සත්තපඤ්ඤාසතිම පරිච්ඡෙද

සංගහකරණොනාම

1. ලඞ්කාරක්ඛාය සචිවෙ, බලිනො යොධසම්මතෙ;

පටිපාටිං සමුද්දිස්ස, සමන්තා සන්නියොජයි.

2. අභිසෙකමඞ්ගලත්ථාය, පාසාදාදිමනෙකතං;

කිච්චං සම්පාදනීයන්ති, සචිවං සන්නියොජිය.

3. වන්දනීයෙ’භිවන්දන්තො, පදෙසෙනෙකකෙතහිං;

නෙත්වා මාසත්තයං ගඤ්ඡි, පුලත්ථිනගරං පුන.

4. විස්සුතො ආදිමලය-නාමෙන බලනායකො;

උජුපච්චත්ථිකො හුත්වා, මහීපාලස්ස සබ්බසො.

5. ගඞ්ගා මත්ථයු’පාගඤ්ඡි, බලං සබ්බං සමාදිය;

අන්දූති විස්සුතං මන්ද-පඤ්ඤො ගාමං පුරන්තිකෙ.

6. ලංකිස්සරො තහිං ගන්ත්වා, උද්ධරිත්වා තමුද්ධතං;

පුලත්ථිනගරං ගඤ්ඡි, වසෙ වත්තිය තං බලං.

7. යුවරාජපදංයෙව, සිතො සන්තො ලිඛාපයි;

සො සත්තරසවස්සානි, සප්පඤ්ඤො නරසත්තමො.

8. තතො’නුරාධනගර-මභිගම්ම යථාවිධිං;

අනුභොත්වා විධානඤ්ඤූ, අභිසෙකමහුස්සවං.

9. අට්ඨිතො පාපධම්මෙසු, සුට්ඨිතො සෙට්ඨකම්මනි;

සො අට්ඨාරසමං වස්සං, ලිඛාපයි සුසණ්ඨිතො.

10. තතො ආගම්ම නිවසි, පුලත්ථිනගරෙ වරෙ;

සො සිරීසඞ්ඝබොධී’ති, නාමධෙය්‍යෙන විස්සුතො.

11. අනුජං සො වීරබාහු-මොපරජ්ජෙ නිවෙසිය;

දත්වාන දක්ඛිණං දෙසං, තං සඞ්ගණ්හි යථාවිධිං.

12. කණිට්ඨස්සාථ භාතුස්ස, ජයබාහුස්ස භූභුජො;

ආදිපාදපදං දත්වා, රට්ඨං චා’දාසි රොහණං.

13. ඨානන්තරානි සබ්බෙස-මමච්චානං යථාරහං;

දත්වා රජ්ජෙ යථාඤායං, කරං යොජෙසි ගණ්හිතුං.

14. චිරස්සං පරිහීනං සො, දයාවාසො මහීපති;

පවත්තෙසි යථාධම්මං, ඨිතධම්මො විනිච්ඡයං.

15. එවං සමුද්ධටානෙක, රිපුකණ්ටකසඤ්චයෙ;

නිච්චං රජ්ජං පසාසෙන්තෙ, ලඞ්කංසම්මානරිස්සරෙ.

16. ඡත්තග්ගාහකනාථො ච, ධම්මගෙහකනායකො;

තථෙව සෙට්ඨිනාථො ච, ඉච්චෙතෙ භාතරො තයො.

17. රඤ්ඤො විරොධිතං යාතා, ඵලාතා ජම්පුදීපකං;

ලඞ්කං වීසතිමෙ වස්සෙ, එකෙනූනෙ සමොතරුං.

18. තෙ සබ්බෙ රොහණං රට්ඨං, සබ්බං මලයමණ්ඩලං;

සබ්බං දක්ඛිණපස්සඤ්ච, සහසා පරිවත්තයුං.

19. නිපුණො රොහණං ගන්ත්වා, තථා මලයමණ්ඩලං;

නිඝාතෙන්තො බහූ තත්ථ, තත්ථ පච්චත්ථිකෙ ජනෙ.

20. සම්මාවුපසමෙත්වා තං, ඨපෙත්වා සචිවෙ තහිං;

දක්ඛිණො දක්ඛිණං දෙසං, සයං ගන්ත්වා මහබ්බලො.

21. පෙසෙත්වා සමණීභාතු-වංසජං සචිවං තදා;

ගාහෙත්වා සමරෙඝොරෙ, වීරො තෙ සකවෙරිනො.

22. සමාරොපියසූලම්හි, ලඞ්කං විගතකණ්ටකං;

කාරෙත්වාන නිරාතඞ්කං, පුලත්ථිපුරමාගමි.

23. වසන්තී චොළවිසයෙ, ජගතිපාලරාජිනී;

චොළහත්ථා පමුඤ්චිත්වා, සද්ධිං ධීතු කුමාරියා.

24. ලීලාවත්‍යාභිධානාය, නාවාමාරුය්හ වෙගසා;

ලංකාදීපම්හි ඔතිණ්ණා, පස්සි ලංකිස්සරං තදා.

25. සුත්වා වංසක්කමං තස්සා, සො ඤත්වා සුද්ධවංසතං;

ලීලාවතිං මහිසිත්තෙ, අභිසිඤ්චි නරිස්සරො.

