1. කම්බක්ඛන්ධක

පුච්ඡා – භණ්ඩනාදිකාරකස්ස ආවුසො භික්ඛුනො තජ්ජනීයකම්මං කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ පණ්ඩුකලොහිතකෙ භික්ඛූ ආරබ්භ අනුඤ්ඤාතං, පණ්ඩුකලොහිතකා භන්තෙ භික්ඛූ අත්තනා භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා, යෙපි චඤ්ඤෙ භික්ඛූ භණ්ඩනකාරකා කලහකාරකා විවාදකාරකා භස්සකාරකා සඞ්ඝෙ අධිකරණකාරකා තෙ උපසඞ්කමිත්වා එවමාහංසු ‘‘මා ඛො තුම්හෙ ආයස්මන්තො එසො අජෙසි, බලවාබලවං පටිමන්තෙථ, තුම්හෙ තෙන පණ්ඩිතතරා ච බ්‍යත්තතරා ච බහුස්සුතතරා ච අලමත්තතරා ච, මා චස්ස භායිත්ථ, මයම්පි තුම්හාකං පක්ඛා භවිස්සාමා’’ති, තෙන අනුප්පන්නානි චෙව භණ්ඩනානි උප්පජ්ජන්ති, උප්පන්නානි ච භණ්ඩනානි භිය්‍යොභාවාය වෙපුල්ලාය සංවත්තන්ති. තස්මිං භන්තෙ වත්ථුස්මිං අනුඤ්ඤාතං.

පුච්ඡා – තජ්ජනීයකම්මකතස්ස ආවුසො භික්ඛුනො කතිසු වත්තෙසු සම්මා වත්තන්තස්ස තං කම්මං පටිප්පස්සම්භෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – අට්ඨාරසසු භන්තෙ වත්තෙසු සම්මා වත්තන්තස්ස තජ්ජනීයකම්මකතස්ස භික්ඛුනො තං කම්මං පටිප්පස්සම්භෙතුං භගවතා සාවත්ථියං අනුඤ්ඤාතං, තෙයෙව පණ්ඩුකලොහිතකා භික්ඛූ සඞ්ඝෙන තජ්ජනීයකම්මකතා සම්මා වත්තිත්වා සඞ්ඝං උපසඞ්කමිත්වා යාචිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – බාලස්ස ආවුසො අබ්‍යත්තස්ස ආපත්තිබහුලස්ස අනපදානස්ස ගිහිසංසට්ඨස්ස අනනුලොමිකෙහි ගිහිසංසග්ගෙහි නියස්සකම්මං කාතුං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ආයස්මන්තං සෙය්‍යසකං ආරබ්භ පඤ්ඤත්තං, ආයස්මා භන්තෙ සෙය්‍යසකො බාලො අහොසි අබ්‍යත්තො ආපත්තිබහුලො අනපදානො ගිහිසංසට්ඨො විහාසි අනනුලොමිකෙහි ගිහිසංසග්ගෙහි, තස්මිං භන්තෙ වත්ථුස්මිං පඤ්ඤත්තං.

පුච්ඡා – නියස්සකම්මකතස්ස ආවුසො භික්ඛුනො කතිසු වත්තෙසු සම්මා වත්තන්තස්ස තං කම්මං පටිප්පස්සම්භෙතුං භගවතා අනුඤ්ඤාතං.

විස්සජ්ජනා – අට්ඨාරසසු භන්තෙ වත්තෙසු සම්මා වත්තන්තස්ස නියස්ස කම්මකතස්ස භික්ඛුනො තං කම්මං පටිප්පස්සම්භෙතුං භගවතා අනුඤ්ඤාතං, න උපසම්පාදෙතබ්බං, න නිස්සයො දාතබ්බො, න සාමණෙරො උපට්ඨාපෙතබ්බො, න භික්ඛුනොවාදකසම්මුති සාදිතබ්බා, සම්මතෙනපි භික්ඛුනියො න ඔවදිතබ්බා, එවමාදීසු භන්තෙ අට්ඨාරසසු වත්තෙසු සම්මා වත්තන්තස්ස නියස්සකම්මකතස්ස භික්ඛුනො තං කම්මං පටිප්පස්සම්භෙතුං භගවතා අනුඤ්ඤාතං.

පුච්ඡා – කුලදූසකස්ස ආවුසො පාපසමාචාරස්ස භික්ඛුනො පබ්බාජනීයකම්මං කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ අස්සජිපුනබ්බසුකෙ භික්ඛූ ආරබ්භ අනුඤ්ඤාතං, අස්සජිපුනබ්බසුකා භන්තෙ භික්ඛූ කීටාගිරිස්මිං කුලදූසකා අහෙසුං පාපසමාචාරා, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පටිසාරණීයකම්මං ආවුසො පුච්ඡාමි, සද්ධං ආවුසො පසන්නං ගහපතිං දායකං කාරකං සඞ්ඝුපට්ඨාකං හීනෙන ඛුංසෙන්තස්ස භික්ඛුනො පටිසාරණීයකම්මං කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ ආයස්මන්තං සුධම්මං ආරබ්භ අනුඤ්ඤාතං, භගවති භන්තෙ සාවත්ථියං විහරති ආයස්මා සුධම්මො මච්ඡිකාසණ්ඩෙ චිත්තං ගහපතිං සද්ධං පසන්නං දායකං කාරකං සඞ්ඝුපට්ඨාකං හීනෙන ඛුංසෙසි හීනෙන වම්භෙසි, තස්මිං භන්තෙ වත්ථුස්මිං අනුඤ්ඤාතං.

