අට්ඨචත්තාලීසතිම පරිච්ඡෙද

එකරාජකො

1. තතො තස්සා’නුජො සෙනො, ඡත්තං උස්සාපයී පුරෙ;

පියං’ව පුත්තං පස්සන්තො, සත්තෙ සබ්බෙ මහාධනො.

2. චරියං පුබ්බරාජූනං, සමාචරි යථාභතං;

අපුබ්බම්පි ච වත්තෙසි, චරියං ධම්මසංහිතං.

3. භික්ඛූනං භික්ඛූනීනඤ්ච, ඤාතීනං දීපවාසිනං;

මච්ඡානං මිගපක්ඛීනං, කත්තබ්බං ස සමාචරි.

4. මහින්දං පරතීරං සො, ගතං යොජියමාරයි;

එවං සො සුවිසොධෙසි, රජ්ජපච්චත්ථිකෙ’ඛිලෙ.

5. මහාදානං පවත්තෙසි, යාචකානං ධනෙසිනං;

භික්ඛූනං බ්‍රාහ්මණානඤ්ච, මනුඤ්ඤං රාජභොජනං.

6. අහෙසුං අනුජාතස්ස, මහින්දො කස්සපො තථා;

උදයොති තයො තෙසු, මහින්දො යුවරාජකො.

7. හුත්වා තස්සානුවත්තන්තො, සක්කච්චං තමුපට්ඨහි;

සඞ්ඝානාමාසි රාජස්ස, භරියා තස්ස රාජිනී.

8. කීළනත්ථං සමුද්දස්ස, ගතෙ රාජිනි පට්ටනං;

උදයො ආදිපාදොසො, ඔහීනො නගරෙ තදා.

9. නාලනාමං ගහෙත්වාන, ධීතරං මාණිලානියා;

රක්ඛිතං රාජරක්ඛාය, පුළත්ථිනගරං අගා.

10. රාජා තස්මිං අකුජ්ඣිත්වා, සන්ධිං කත්වා අකුප්පියං;

මහාදීපාදං පෙසෙත්වා, තොසත්වා තං ඉධානයි.

11. එවං සමග්ගා තෙ ආසුං, තතො පට්ඨාය ඛත්තියා;

රක්ඛන්තා සාසනං ලොකං, වසිංසු සුසමාහිතා.

12. තතො කෙනචි කාලෙන, පණ්ඩුරාජා මහාබලො;

ජම්බුදීපා ඉධා’ගම්ම, දීප ගණ්හිතුමාරභි.

13. රාජා සුත්වා මහාසෙනං, පෙසුයිත්ථ තදන්තිකං;

අමච්චානං විවාදෙන, ථද්ධොතාරො නාරාධිපො.

14. පණ්ඩුරාජා විනාසෙන්තො, සබ්බං තං දෙසමුත්තරං;

ඛන්ධාවාරං නිවෙසෙසි, මහාතාලිතගාමකෙ.

15. වසන්තා දමිළා එත්ථ, බහවො යෙ තහිං තහිං;

සබ්බෙ තං පක්ඛියාහෙසුං, තතො සො බලවා අහු.

16. තත්ථ ගන්තා මහාසෙනා, රඤ්ඤො යුජ්ඣිතුමාරභි;

හත්ථික්ඛන්ධගතො පණ්ඩු-රාජාපි සමුපාවිසි.

17. අහු දමිළසෙනාසා, පස්සන්ති සාමිනො මුඛං;

සම්පත්තබලහුස්සාහා, තදත්ථෙ චත්තජීවිතා.

18. දීපසෙනා තු සාමින-මභාවෙන නිරුස්සුක්කා;

යුජ්ඣන්ති පරිභින්දිත්වා, පලායිත්ථ තතො තතො.

19. ඔතරිත්ථමහාසෙනා, පණ්ඩුරාජාස්ස තඞ්ඛණෙ;

මාරසෙනාව ගච්ඡන්ති, විචුණ්ණෙන්ති මහාජනං.

20. රාජා සෙනාය භින්නත්තං, සුක්කා සබ්බං සමාදිය;

හත්ථසාරං පුරං හිත්වා, මලයාභිමුඛො ගතො.

21. තතො හත්ථිං සමාරුය්හ, යුවරාජා මහින්දකො;

යුජ්ඣන්තො සකසෙනාය, පලාතත්තං සමෙක්ඛිය.

22. එකෙනමෙ න සක්කා වෙ, සබ්බෙ එතෙහි මාරිතුං;

එතෙසං න ච නීචානං, හත්ථෙසු මරණං සුඛං.

23. තස්මා වරං මෙ මරණං, මයා එවෙති චින්තිය;

හත්ථික්ඛන්ධගතොයෙව, ඡින්දි සො සීසමත්තනො.

24. තං දිස්වා බහවො සීසෙ, තත්ථ ඡින්දිංසු සෙවකා;

තං දිස්වා දමිළී සෙනා, හට්ඨතුට්ඨා පමොදිසා.

