස තථාගතප්පවෙදිතෙ ධම්මවිනයෙ ආගාරස්මා අනාගාරියං පබ්බජ්ජං, තස්මිං භන්තෙ වත්ථුස්මිං අනුඤ්ඤාතා.

පුච්ඡා – භික්ඛූහි ආවුසො භික්ඛුනියො උපසම්පාදෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – වෙසාලියං භන්තෙ මහාපජාපතිං ගොතමිං ආරබ්භ අනුඤ්ඤාතං, මහාපජාපති භන්තෙ ගොතමී භගවන්තං එතදවොච ‘‘කථාහං භන්තෙ ඉමාසු සාකියානීසු පටිපජ්ජාමී’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – එකතො උපසම්පන්නාය ආවුසො භික්ඛුනිසඞ්ඝෙ විසුද්ධාය භික්ඛුසඞ්ඝෙ උපසම්පාදෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ භික්ඛුනීනං අන්තරායිකෙ ධම්මෙ පුච්ඡිංසු, උපසම්පදාපෙක්ඛායො විත්ථායිංසු, මඞ්කූ අහෙසුං, න සක්ඛිංසු විස්සජ්ජෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – භික්ඛුනික්ඛන්ධකං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – භික්ඛුනික්ඛන්ධකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ ද්වෙ ආපත්තියො.