ද්විසට්ඨිමපරිච්ඡෙද

පරමණ්ඩලාභිගමනො

1. අත්තනාභිමතස්සා’සු, ජාතදෙසස්ස පත්තියා;

සම්පුණ්ණමනසඞ්කප්පො, දුස්සඞ්කපවිවජ්ජිතො.

2. වජිරූපමොරුපඤ්ඤා, බලෙන ගුරුසන්තිකෙ;

ලහුං බහුඤ්ච ගණ්හන්තො, සිප්පජාතමනෙක කං.

3. ජිනාගමෙසු නෙකෙසු, කොටිල්ලා දීසු නීතිසු;

සද්දසත්ථෙ ච කාවෙය්‍යෙ, සනිඝණ්ඩුක කෙටුභෙ.

4. නච්චගීතෙසු සත්ථෙසු, හත්ථිසිප්පාදිකෙසු ච;

ධනු ඛග්ගාදිනෙකෙසු, සත්ථෙසු ච විසෙසතො.

5. පාරප්පත්තො විනීතත්තො, පිතු රඤ්ඤො සමාචරි;

අධිප්පායානුකුලං’ව, සදා භත්තිපුරස්සරො.

6. තදා සදා දරාචාර-ගුණාරාධිතමානසො;

පියෙන විය මිත්තෙන, තෙන සද්ධිං මහීපති.

7. උය්‍යානජලකීළාදි-සුඛං නානප්පකාරකං;

අනුභොත්වා සදෙසස්මිං, සඤ්චරන්තො තහිං තහිං.

8. එකදාසඞ්ඛසෙනාධි-පතිනා දළ්හභත්තිනා;

සරට්ඨසීමා රක්ඛාය, යො ජිතෙන බලීයසා.

9. අජ්ඣාවුත්ථස්ස ච බලත්ථ-ලිනමස්ස ච සන්තිකං;

ගාමසා’ගඤ්ඡි සුත්වාන, තමත්ථං ධජිනීපති.

10. ගාමං තං සාධුකං සජ්ජු, සජ්ජාපෙත්වා සපුත්තකං;

පච්චුග්ගන්ත්වා මහීපාලං, පණමිත්වා ඨිතො තදා.

11. පිතා පුත්තො උභො තස්ස, සම්භාසිය පියං වචො;

නෙකධා’රාධිතා තෙන, තං ගාමං සමුපාගගුං.

12. තහිං කතිචි භූපාලො, වාසරෙ වීතිනාමිය;

සෙනාපතිං සමාහූය, ඉදං වචනං මබ්‍රවි.

13. පුත්තො මෙ දානිවයසි, ඨිතො’ පනයනාරහෙ;

තස්සොපනයනං කාතුං, මහොපකරණං ලහුං.

14. සජ්ජෙතබ්බන්ති තං සුත්වා, සොපි සෙනාධිනායකො;

සබ්බුපකරණං ඛිප්පං, මඞ්ගලත්ථං සුසජ්ජයි.

15. සුගන්ධ දීපපුප්ඵාදි-වත්ථූහි දිවසත්තයං;

පුබ්බකාරං කරිත්වාන, මහන්තං රතනත්තයෙ.

16. වෙදිකාචාරදක්ඛෙහි, ද්විජෙහි පුථුවීපති;

සම්පභාවානු රූපංව, මඞ්ගලං තං සමාපිය.

17. පරක්කමකුමාරෙන, තෙන සද්ධිං සමාරභි;

වසන්තකීළං මහතිං, සාමච්චො කීළිතුං තදා.

18. රාජා කිත්ති සිරීමෙඝො-රොහණෙ වසතො තදා;

සිරීවල්ලභනාමස්ස, සභාතු මරණම්පි ච.

19. මාණභරණනාමස්ස, රජ්ජලාභඤ්ච දෙවියා;

මිත්තාය පටිලාභඤ්ච, සිරීවල්ලභසූනු නො.

20. රොහණාගතදූතෙහි, සුණිත්වා සකභාතුනො;

කාලක්‍රියාය සඤ්ජාත-සොකවෙගං සුදුස්සහං.

21. මිත්තායතනයුප්පත්ති පවත්තිං සවණෙන තං;

විනෙය්‍ය විරතො තම්හා, වසන්තසමයුස්සවා.

22. නිවත්තෙත්වාන තත්ථෙව, සෙනානිං සඞ්ඛනාමකං;

පුත්තෙන සහ සො සඞ්ඛ-ත්ථලි නාමං පුරං ගමි.