25. එතං සබ්බං සමෙක්ඛිත්වා, ආදාපාදො සකස්සපො;

තුරඞ්ගවරමාරුය්හ, සුසන්නද්ධො මහායුධො.

26. විහාරමුපසඞ්කම්ම, අභයං එකකොව සො;

තාදිසම්පි මහාසෙනං, ඔගාහෙත්වා විදාරයි.

27. සුපණ්ණො විය ගණ්හන්තො, භූජගෙන සලිලාල යෙ;

සො තං සබ්බං නිවත්තෙසි, අත්තානඤ්ච සුගොපයි.

28. අස්සො එකොව දිස්සිත්ථ, තුරඞ්ගාවලිසන්නිභො;

අත්තනො සො ජනං කඤ්චි, අපස්සන්තො’නුගාමිනං.

29. කිං මෙ එකෙන වෙරිනං, පූරිතෙන මනොරථං;

කාලන්තරෙහං ජීවන්තො, පූරෙස්සං මෙ මනොරථං.

30. තස්මා ගන්තුංව යුත්තන්ති, නිම්ඵොටෙත්වා මහාබලං;

නිබ්භයොව මහායොධො, කොණ්ඩිවාතමුපාගමි.

31. පණ්ඩුරාජා මහාසෙනා, අග්ගහෙසි තතො පුරං;

සීසං තං යුවරාජස්ස, පණ්ඩුරාජස්ස දස්සයුං.

32. සො තං දිස්වා ච ඣාපෙත්වා, රාජූනං පණ්ඩුදෙසිනං;

සබ්බමාළාහනෙ කිච්චං, තස්ස කාතුං නියොජයි.

33. සබ්බං සාරං හරාපෙසි, භණ්ඩාගාරම්හි රාජිනො;

අග්ගණ්හිත්ථ ගහෙතබ්බං, විහාරෙ නගරෙපි ච.

34. පාසාදෙ රතනෙ සබ්බෙ, සොවණ්ණංසත්ථුබිම්බකං;

සිලාමය මුනින්දස්ස, චක්ඛුභූක මණිද්වයං.

35. තථා සොවණ්ණපට්ටෙ ච, ථූපාරාමම්හි චෙතියෙ;

සුවණ්ණ පටිමායො ච, විහාරෙසු තහිං තහිං.

36. සබ්බං ගහෙත්වා නිස්සාරං, ලඞ්කාදීප මකාසි සො;

ඡඩ්ඩයිත්ථ පුරං රම්ම, යක්ඛභක්ඛිත රූපකං.

37. රාජා’පි රක්ඛං දත්වාන, මහාමග්ගෙ තහිං තහිං;

ගඞ්ගාද්වය මුඛෙ වාසං, කප්පෙසි පරිසඞ්කිතො.

38. පණ්ඩුරාජා තතො සද්ධිං, කාතුං සීහළසාමිනා;

අමච්චෙ තත්ථ පෙසෙසි, දිස්වා තෙ සීහලාධිපො.

39. සුණිත්වා සාසනං තෙසං, සබ්බං තං සම්පටිච්ඡිය;

දූතානං කාරයිත්වාන, යථාකාමෙන සඞ්ගහං.

40. හත්ථිද්වයං සදත්වාන, සබ්බමාභරණම්පි ච;

තස්ස පෙසෙසි දූතෙසො, අත්තනොපි හිතාවහෙ.

41. පණ්ඩුරාජා සිතං සබ්බං, දිස්වා සන්තුට්ඨමානසො;

නිය්‍යාතෙත්වාන දූතානං, තදහෙව මහාපුරං.

42. නික්ඛමිත්වා පුරා ගන්ත්වා, න චිරෙනෙව පට්ටනං;

තත්ථ ආරුය්හ නාවං සො, සක දෙස මුපාගමි.

43. තතො ආගම්ම නගරං, සීලාමෙඝො මහීපති;

යථාඨානෙ ඨපෙත්වාන, දීපං වසි සමාහිතො.

44. භාතරං දුතියං කත්වා, උදයං නාම ඛත්තියං;

මහාදීපාදං තස්සා’දා, සොගත්ථං දක්ඛිණං දිසං.

45. සොපි ඛො න චිරෙනෙව, කත්වා පුඤ්ඤං යථාරහං;

රොගෙනෙකෙන සම්ඵුට්ඨො, පවිට්ඨො මච්චුනො මුඛං.

46. කස්සපො ආදිපාදොපි, පුලත්ථිනගරෙ වසං;

යොජෙත්වා පණ්ඩුරාජෙන, අහොසි කිර මාරිතො.

47. තදා කස්සපනාමස්ස, පුත්තා ආසුං මහාරහා;

ආදිපාදස්ස චත්තාරො, ධඤ්ඤලක්ඛණ සඤ්ඤුතා.

48. යො සෙනං සබ්බපඨමො, සෙනො නාම කුමාරකො;

සූරො වීරො මහුස්සාහො, රාජභාරක්ඛමො සමො.

49. රාජා මහාදීපාදත්තං, තස්ස දත්වා යථාවිධිං;

භොගත්ථං දක්ඛිණං දෙසං, සවාහන මුපාදිසි.

