තතිය පරිච්ඡෙද

පඨමධම්මසංගීති

1. පඤ්චනෙත්තො ජිනො පඤ්ච-චත්තාලීසසමා’සමො;

ඨත්වා සබ්බානි කිච්චානි, කත්වා ලොකස්ස සබ්බථා.

2. කුසිනාරායයමක-සාලානමන්තරෙ වරෙ;

වෙසාඛපුණ්ණමායං සො, දීපො ලොකස්ස නිබ්බුතො.

3. සඞ්ඛ්‍යාපථමතික්කන්තා, භික්ඛූ තත්ථ සමාගතා;

ඛත්තියා බ්‍රාහ්මණා වස්සා, සුද්ධා දෙවා තථෙව ච.

4. සත්තසතසහස්සානි, තෙසු පාමොක්ඛභික්ඛවො;

ථෙරො මහාකස්සපොව, සඞ්ඝත්ථෙරො තදා අහු.

5. සත්ථුසරීරසාරීර-ධාතුකිච්චානි කාරිය;

ඉච්ඡන්තො සො මහාථෙරො, සත්ථු ධම්මචිරට්ඨිතිං.

6. ලොකනාථෙ දසබලෙ, සත්තාහපරිනිබ්බුතෙ;

දුබ්භාසිතං සුභද්දස්ස, බුද්ධස්ස වචනං සරං.

7. සරං චීවරදානඤ්ච, සමත්තෙ ඨපනං තථා;

සද්ධම්මඨපනත්ථාය, මුනිනා’නුග්ගහං කතං.

8. කාතුං සද්ධම්මසංගීතිං, සම්බුද්ධානමතෙ යති;

නවඞ්ගසාසනධරෙ, සබ්බඞ්ගසමුපාගතෙ.

9. භික්ඛූ පඤ්චසතෙයෙව, මහාඛීණාසවෙ වරෙ;

සම්මන්නි එකෙනූනෙ තු, ආනන්දත්ථෙරකාරණා.

10. පුන ආනන්දත්ථෙරා’පි, භික්ඛූහි අභියාචිතො;

සම්මන්නි කාතුං සංගීතිං, සා න සක්කා හි තං විනා.

11. සාධුකීළනසත්තාහං, සත්තාහං ධාතුභාජනං;

ඉච්චද්ධමාසං ඛෙපෙත්වා, සබ්බලොකානුකම්පකා.

12. වස්සං වසං රාජගහෙ, කස්සාම ධම්මසඞ්ගහං;

නාඤ්ඤෙහි තත්ත වත්ථබ්බ-මිති කත්වාන නිච්ඡයං.

13. සොකාතුරං තත්ථ තත්ථ, අස්සාසෙන්තො මහාජනං;

ජම්බුදීපම්හි තෙ ථෙරා, විචරිත්වාන චාරිකං.

14. ආසළ්හිසුක්කපක්ඛම්හි, සුක්කපක්ඛඨිතත්ථිකා;

උපාගමුං රාජගහං, සම්පන්නචතුපච්චයං.

15. තත්ථෙව වස්සූපගතා, තෙ මහාකස්සපාදයො;

ථෙරා ථිරගුණූපෙතා, සම්බුද්ධමතකොවිදා.

16. වස්සානං පඨමං මාසං, සබ්බසෙනාසනෙසු’පි;

කාරෙසුං පටිසඞ්ඛාරං, වත්වානා’ජාතසත්තුනො.

17. විහාරපටිසඞ්ඛාරෙ, නිට්ඨිතෙ අහු භූපති;

ඉදානි ධම්මසංගීතිං, කරිස්සාමි මයං ඉති.

18. කත්තබ්බං කින්තිපුට්ඨස්ස, නිසජ්ජඨානමාදිසුං;

රාජා කත්ථාති පුච්ඡිත්වා, වුත්තඨානම්හි තෙහි සො.

19. සීඝං වෙභාරසෙලස්ස, පස්සෙ කාරෙසි මණ්ඩපං;

සත්තපණ්ණිගුහාද්වාරෙ, රම්මං දෙවසභොපමං.

20. සබ්බථා මණ්ඩයිත්වා තං, අත්ථරාපෙසි තත්ථ සො;

භික්ඛූනං ගණනායෙව, අනග්ඝත්ථරණානි ච.