23. පරක්කමකුමාරෙන, තෙන සද්ධිං තහිං සුඛං;

වසතො තස්ස භූපස්ස, වස්සමෙකමතික්කමි.

24. මාණාභරණභූපස්ස, දෙවී චාපි පභාවතී;

ලභිත්ථ දුතියා කිත්ති-සිරී මෙඝව්හයං සුතං.

25. සුණිත්වා තඤ්ච සො අම්හං, වංසො ජාතො මහා’’ඉති;

අහු කිත්තිසිරීමෙඝො, තදා අත්තමනො භුසං.

26. ලංකාදීපොපභොගෙක-හෙතුනා මහතා සතා;

අසාධාරණභූභෙන, චොදිතො පුඤ්ඤකම්මුනා.

27. කුමාරො සො’ථ පිතරා, පියමිත්තෙ වියත්තනි;

කරියමානං සස්නෙහං, මහන්තං චො’පලාලනං.

28. සචිවානමනෙකෙසං, භයභත්තී පුරස්සරං;

ක්‍රියමානමුපට්ඨානං, න මඤ්ඤන්තො තිණායපි.

29. ලංකාදීපමිමං සබ්බ මෙකච්ඡත්තො පසොභිතං;

ඛිප්පං කාරෙතුකාමො සො, සයං ඉති විචින්තයි.

30. කෙස අක්ඛක ගීවට්ඨි-දාඨා පත්තාන මෙව ච;

පදචෙත්‍ය මහාබොධි-සාඛානඤ්චාපි සත්ථුනො.

31. චතුරාසීතිසහස්සානං, ධම්මක්ඛන්ධාන මෙව ච;

සම්මාසම්බුද්ධකප්පානං, ආධාරත්තා ච නිච්චසො.

32. ආකරත්තා ච නෙකෙසං, මණිමුත්තාදිවත්ථූනං;

සම්මතොපි විසිට්ඨොති, දීපොනාති මහා අයං.

33. තයො මෙ පිතරො භූපා, මාතුලොපි ච සබ්බථා;

එකච්ඡත්තෙන වත්තෙතු, මසමත්ථා විභජ්ජි’මං.

34. භුඤ්ජන්තා එත්තකෙනෙව, කතකිච්චා මයං ඉති;

මඤ්ඤන්තා විගතච්ඡන්දා’භිසෙකම්හි කුලොචිතෙ.

35. රට්ඨෙසකෙ සකෙයෙව, ඉස්සෙරං සම්පවත්තයුං;

කසිකම්මාදිකං ගාම-භොජකා විය නිස්සිතා.

36. තෙසු කිත්තිසිරි මෙඝං, පෙත්තෙය්‍යං මෙ ඨපෙත්ව තෙ;

අගමංසු යථාකම්මං, සෙසා භූපතයො තයො.

37. මච්චානං පරමං ආයු, වතෙ’දානි පරිත්තකං;

බාලායුවානො වුද්ධා ච, ඉමෙ සත්තා’නුපුබ්බසො.

38. පාපුණිස්සන්ති මරණ-මීති’යං නියමොපි ච;

න හෙව අස්මිං ලොකස්මිං, සංවිජ්ජති කදාචිපි.

39. තස්මා සරීරකෙ අස්මිං, භඞ්ගුරෙ සාරවජ්ජිතෙ;

හීළිතෙ සාරදස්සීහි, අපෙක්ඛං හිත්වා සබ්බථා.

40. පිහනියෙ යසොදෙහෙ, චිරට්ඨායිම්හි සබ්බදා;

අම්හාදිසෙහි කත්තබ්බො, රාජපුත්තෙහි ආදරො.

41. උම්මග්ගජාතකාදීසු, චාරිත්තඤ්චාපි භූමිසු;

විහිතං බොධිසත්තෙන, වීරභාවාදිනිස්සිතං.

42. රාමායණභාරතාදි-ලොකියාසු කථාසුපි;

රාමස්ස වික්කමඤ්චෙව, තස්ස රාවණඝාතිනො.

43. දුයොධනාදිරාජානො, හන්ත්වායුද්ධෙ පවත්තිතං;

වික්කමාති සයඤ්චෙව, පඤ්චන්නං පණ්ඩුසූනූනං.

44. ඉතිහාසකථායඤ්ච, දෙවාසුරරණෙ පුරා;

දුස්සන්තාදිමහීපෙහි, කතඤ්ච චරිතබ්භූතං.

