78. එය්‍යා

අඤ්ඤත්‍රාපීති භවෙය්‍යාමුභවෙය්‍යාමඉච්චත්‍රාපි.

ඉති මොග්ගල්ලානපඤ්චිකාටීකායං සාරත්ථවිලාසිනියං

ඡට්ඨකණ්ඩවණ්ණනා නිට්ඨිතා.

නිට්ඨිතා ච සබ්බථා සාරත්ථවිලාසිනී ටීකෙති.

නිගම

1. සබ්බදා සුභදායිත්තා, සත්තානන්තනිසෙවිතෙ;

පසත්ථෙ-න්වත්ථසඤ්ඤාය, පඤ්ඤාතෙ සුභසඤ්ඤිතෙ.

2. චාගවික්කමපඤ්ඤානුද්දයාදිගුණසාලිනා;

සුභසෙනාධිනාථෙන, කාරිතෙ වසතා සතා.

3. පටිසල්ලානසාරුප්පෙ, විහාරෙ සාධුගොචරෙ;

මනොනුකූලෙ යොගීනං, වරෙ වික්කමසුන්දරෙ.

4. ථෙරෙන රචිතා සායං, සාසනුජ්ජොතනත්ථිනා;

ටීකා ගුරුපදම්භොජ, රජොමත්ථකසෙවිනා.

5. බහුස්සුතානං විඤ්ඤූනං, පරමත්ථාවගාහිනං.

පවත්තතු චිරං චෙතො, රඤ්ජයන්තී නිරන්තරං.

6. යෙසං න සඤ්චිතා පඤ්ඤා, නෙකසත්තන්තරොචිතා;

සම්මොහබ්භහතාවෙතෙ, නාවබුජ්ඣන්ති කිඤ්චිපි.

7. කින්තෙහි පාදසුස්සූසා, යෙසං නත්ථි ගුරූනිහ;

යෙ තප්පාදරජොකිණ්ණා, තෙව සාධූවිවෙකිනො.

8. පුඤ්ඤෙන සත්ථරචනාජනිතෙන තෙන,

සම්බුද්ධසාසනවරොදයකාරණෙන;

ලොකාමිසෙසුපි කිලෙසමලා අලග්ගො,

සම්බුද්ධසාසනවරොදයමාචරෙය්‍යං.

9. යෙ-නන්තතන්තරතනාකරමන්ථනෙන,

මන්ථාච ලොල්ලසිතඤාණවරෙන ලද්ධා;

සාරාමථාති සුඛිතා සුඛයන්ති චඤ්ඤෙ,

තෙමෙ ජයන්ති ගුරවා ගුරවො ගුණෙහි.

10. ටීකායො විනසාදිනං විරචයී යො කණ්ඨභූසාපරො,

විඤ්ඤූනං ජිනසාසනාමලමතීසො-කාසි චානාකුලං;

සන්තොසක්කමනොමනොමකමනො සබ්භාවනීයො මහා,

සාමී මෙ ගුරුපුඞ්ගවො විජයතෙ සාරීසුතො-යං භුවි.

11. රාජා වික්කමබාහු බාහිතරිපූ තාත්වස්ස [භාතාස්ස] ලොකිස්සරො,

සම්මිත්තානිහනො තිසීහළපතී යොයං මහාවික්කමො;

නිබ්භීතො [තිසූරො] විජයාදිබාහු විජයී සො ආසි ලඞ්කිස්සරො,

තං නිස්සාය ඵලං චිරාය ඵලතඤ්චෙතං සතං සන්තතං.

සිද්ධි රත්ථු

1. අග්ගම්මොතිවංසෙන, අභයාරාමසාමිනා;

පඤ්චිකාවණ්ණනාභූතා, සා සාරත්ථවිලාසිනී.

2. ම්‍රම්මක්ඛරමාරොපෙත්වා, විසොධෙත්වා යථාබලං;

සකියබ්‍යවහාරෙන, තිථීවසු කරින්දුනා.

3. යුත්තෙ වස්සෙ ලඞ්කාදීපා, සරට්ඨමාහතා පුන;

භාස්සප්පදීපකාතන්ත, කාසිකාපඤ්චිකාදිහි.

4. සංසන්දිත්වා විචාරෙත්වා, වාචෙත්වාච පුනප්පුනං;

ඌනාධිකාදි දොසානි, අපනෙත්වා සිනෙසිනෙ.

5. සුද්ධට්ඨකෙ ච වස්සෙසා, පාපිතා පකතිට්ඨිතිං;

සුද්ධාසුද්ධංව දස්සෙන්තී, සොධෙතු පාඨසුද්ධියා.