තෙනහි භික්ඛවෙ සඞ්ඝො සුධම්මස්ස භික්ඛුනො පටිසාරණීයකම්මං කරොතු ‘‘චිත්තො තෙ ගහපති ඛමාපෙතබ්බො’’ති –

පුච්ඡා – පටිසාරණීයකම්මකතස්ස ආවුසො භික්ඛුනො අනුදූතං දාතුඤ්ච තෙන අනුදූතෙන සද්ධිං ගන්ත්වා යථාඛුංසිතං ගහපතිං ඛමාපෙතුං ච භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ ආයස්මන්තංයෙව සුධම්මං ආරබ්භ අනුඤ්ඤාතං, ආයස්මා භන්තෙ සුධම්මො මච්ඡිකාසණ්ඩං ගන්ත්වා මඞ්කුභූතො නාසක්ඛි චිත්තං ගහපතිං ඛමාපෙතුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පටිසාරණීයකම්මකතස්ස ආවුසො භික්ඛුනො කතිසු වත්තෙසු සම්මා වත්තන්තස්ස තං කම්මං පටිප්පස්සම්භෙතුං භගවතා අනුඤ්ඤාතං.

විස්සජ්ජනා – අට්ඨාරසසු භන්තෙ වත්තෙසු සම්මා වත්තන්තස්ස පටිසාරණීය කම්මකතස්ස භික්ඛුනො තං කම්මං පටිප්පස්සම්භෙතුං භගවතා අනුඤ්ඤාතං.

පුච්ඡා – ආපත්තිං ආවුසො ආපජ්ජිත්වා තං ආපත්තිං පස්සිතුං වා පටිකාතුං වා න ඉච්ඡන්තස්ස භික්ඛුනො ආපත්තියා අදස්සනෙ වා අප්පටිකම්මෙ වා උක්ඛෙපනීයකම්මං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – කොසම්බියං භන්තෙ ආයස්මන්තං ඡන්නත්ථෙරං ආරබ්භ පඤ්ඤත්තං, ආයස්මා භන්තෙ ඡන්නො ආපත්තිං ආපජ්ජිත්වා න ඉච්ඡි තං ආපත්තිං පස්සිතුං වා පටිකාතුං වා, තස්මිං භන්තෙ වත්ථුස්මිං පඤ්ඤත්තං.

පුච්ඡා – ආපත්තියා ආවුසො අදස්සනෙන වා අප්පටිකම්මෙ වා උක්ඛෙපනීය කම්මකතෙන භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – තෙචත්තාලීසාය භන්තෙ වත්තෙසු සම්මා වත්තිතබ්බං.

පුච්ඡා – උක්ඛෙපනීයකම්මකතස්ස ආවුසො භික්ඛුනො සම්මා වත්තන්තස්ස තං කම්මං පටිප්පස්සම්භෙතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – කොසම්බියං භන්තෙ ආයස්මන්තංයෙව ඡන්නං ආරබ්භ අනුඤ්ඤාතං, ආයස්මා භන්තෙ ඡන්නො සඞ්ඝෙන ආපත්තියා අදස්සනෙ වා අප්පටිකම්මෙ වා උක්ඛෙපනීයකම්මකතො සම්මා වත්තෙසි ලොමංපාතෙසි නෙත්ථාරං වත්තෙසි සඞ්ඝං උපසඞ්කමිත්වා තස්ස කම්මස්ස පටිප්පස්සද්ධියා යාචි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – පාපිකං ආවුසො දිට්ඨිං ගහෙත්වා තං දිට්ඨිං න පටිනිස්සජ්ජන්තස්ස පාපිකාය දිට්ඨියා අප්පටිනිස්සග්ගෙ උක්ඛෙපනීයකම්මං කාතුං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අරිට්ඨං භික්ඛුං ගද්ධබාධිපුබ්බං ආරබ්භ පඤ්ඤත්තං, භගවති භන්තෙ සාවත්ථියං විහරති අරිට්ඨස්ස නාම භික්ඛුනො ගද්ධබාධිපුබ්බස්ස එවරූපං පාපකං දිට්ඨිගතං උප්පන්නං අහොසි ‘‘තථාහං භගවතා ධම්මං දෙසිතං ආජානාමි, යථායෙමෙ අන්තරායිකා ධම්මා වුත්තා භගවතා, තෙ පටිසෙවතො නාලං අන්තරායායා’’ති, තස්මිං භන්තෙ වත්ථුස්මිං පඤ්ඤත්තං.

පුච්ඡා – පාපිකාය ආවුසො දිට්ඨියා අප්පටිනිස්සග්ගෙ උක්ඛෙපනීයකම්මකතෙන භික්ඛුනා කතිසු වත්තෙසු සම්මා වත්තිතබ්බං.

විස්සජ්ජනා – තෙචත්තාලීසාය භන්තෙ වත්තෙසු සම්මා වත්තිතබ්බං.

පුච්ඡා – කම්මක්ඛන්ධකං පුච්ඡිස්සං, සනිදානි සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – කම්මක්ඛන්ධකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.