සත්තචත්තාලීසතිම පරිච්ඡෙද

පඤ්චරාජකො

1. අච්චයෙ පිතුනො රාජා, උපරාජා අහොසි සො;

සමත්ථො සක්කුමිත්තානං, කාතුං නිග්ගහ සංගහෙ.

2. සෙනා නාමසි සප්පඤ්ඤා, මහෙසී තස්ස රාජිනො;

ඛුද්දපුත්තා පීයා’තීව, රඤ්ඤො කල්‍යාණදස්සනා.

3. අදාසි යුවරාජත්තං, ජෙට්ඨපුත්තස්ස අත්තනො;

ආදිපාදෙ’පරෙකාසි, රාජිනීපි ච ධීතරො.

4. දත්වා ඨානන්තරං රාජා, තෙසං තෙසං යථාරහං;

ජනං සඞ්ගහවත්ථූහි, සඞ්ගහෙසි චතූහිපි.

5. අථ කෙනාපි සො ගන්ත්වා, හෙතුනා මණිහීරකං;

වසන්තො කිර අස්සොසි, පච්චන්තො කුපිතො ඉති.

6. තතො සෙනාපතිඤ්චෙව, ජෙට්ඨපුත්තඤ්ච අත්තනො;

ගන්ත්වා සාධෙථ තං දෙස-මීති පෙසෙසි සජ්ජුකං.

7. තෙසු තත්ථොපයාතෙසු, පිසුනා භෙදචින්තකා;

වත්වා යංකිඤ්චි භින්දිංසු, තෙ උභොපි නරාධිපෙ.

8. තතො ද්වෙ වෙරිනො හුත්වා, දෙසං ගණ්හිතුමාරභුං;

රාජා සුත්වා ඛණෙනෙව, දුරතිස්ස මුපාගමි.

9. තෙ උභො තත්ථ ඝාතෙත්වා, තෙසං සබ්බං සමාදිය;

හන්ත්වා තං පක්ඛියෙ සබ්බෙ, පුළත්ථිනගරං ගමි.

10. තදා රොහණදෙසම්හි, භොගාධිපතිනො සුතො;

දාඨාසිවාදිපාදස්ස, මහින්දො නාම ඛත්තියො.

11. පිතුනො සො’පරිජ්ඣිත්වා, රඤ්ඤො සන්තිකමාගමා;

දිස්වා රාජාපි සන්තුට්ඨො, තං සඞ්ගණ්හි යථාරහං.

12. තෙන මෙත්තිං ථිරං කාතුං, ධීතරං දෙව නාමිකං;

තස්ස දත්වාන පාහෙසි, බලං රොහණමෙවසො.

13. සො ගන්ත්වා රාජසෙනාය, මද්දාපෙත්වාන රොහණං;

ජම්බුදීපං පලාපෙත්වා, පිතරං රොහණං ලභි.

14. මහාවිහාරෙ කාරෙසි, සලාකග්ගං ථිරං සුභං;

ඛොලක්ඛියමුනින්දස්ස, පරිහාරාය දාපයි.

15. මහානාමව්හයං ගාමං, පූජයිත්වා යථාබලං;

වඩ්ඪමානදුමින්දස්ස, ජිණ්ණං ගෙහඤ්ච කාරිය.

16. රුක්ඛණත්ථාය තස්සා;දා, කොට්ඨාගාමං බහුදයං;

නීලාරාමස්ස පාදාසි, කාළුස්සං නාම ගාමකං.

17. ලොහරූපස්ස පාදාසි, ආරාමස්ස ච ගාමකං;

ජිණ්ණඤ්ච පටිසඞ්ඛාසි, පටිමායො ච කාරයි.

18. පාසාදෙ චෙතියො චෙව, විහාරෙ ච අනප්පකෙ;

පුළත්ථිනගරෙ’කාසි, වෙජ්ජසාලං මහාදයො.

