2. උපොසථක්ඛන්ධක

පුච්ඡා – චාතුද්දසෙ ච ආවුසො පන්නරසෙ ච පක්ඛස්ස ච අට්ඨමියා සන්නිපතිත්වා ධම්මං භාසිතුං භගවතා කත්ථ අනුඤ්ඤාතං, කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතා, සම්බහුලා භන්තෙ භික්ඛූ චාතුද්දෙස පන්නරසෙ අට්ඨමියා ච පක්ඛස්ස සන්නිපතිත්වා තුණ්හී නිසීදිංසු, තස්මිං භන්තෙ වත්ථුස්මිං අනුඤ්ඤාතා.

අනුජානාමි භික්ඛවෙ චාතුද්දසෙ පන්නරසෙ අට්ඨමියා ච පක්ඛස්ස සන්නිපතිතුං.

නනු නාම සන්නිපතිතෙහි ධම්මො භාසිතබ්බො.

පුච්ඡා – කදා ආවුසො භික්ඛූනං පාතිමොක්ඛුද්දෙසො භගවතා අනුඤ්ඤාතො.

විස්සජ්ජනා – යදා භන්තෙ භගවතො රහොගතස්ස පටිසල්ලීනස්ස එවං චෙතසො පරිවිතක්කො උදපාදි ‘‘යංනූනාහං යානි මයා භික්ඛූනං පඤ්ඤත්තානි සික්ඛාපදානි, තානි නෙසං පාතිමොක්ඛුද්දෙසං අනුජානෙය්‍යං, සො නෙසං භවිස්සති උපොසථකම්ම’’න්ති තදා භන්තෙ භගවතා භික්ඛූනං පාතිමොක්ඛුද්දෙසො අනුඤ්ඤාතො.

පුච්ඡා – සීමං ආවුසො සම්මනිතුං භගවතා කත්ථ අනුඤ්ඤාතං, කිස්මිඤ්ච වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ අනුඤ්ඤාතං, රාජගහෙ භන්තෙ භගවති විහරති භික්ඛූනං එතදහොසි ‘‘භගවතා පඤ්ඤත්තං එත්තාවතා සාමග්ගී, යාවතා එකාවාසොති කිත්තාවතානුඛො එකාවාසො හොතී’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කති ආවුසො උපොසථා දිවසවසෙන ච කාරකපුග්ගලවසෙන ච කාතබ්බාකාරවසෙන ච.

විස්සජ්ජනා – දිවසවසෙන භන්තෙ තයො උපොසථා, පුග්ගලවසෙන ච භන්තෙ තයො උපොසථා, කාතබ්බාකාරවසෙන ච භන්තෙ තයො උපොසථා.

පුච්ඡා – කති ආවුසො උපොසථකම්මානි තෙසු ච කීදිසං උපොසථකම්මං භගවතා අනුඤ්ඤාතං, කීදිසං අනනුඤ්ඤාතං.

විස්සජ්ජනා – චත්තාරිමානි භන්තෙ උපොසථකම්මානි, අධම්මෙන වග්ගං උපොසථකම්මං, අධම්මෙන සමග්ගං උපොසථකම්මං, ධම්මෙන වග්ගං උපොසථකම්මං, ධම්මෙන සමග්ගං උපොසථකම්මං. තත්‍ර භන්තෙ යදිදං අධම්මෙන වග්ගං උපොසථකම්මං, අධම්මෙන සමග්ගං උපොසථකම්මං ධම්මෙන වග්ගං උපොසථකම්මං, එවරූපං භන්තෙ උපොසථකම්මං අනනුඤ්ඤාතං, තත්‍ර භන්තෙ යදිදං ධම්මෙන සමග්ගං උපොසථකම්මං, එවරූපං භන්තෙ උපොසථකම්මං අනුඤ්ඤාතං.

පුච්ඡා – උපොසථං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – උපොසථං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.