තිසට්ඨිම පරිච්ඡෙද

සෙනාපතිවධො

1. නිජායුධදුතියස්ස, නික්ඛමන්තස්ස තස්ස හි;

තං ඛණං පුරතො කො’පි, සඞ්ඛසද්දො සමුග්ගතො.

2. තතො නෙකනිමිත්තඤ්ඤූ, කුමාරො තං සුණි ත්ව සො;

නිප්ඵජ්ජිස්සති සඞ්කප්පො, ඛිප්පං යෙවෙති මොදවා.

3. තත්ථ තත්ථ නියුත්තානං, රක්ඛකානමජානතං;

නික්ඛමිත්වා පුරාවීත-භයො සීහපරක්කමො.

4. වෙගෙන මග්ගං ගන්ත්වාන, පඤ්චගාවුතමත්තකං;

බදලත්ථලගාමස්ස, පදෙසෙනාති දූරකෙ.

5. ගාම මෙකමුපාගඤ්චි, පිලිං වත්ථූති සඤ්ඤිතං;

ජනානං සන්නිපාතාය, නිජානං සො කතාවධි.

6. නිජාගමනතො පුබ්බං, පටිමග්ගෙ නිසීදිතුං;

පටිලද්ධනියොගානං, යෙචි දෙවාගතෙ තදා.

7. තහිං ඨිතෙ සො පස්සිත්වා, එත්තකා කින්නු ආගතා;

ඉති පුච්ඡි කුමාරොථ, තෙපි තං ඉද මබ්‍රවුං.

8. ලොකප්පවත්තිං සකලං, ජානන්තෙනාපි සාමිනා;

කිමෙව මුච්චතෙ මච්චු-භයං කෙසං න විජ්ජති.

9. බාලාතානුගතො සාමි, ඨිතො වයසි ඊදිසෙ;

අජ්ජාපි හි මුඛෙ තුය්හං, ඛීරගන්ධො පවායති.

10. න හෙවත්ථි විසුං විත්ත-ජාතං සඞ්ගහිතං තව;

තදඤ්ඤා චොපකරණ-සාමග්ගී නෙව විජ්ජතෙ.

11. චිරම්පරිචිතත්තෙහි, දළ්හං සාරුළභත්තිහි;

විනා’ම්හෙහි විසුං කෙවා’නුගන්තාරො ජනාතුවං.

12. කිඤ්චාගතානමම්හාකං, පිතා තුය්හං නරිස්සරො;

කාරෙස්සති ඉදං නාම, සබ්බථා නෙව ඤායතෙ.

13. අම්හාකමන්තරාමග්ගෙ, සඞ්ඛො නාම චමූපති;

මහබ්බලො මහාවීරො, රජ්ජසීමං තමාවසං.

14. පච්චත්ථිතෙ ඨපෙත්වඤ්ඤෙ, එතෙ කතිපයා මයං;

අඤ්ඤමඤ්ඤම්හි නියත-මාසඞ්කී හදයා භුසං.

15. අරුණුග්ගමවෙලා ච, සමාසන්නතරාධුනා;

ඉති භීතිං පකාසෙසුං, පච්චෙකං හදයස්සිතං.

16. නිසම්ම තෙසං වචනං, විධාය මධුරං සිතං;

වීතසඞ්කො කුමාරො සො, මුඛානෙ’සං විලොකිය.

17. චරිත්වාපි මයා සද්ධි-මෙතෙ’හො කාලමෙත්තකං;

න ජානිංසු මමං සබ්බෙ, යෙසඤ්හි භයමිදිසං.

18. ඉති වත්වා භයං තෙසං, විනොදෙතු මුපට්ඨිතං;

සීහනාදං තදා’කාසි, මහන්තං සීහවික්කමො.

19. තිට්ඨන්තු මානුසා සබ්බෙ, මයි හත්ථගතායුධෙ;

සක්කො දෙවානමින්දොපි, කුපිතො කිං කරිස්සති.

20. බාලොති මං චින්තය තං, ජාතා වො කුමතීදිසී;

පරික්ඛීයති තෙ ජාණා, නවයො’ති න කිං සුතං.

21. අජ්ජෙව කාතුමෙකෙන, කම්මුනා චින්තිතෙන මෙ;

සදෙසපර දෙසට්ඨා, භයභත්තී යථාමයි.

22. කරිස්සන්ති යථා වෙදං, භයං තුම්හෙ ජහිස්සථ;

තථා රත්තියමෙතාය, විභාතාමය ඛණෙන මෙ.