19. තථා පණ්ඩා වියඤ්චෙව, භොගගාමසමායුතං;

පිට්ඨසප්පිනමන්ධානං, සාලායො ච තහිං තහිං.

20. පොත්ථකෙසු ලිඛාපෙත්වා, අට්ටෙ සම්මා විනිච්ඡිතෙ;

රාජගෙහෙ ඨපාපෙසි, උක්කොටනභයෙන සො.

21. නාගවඩ්ඪනනාමස්ස, භොගගාමෙ බහූ අදා;

ලෙඛෙ’පුබ්බෙ න වාරෙත්වා, පාලෙත්වා පුබ්බසාසනං.

22. පිතරා ච මහාදානං, පුඤ්ඤමඤ්ඤම්පි වා කතං;

සබ්බං තමවිනාසෙත්වා, නිච්චං සො රක්ඛි සාදරො.

23. මහෙසී ච මහාරඤ්ඤො, පුඤ්ඤානි බහුකාරයි;

කණ්ටකං චෙතියං කාසි, දෙවී චෙතියපබ්බතෙ.

24. කාරෙත්වා ජයසෙනඤ්ච, පබ්බතං ගාමිකස්සදා;

භික්ඛුසඞ්ඝස්ස සා ගාමං, මහුම්මාරඤ්ච තස්ස දා.

25. සිලාමෙඝව්හයං කත්වා, භික්ඛුනීනමුපස්සයං;

සිලාමෙඝව්හයෙ දාසි, භික්ඛුනීනඤ්ච පච්චයෙ.

26. ගාමායෙ’සුං පුරාකීතා, විහාරො තත්ථ සාධනං;

දත්වා තෙ මෙ චයිත්වාන, විහාරස්සෙව දාපයි.

27. ඡාදයිත්වා මහාරුක්ඛෙ, සබ්බෙ චෙතියපබ්බතෙ;

නානාරාගෙ ධජෙ චෙව, පටාකායො ච පූජයි.

28. පුබ්බාරාමකභාගම්පි, පාසාදං පටිසඞ්ඛරි;

උස්සානවිට්ඨිං දුබ්භොගං, සුභොගං තස්ස කාරයි.

29. විහාරං ගිරිභණ්ඩඤ්ච, නට්ඨං පාකතිකං කරි;

භොගගාමෙ ච දාපෙසි, භික්ඛූනං තන්නිවාසිනං.

30. අම්බුය්‍යානම්හි ආවාසං, කත්වා දප්පුළපබ්බතං;

භික්ඛූනං තිසතස්සා’දා, සම්පන්නචතුපච්චයං.

31. කාරෙත්වා නීලගල්ලඤ්ච, ආරාමං සො මනොරමං;

දකවාරං බහුප්පාදං, තස්ස දාපෙසි කාරිය.

32. අරිකාරි විහාරෙ ච, පටිසඞ්ඛාසි ජිණ්ණකං;

සලාකග්ගඤ්ච පාසාදං, අපුබ්බංයෙව කාරයි.

33. වාහදීපෙ සකාරෙසි, සෙනග්ගබොධිපබ්බතං;

ධම්මං තීසු නිකායෙසු, වාචයිත්ථ බහුස්සුතෙ.

34. ගණ්හාපෙසි ච භික්ඛූනං, අයොපත්තෙසු ගණ්ඨිකෙ;

පුඤ්ඤන්ති වුත්තං සබ්බං සො, න කිඤ්චි පරිවජ්ජයි.

35. කුලීනානමනාථානං, ඉත්ථීනං’දා පිළන්ධනං;

භොජනං භොජනත්ථීනං, බහු සො දාසි රත්තියං.

36. ගුන්නං සස්සානි පාදාසි, කාකාදීනඤ්ච භත්තකං;

තණ්ඩුලඤ්ච කුමාරානං, මධුඵාණිතසංයුත්තං.