45. උම්මූලිතවතො තස්ස, නන්දවංසනරිස්සරෙ;

චාරක්කද්විජසෙට්ඨස්ස, සුත්වා බුද්ධිබලම්පි ච.

46. සබ්බා නෙතානි ලොකම්හි, යාවජ්ජදිවසා භුවි;

තෙසං අසන්නිධානෙපි, සුප්පසිද්ධිං ගතානි හි.

47. සුලද්ධං ජීවිතං තෙසං, අසාධාරණමීදිසං;

චරිතාතිසයං කත්තුං, සමත්ථා හොන්ති යෙ භුවි.

48. ජායිත්වා ඛත්තවංසම්හි, ඛත්තවීරවරොධිතං;

යදිහං න කරිස්සාමි, මොඝා මෙ ජාති හෙස්සති.

49. තෙසමබ්භධිකා කාල-සම්පදායෙව කෙවලං;

මයා තෙ අධිකා කින්තු, පඤ්ඤාදීහීති චින්තිය.

50. පිතුරාජා ච මෙ’දානි, පච්ඡිමෙ වයසිට්ඨිතො;

යදිදං පෙත්තිකං රජ්ජං, මම හත්ථගතබ්භවෙ.

51. රාජලක්ඛිව සො පෙත-චෙතසො මෙ පමාදතො;

යථිච්ඡිතඤ්චෙ න භවෙ, මහතී ජානි මෙ භුසං.

52. එත්ථෙව නිවසන්තො’හං, චරාපිය සකෙ වරෙ;

පරමණ්ඩලවුත්තන්තං, ජානෙය්‍යං යදි තත්තනො.

53. රන්ධං පච්චත්ථිකානන්තු, පකාසෙතුං රථාතථං;

අධිප්පායානුරූපං මෙ, සමත්ථා වා න වාචරා.

54. යෙ කෙචි’ධ ජනා සන්ති, සබ්බෙ තෙ මම සම්මුඛා;

බලීයත්තං’ව සත්තූනං, කථයන්ති අනෙකසො.

55. පච්චෙකරට්ඨසාමීහි, පිතුභූපෙහි තිහිපි;

එකීභූය කරිත්වාන, සත්තක්ඛත්තුං මහාහවං.

56. සාධෙතුං දුක්කරං රට්ඨං, භවතෙ කාකිනා කථං;

සිසුනා ගණ්හිතුං සක්කා, ඛුද්දරජ්ජො පභොගිනා.

57. සුකරං මූලභූතස්ස, තස්ස රජ්ජස්ස සාධනං;

ඉති දුච්චින්තංතං තුය්හං, දූරෙ තබ්බමිදං’’ඉති.

58. කණ්ණෙ තත්ථසලාකායො, පවෙසෙන්තා’ව නෙකසො;

මහන්තත්තං කථෙන්තෙ’වං, බහුධා පරමණ්ඩලෙ.

59. අජානනං යථාභූතං, වදන්තානං කුබුද්ධිනං;

සබ්බමෙතං වචො ජාතු, සද්ධාතබ්බං සියා න හි.

60. ලෙසෙනෙකෙන ගන්ත්වාන, ඛිප්පං’ව පරමණ්ඩලං;

සරූපං තත්ථ උස්සාමි, අහමෙවෙති චින්තයි.

61. යදි මෙ පීතුභූපාලො, විඤ්ඤායෙතං විතක්කිතං;

අභිජාතස්ස පුත්තස්ස, වංසජොතිකරස්ස මෙ.

62. ගතස්ස සත්ථු විසය-මනත්ථොපි සියා ඉති;

අනුකම්පාධියා මය්හං, ගමනං වාරයිස්සති.

63. මනොරථස්ස සංසිද්ධි, සබ්බථා මෙන හෙස්සති;

තස්මා නිගුළරූපෙන, ගමනං භද්දකං ඉති.

64. ලද්ධාන රත්තියම ථෙකදිනං ඛණඤ්ඤූ,

සො තාදිසං ඛණමඛීණතරොරූපායො;

ජානාති නො සකපිතාගමනං තථාතං,

ගෙහා’භිනික්ඛමිතථා චතුරො කුමාරො.

සුජනප්පසාදසංවෙගත්ථාය කතෙ මහාවංසෙ

පරමණ්ඩලාභිගමනො නාම

ද්විසට්ඨිමො පරිච්ඡෙදො.