23. උන්නතෙ දස්සයිස්සාමි, බුද්ධි සාහසවික්කමෙ;

අනුධාවති මං තාත, සෙතෙහි යදි වො භයං.

24. පුරතො හොථ තුම්හෙහි, වත්වා තෙ ගහිතායුධො;

සාහසෙකරසො වීරො, තම්හා නික්ඛම්ම ගාමතො.

25. උදයා’චලසීසට්ඨං, ජෙතුමාදිච්චමණ්ඩලං;

අපරං රවි බිම්බංව, පච්ඡිමා සා මුඛොදිතං.

26. තෙජසා පසරන්තෙන, ජනානං පවිකාසයං;

නෙතම්බුජවනං පාතො, බදලත්ථලිමාගමි.

27. ජඝසඞ්ඛස්සරෙනා’ථ, සෙනා නාථො පබුජ්ඣිය;

සඤ්ජාතසම්භමො ඤත්වා, රාජපුත්තමුපාගතං.

28. සද්ධිං බලෙන මහතා, පධුග්ගම්මකතාදරො;

පණාමමුචිතං කත්තු-මානතො වසුධාතලෙ.

29. අම්හාකමෙසජීවන්තො, කිං නාමත්ථං කරිස්සති;

මාරෙතබ්බො’ධුනෙවෙති, පස්සන්තෙ සමුඛං භටෙ.

30. නෙවා’දිට්ඨාපරාධස්ස, මරණං පුරිසො චිතං;

වධො විරොධෙ සක්කා’ති, ඉඞ්ගිතෙන නිවාරිය.

31. සෙනාපතිස්ස සො හත්ථං, ගහෙත්වා සීහසන්නිභො;

භාසන්තො මධුරං වාචං, තස්සෙවා’ගඤ්ඡි මන්දිරං.

32. අථස්ස ගමනං රඤ්ඤො, භවිතබ්බමජානතා;

සරූපං යාව ජානාමි, තාවස්සෙතෙ සහාගතා.

33. යථා න සහිතා හොන්ති, ඨපෙතබ්බා විසුං විසුං;

කුමාරො’ව මමාගාරෙ, වසතූ’ති විචින්තිය.

34. තථා සෙනාපති කත්වා, වඤ්චෙතුං තං මහාමතිං;

දස්සෙත්වා’ති ථීසක්කාරං, රඤ්ඤො දූතෙ ස පෙසයි.

35. කුමාරො’ථ විදිත්වාන, තෙන තං වඤ්චනං කතං;

කත්තබ්බමෙත්ථා’කත්වාහ, මුදාසීනො භවෙ යදි.

36. ඉච්ඡිතත්ථස්ස නිප්ඵත්ති, න මෙ ජාතු භවිස්සති;

අයං තාවා’ධුනාවස්සං, මාරෙතබ්බොති චින්තිය.

37. සහාගතං පයොජෙත්වා, ඝාතාපයි චමූපතිං;

හතො සෙනාධිනාථො’ති, මහන්තං ඛුභිතං අහු.

38. සෙනානාථභටො එකො, සුත්වා සෙනාපතිං හතං;

මාරණං සාමිනො මය්හං, කිං නිමිත්තමීති බ්‍රවි.

39. නෙත්තිං සපාණී සහසා, කුමාරං ඨිතමෙකකං;

අභිදාවි සසාමිස්ස, පරිචත්තත්තජීවිනො.

40. කුමාරස්ස මුඛං දිස්වා, වෙධමානො භයෙන සො;

පුරෙ ඨාතුමසක්කොන්තො, පාදමූලෙ තතො සයි.

41. ගණ්හථෙ’තන්තිවචනා-කුමාරස්ස පුරෙතරං;

තස්සෙවෙකො සහචරො, භටමෙතං විඝාතයි.

42. නියොගං මෙ විනා තෙන, කතං කම්මං න යුජ්ජති;

ඉති දණ්ඩනමෙතස්ස, කාරාපෙසියථොචිතං.

43. අථ තං කාලයම්භූත-සඞ්ඛොභමතිභිංසනං;

භමුක්ඛිපනමත්තෙන, රාජපුත්තො සමං නයි.

44. වීරො යසොධරධනො ධිතිමා කුමාරො;

වීරොපකාරචතුරො වරකිත්තිසාරො;

සෙනින්දසඤ්චිතමනප්පධනං භටානං;

සබ්බං විසජ්ජයි යථාරුචියා ගහෙතුං.

සුජනප්පසාදසංවෙගත්ථාය කතෙ මහාවංසෙ

සෙනාපතිවධො නාම

තිසට්ඨිමො පරිච්ඡෙදො.