37. එවං පුඤ්ඤානි කත්වාන, නරින්දො සො සපාරිසො;

භුත්වා පඤ්චසු වස්සෙසු, මෙදිනිං සම්පරිච්චජි.

38. තතො තස්ස සුතො ආසි, සීහළානං රථෙසතො;

සබ්බරූපගුණොපෙතො, මහින්දො නාම ඛත්තියො.

39. සො ධම්මිකසීලාමෙඝො, ඉච්චාසි ධරණීතලෙ;

ධම්මදීපො ධම්මධජො, සුද්ධධම්මපරායනො.

40. පුබ්බකෙහි නරින්දෙහි, කතං ධම්මපථානුගං;

සබ්බං කාසි අහාපෙත්වා, අධම්මං තු විවජ්ජයි.

41. රාජාරතනපාසාදෙ, කාතුං සො නවකම්මකං;

සබ්බකාලෙසු දාපෙසි, ගෙට්ඨුම්බදකවාරකං.

42. ජිණ්ණඤ්ච පටිසඞ්ඛාසි, පුඤ්ඤකම්මමකාසි ච;

රජ්ජං කත්වාන චතූසු, වස්සෙසු නිධනං ගතො.

43. අග්ගබොධි තතො රාජා, ඡත්තං උස්සාපයි පුරෙ;

කාරෙන්තො සබ්බසත්තානං, හිතං සුඛමසෙසතො.

44. ධාතුපූජං සකාරෙසි, සත්ථුසබ්බගුණාරහං;

පිතාමහකතස්සා’පි, සම්බුද්ධස්ස මහාමහං.

45. උදයග්ගාදිබොධිඤ්ච, පරිවෙණං සකාරයි;

නාමං ගහෙත්වා පිතුනො, අත්තනො ච නරාධිපො.

46. සභොගං පරිවෙණඤ්ච, කත්වා තං භූතනාමකං;

සකාචරියකස්සා’දා, භික්ඛූනං තිසතස්ස ච.

47. රාජසාලාය දාපෙසි, චූළවාපියගාමකං;

ගාමද්වයඤ්ච දාපෙසි, කාළූලමල්ලවාතකෙ.

48. පවෙසං විනිවාරෙසි, උපොසථදිනෙසු සො;

මච්ඡමංසසුරාදීනං, අන්තොනගරමත්තනො.

49. භික්ඛූ වා චෙතියෙ වා සො, වන්දිත්වා නික්ඛමං තතො;

වාලුකා හා විනස්සන්තු, ඉති පාදෙසු වොධයී.

50. යං යං සොවග්ගියං කම්මං, කම්මං නිස්සරණවහං;

වත්ථුත්තයෙ පසන්නො සො, කම්මං තං සබ්බමාචරි.

51. මාතුපට්ඨානනිරතො, රත්තින්දිවමහොසිසො;

ගන්ත්වා තස්සා උපට්ඨානං, පාතොව කිර භූපති.

52. සීසං තෙලෙන මක්ඛෙත්වා, උබ්බට්ටෙත්වාන ජල්ලිකං;

නඛෙ විසුද්ධෙ කත්වාන, නහාපෙත්වාන සාදරං.

53. අච්ඡාදෙත්වා නවං වත්ථං, සුඛසම්ඵස්සමත්තනො;

වත්ථං ඡඩ්ඩිතමාදාය, පෙල්ලෙත්වා සයමෙව තං.

54. තස්ස තොයෙන සිඤ්චිත්වා, සීසං සමකුටං සකං;

ගන්ධමාලාහි තං සම්මා, චෙතියං විහ පූජිය.

55. නමස්සිත්වාන තික්ඛත්තුං, කත්වා තං සො පදක්ඛිණං;

දාපෙත්වා පරිසාය’ස්සා, වත්ථාදීනි යථාරුචිං.