50. රොහණාධිපතිස්සා’සුං, පුත්තා කිත්තග්ගබොධිතො;

චත්තාරො ධීතරො තිස්සො, දස්සනෙය්‍යා මනොරමා.

51. තදා ජෙට්ඨසුතං තස්ස, මහින්දං නාම ඛත්තියං;

පිතුච්ඡා මාරයිත්වාන, දෙසං ගණ්හි සසාධනං.

52. භාතරො තෙ තයො තස්මිං,

සංරුට්ඨා භාතු ඝාතනෙ;

ආදාය භගීනී තිස්සො,

රඤ්ඤො සන්තිකමාගමුං.

53. රාජාපි දිස්වා තෙතීව, මමායන්තො දයාලුකො;

සබ්බෙ දෙවකුමාරෙව, සුඛං වඩ්ඪෙසි පෙමවා.

54. තතො කස්සපනාමං සො, තෙසං ජෙට්ඨං නරිස්සරො;

දෙසං තං ගණ්හ යාහීති, දත්වා බලමපෙසයි.

55. සො’පි ගන්ත්වාන තං හන්ත්වා, රොහණං කසිණම්පි තං;

කත්වා හත්ථගතං තත්ථ, වසිත්ථ නිරුපද්දවො.

56. අථ සො භාතරො ද්වෙ’පි, සෙනඤ්ච උදයං තථා;

පක්කොසිත්වාන, භාජෙත්වා, දෙසං තෙහි සහාවසි.

57. රාජා තා සාධු වඩ්ඪෙත්වා, වයපත්තාසු තීසු සො;

රාජකඤ්ඤාසු ධඤ්ඤාසු, දෙවච්ඡරසූ රූපිසු.

58. ඨපෙත්වා රාජිනි ඨානෙ, උපරාජස්ස දාපයි;

සඞ්ඝනාමං මහාභොගං, දත්වා රජ්ජසරික්ඛකං.

59. කණිට්ඨො උපරාජස්ස, මහින්දො නාම භාතුකො;

අත්ථි සබ්බගුණොපෙතො, සබ්බසත්ථවිසාරදො.

60. තස්සා’දාසි දුවෙ රාජා, රාජකඤ්ඤා මනොහරා;

තිස්සව්හකිත්ත නාමඤ්ච, දත්වා භොගං යථාරුචිං.

61. එවං කරොන්තො ඤාතීනං, සංගහං සො යථාරහං;

ආරාධෙන්තො ච දානාදි-සඞ්ගහෙහි මහාජනං.

62. රාජා දසයි රාජූනං, ධම්මෙහි සමුපාගතො;

සමාචරන්තො පුඤ්ඤානි, පරිභුඤ්ජිත්ථ මෙදිනිං.

63. පංසුකූලික භික්ඛූනං, කත්වා’රිට්ඨම්හි පබ්බතෙ;

මහාභොගං අදාරාමං, නිම්මිතං විය ඉද්ධියා.

64. පරිහාරඤ්ච තස්සදා, රාජාරහමසෙසතො;

ආරාමිකෙ ච බහවො, දාසෙ කම්මකරෙපි ච.

65. පාසාදං සොව කාරෙසි, විහාරෙ ජෙතනාමකෙ;

අනෙකභූමිං භූමින්දො, බුද්ධභූමිගතාසයො.

66. වඩ්ඪෙත්වා තත්ථ කාරෙත්වා, සබ්බ සොවණ්ණයං ජිනං;

සණ්ඨපෙත්වා මහාභොගං, වසාපෙසි ච භික්ඛවො.

67. මහාදි පරිවෙණම්හි, කාරෙසි සුමනොහරං;

පාසාද මග්ගිසන්දංඩ්ඪං, තස්මිංයෙව විහාරකෙ.

68. කත්වා වීරඞ්කුරාරාමං, විහාරෙ අභයුත්තරෙ;

මහාසඞ්ඝික භික්ඛූනං, ථෙරියානඤ්ච දාපයි.

69. පුබ්බාරාමඤ්ච කාරෙසි, සම්පන්න චතුපච්චයං;

සද්ධිං සො සඞ්ඝනාමාය, දෙවියාපි ච අත්තනො.

70. මහාවිහාරෙතායෙව, සද්ධිං කාරෙසි භූමිපො;

ආවාසං සඞ්ඝසෙනව්හං, මහාභොගං මහාමති.

71. කාරෙත්වා සබ්බසොවණ්ණං, කෙසධාතු කරණ්ඩකං;

මහාපූජං පවත්තෙසි, රජ්ජං විස්සජ්ජි උත්තමො.

72. චෙතියස්ස ගීරිස්සාදා, කාණවාපිං බහුදයං;

භික්ඛූනං දිපවාසීනං, දාපෙසි ච තිචීවරං.

73. පුලත්ථි නගරෙ කාසි, වාපියො ථුසවාපියා;

සෙනග්ගබොධිමාවාසං, ගාමාරාමික සඤ්ඤුතං.