26. සා තං පටිච්ච රාජානං, මහෙසී ධීතරං ලභි;

නාමං යසොධරාති’ස්සා, අකාසි ධරණී පති.

27. මෙරුකන්දරරට්ඨෙන, සද්ධිං රාජා සධීතරං;

වීරවම්මස්ස පාදාසි, සා ලභි ධීතරො දුවෙ.

28. සමානනාමිකා ජෙට්ඨා, සා මාතා මහියා අහු;

සුගලා නාමිකා ආසි, තාසු ද්වීසු කණිට්ඨිකා.

29. කාලිඞ්ගධරණීපාල-වංසජං චාරුදස්සනං;

තිලොකසුන්දරං නාම, සුකුමාරං කුමාරිකං.

30. කාලිඞ්ගරට්ඨතො රාජා, ආණාපෙත්වා චිරට්ඨිතිං;

නිජවංසස්ස ඉච්ඡන්තො, මහෙසිත්තෙ’භි සෙචයි.

31. සුභද්දා ච සුමිත්තා ච, ලොකනාථව්හයාපි ච;

රතනාවලී රූපවතී, ඉතිමා පඤ්ච ධීතරො.

32. පුත්තං වික්කමබාහුඤ්ච, සා ලභී ධඤ්ඤලක්ඛණං;

සම්පත්තා සා පජවුද්ධිං, හරන්ති රාජිනො මතං.

33. ඉත්ථාගාරෙසු සෙසෙසු, වීතා සමකුලඞ්ගනා;

ගබ්භො ජාතුමහීපාලං, තං පටිච්ච න සණ්ඨහි.

34. අථෙකදිවසං රාජා, අමච්චගණමජ්ඣගො;

පිලොකියඨිභා සබ්බා, ධීතරො පටිපාටියා.

35. ධීතු නවමවසෙසානං, ඨපෙත්වා රතනාවලිං;

ධඤ්ඤලක්ඛණසම්පන්න-පුත්තස්සුප්පත්තිසුචකං.

36. ලක්ඛණං ලක්ඛණඤ්ඤූ සො, අපස්සං පෙමචෙගවා;

රතනාවලිමාහූය, තස්සා මුද්ධනි චුම්බිය.

37. තෙජොගුණෙහි චාගෙහි, ධියා සූරත්තනෙන ච;

භූතෙ ච භාවිනො චෙව, සබ්බෙ භූපෙ’තිසායිනො.

38. නිච්චං ලඞ්කං නිරාසඞ්ක-මෙකච්ඡත්තකමෙව ච;

පවිධාතුං සමත්ථස්ස, සම්මාසාසනතායිනො.

39. සොභනානෙකවත්තස්ස, ඉමිස්සා කුච්ඡිහෙස්සති;

පුත්තස්සුප්පත්තිඨානන්ති, මුදුතො සො සමබ්‍රවි.

40. යාවන්තස්සාපිඛොචොළ-මහීපාලස්ස නෙකසො;

කුලාභිමානී රාජා සො, අදත්වාන කණීයසිං.

41. ආණාපෙත්වා පණ්ඩුරාජං, විසුද්ධත්වයසම්භවං;

අනුජං රාජිනිං වස්ස, මිත්තව්හයමදාසිසො.

42. සාමාණභරණං කිත්ති, සිරී මෙඝාභිධානකං;

සිරිවල්ලභනාමඤ්ච, ජනෙසි තනයෙ තයො.

43. සුභද්ද වීරබාහුස්ස, සුමිත්තං ජයබාහුනො;

මහතා පරිහාරෙන, පාදාසි ධරණී පති.

44. අදාසි මාණාභරණෙ, ධීතරං රතනාවලිං;

ලොකනාථව්හයං කිත්ති සිරිමෙඝස්ස’දාසිසො.

45. රූපත්‍යභිධානාය, ධීතුයො පරතායහි;

සරීරිවල්ලභසාදා, සුගලව්හ කුමාරිකං.

46. මධුකණ්ණවභීමරාජ, බලක්කාර සනාමකෙ;

මහෙසී බන්ධවෙරාජ-පුත්තෙ සීහපුරාගතෙ.

47. පස්සිත්වාන පහීපාලො, තදා සඤ්ජාතපීතිකො;

තෙසං පාදාසි පච්චෙකං, වුත්තිං සො අනුරූපකං.

48. තෙ සබ්බෙ ලද්ධසක්කාර සම්මානාධරණීපතිං;

ආරාධයන්තා සසතං, නිවසිංසු යථාරුචිං.

49. එතෙසං රාජපුත්තානං, සුන්දරිව්හං කණිට්ඨකං;

අදා වික්කමබාහුස්ස, නිජවංසඨිතට්ඨිකො.

50. භිය්‍යො වික්කමබාහුස්ස, තතො ලීලාවතිං සතිං;

සහ භොගෙන පාදාසි, තදා බන්ධු හිතෙරතො.

51. විධාය එවං සජනෙ ජනින්දො;

නිස්සෙසතො භොගසමප්පිතො;

දයාපරො ඤාතිජනාතමත්ථං;

සමාචරී නීතිපථානුරූපං.

සුජනප්පසාදසංවෙගත්ථාය කතෙ මහාවංසෙ

සංගහකරණො නාම

සත්තපඤ්ඤාසතිමො පරිච්ඡෙදො