56. සහත්ථෙනෙව භොජෙත්වා, භොජනං තං මහාරහං;

භුත්ථාවසෙසං භුඤ්ජිත්වා, සමාකිරියමත්ථකෙ.

57. භොජෙත්වා පරිසං තස්සා, රාජභොජනමුත්තමං;

සජ්ජෙත්වා වාසගෙහඤ්ච, සුගන්ධපරිවාසිතං.

58. සහත්ථා පඤ්ඤපෙත්වාන, සයනං තත්ථ සාධුකං;

පාදෙ ධොවිය මක්ඛෙත්වා, ගන්ධතෙලෙන සණ්හකං.

59. සම්බාහෙන්තො නිසීදිත්වා, කත්වා නිද්දමුපෙතකං;

කත්වා පදක්ඛිණං මඤ්චං, තික්ඛත්තුං සාධුවන්දිය.

60. ආරක්ඛකෙ නියොජෙත්වා, දාසෙකම්මකරෙපි ච;

තස්සා පිට්ඨිමකත්වාන, අපක්කමෙව පිට්ඨිතො.

61. ඨත්වා අදස්සනෙ ඨානෙ, තික්ඛත්තුං පුන වන්දිය;

සන්තුට්ඨො තෙන කම්මෙන, සරන්තො තං පුනප්පුනං.

62. ගෙහං යාති සජීවන්තං, එවමෙව උපට්ඨහි;

එකදා දාසවාදෙන, වන්දිත්වා දාසමත්තනො.

63. තෙනත්තනො කථාපෙසි, ඛමාපෙතුං සයං වචො;

අත්තානං භික්ඛුසඞ්ඝස්ස, දාපයිත්වාන මාතරා.

64. ධනමත්ථග්ඝනං ඤත්වා, භුජිස්සො ආසි බුද්ධිමා;

එවං පුඤ්ඤපරො හුත්වා, කත්වා දීපස්ස සඞ්ගහං.

65. එකාදසහි වස්සෙහි, දෙවලොකමුපාගමි;

තස්සානුජො දප්පුළො’ථ, රාජා හොසි තදච්චයෙ.

66. සබ්බං පුබ්බකරාජූනං, චරියං සො සමාචරි;

තදා මහින්දනාමස්ස, පුත්තාරොහණසාමිනො.

67. පිතරා නිහටා’ගඤ්ඡුං, රාජානං මාතුලං සකං;

සො තෙ දිස්වා පවත්තිං තං, සුත්වා දත්වා මහාබලං.

68. පාහෙසි පිතරා යුද්ධං, කාතුං බන්ධු හිතෙ රතෙ;

මහින්දොපි තථාභාවං, විදිත්වා රොහණාධිපො.

69. යුද්ධං පටිපදෙයෙව, තෙසං’කාසි මහාබලො;

තෙ උභොපි පලායිංසු, දත්වා සෙනාය නායකං.

70. පුනාගන්ත්වා මහීපාලං, සෙවමානා ඉධා’වසුං;

පිතාපි තෙන සන්තුට්ඨො, අඤ්ඤෙන සකබන්ධුනා.

71. යුජ්ඣන්තො මරණං ගඤ්ඡි, ඤාතිසොපි මතො කිර;

තදා’දා භාගිනෙය්‍යස්ස, රාජා කිත්තග්ගබොධිනො.

72. සබ්බරූපගුණොපෙතං, ධිතරං දෙව නාමිකං;

සො දප්පුළං ඨපෙත්වාන, සෙවත්ථං තස්ස රාජිනො.

73. සයං සෙනඞ්ගමාදාය, රොහණං සමුපාගමි;

රොහණාධිපති හුත්වා, සබ්බාකාරසමප්පිතො.

74. පුත්තධීතාහි වඩ්ඪෙන්තො, වාසං තත්ථෙව කප්පයි;

රාජාකාසි දුමින්දස්ස, ඝරං ජිණ්ණං නවං ථිරං.