21. නිස්සාය දක්ඛිණං භාගං, උත්තරාමුඛමුත්තමං;

ථෙරාසනං සුපඤ්ඤත්තං, ආසි තත්ථ මහාරහං.

22. තස්මිං මණ්ඩපමජ්ඣස්මිං, පුරත්ථමුඛමුත්තමං;

ධම්මාසනං සුපඤ්ඤත්තං, අහොසි සුගතාරහං.

23. රාජා’රොචයි ථෙරානං, කම්මං නො නිට්ඨිතං ඉති;

තෙ ථෙරා ථෙරමානන්ද-මානන්දකරමබ්‍රවුං.

24. ස්වෙ සන්නිපාතො ආනන්ද, සෙඛෙන ගමනං තහිං;

න යුත්තන්තෙ සදත්ථෙ ත්වං, අප්පමත්තො තතො භව.

25. ඉච්චෙවං චොදිතො ථෙරො, කත්වාන වීරියං සමං;

ඉරියාපථතො මුත්තං, අරහත්තමපාපුණි.

26. වස්සානං දුතියෙ මාසෙ, දුතියෙ දිවසෙ පන;

රුචිරෙ මණ්ඩපෙ තස්මිං, ථෙරා සන්නිපතිංසු තෙ.

27. ඨපෙත්වා’නන්දත්ථෙරස්ස, අනුච්ඡවිකමාසනං;

ආසනෙසු නිසීදිංසු, අරහන්තො යථාරහං.

28. ථෙරො’රහත්තපත්තිං සො, ඤාපෙතුං තෙහි නාගමා;

කුහිං ආනන්දත්ථෙරො’ති, වුච්චමානෙ තු කෙහිචි.

29. නිම්මුජ්ජිත්වා පථවියා, ගන්ත්වා ජොතිපථෙන වා;

නිසීදි ථෙරො ආනන්දො, අත්තනො ඨපිතාසනෙ.

30. උපාලිථෙරො විනයෙ, සෙසධම්මෙ අසෙසකෙ;

ආනන්දත්ථෙරමකරුං, සබ්බෙ ථෙරා ධුරන්ධරෙ.

31. මහාථෙරො සකත්තානං, විනයං පුච්ඡිතුං සයං;

සම්මන්නු’පාලිථෙරො ච, විස්සජ්ජෙතුං තමෙව තු.

32. ථෙරාසනෙ නිසීදිත්වා, විනයං තමපුච්ඡි සො;

ධම්මාසනෙ නිසීදිත්වා, විස්සජ්ජෙසි තමෙව සො.

33. විනයඤ්ඤූනමග්ගෙන, විස්සජ්ජිතකමෙන තෙ;

සබ්බෙ සජ්ඣායමකරුං, විනයං නයකොවිදා.

34. අග්ගං බහුස්සුතාදීනං, කොසාරක්ඛං මහෙසිනො;

සම්මන්නිත්වාන අත්තානං, ථෙරො ධම්මමපුච්ඡි සො.

35. තථා සම්මන්නිය’ත්තානං, ධම්මාසනාගතො සයං;

විස්සජ්ජෙසි තමානන්ද-ත්ථෙරො ධම්මමසෙසතො.

36. වෙදෙහමුනිනා තෙන, විස්සජ්ජිතකමෙන තෙ;

සබ්බෙ සජ්ඣායමකරුං, ධම්මං ධම්මත්ථකොවිදා.

37. එවං සත්තහි මාසෙහි, ධම්මසංගීති නිට්ඨිතා;

සබ්බලොකහිතත්ථාය, සබ්බලොකහි තෙහි සා.

38. මහාකස්සපථෙරෙන, ඉදං සුගතසාසනං;

පඤ්චවස්සසහස්සානි, සමත්ථං වත්තනෙ කතං.

39. අතීව ජාතපාමොජ්ජා, සන්ධාරකජලන්තිකා;

සංගීතිපරියොසානෙ, ඡද්ධාකම්පි මහාමහී.

40. අච්ඡරියානි චා’හෙසුං, ලොකෙනෙකානිනෙකධා;

ථෙරෙහෙව කතත්තා ච, ථෙරියායං පරම්පරා.

41. පඨමං සඞ්ගහං කත්වා, සබ්බලොකහිතං බහුං;

තෙ යාවතායුකං ඨත්වා, ථෙරා සබ්බෙපි නිබ්බුතා.

42. ථෙරා’පි තෙ මතිපදීපහතන්ධකාරා,

ලොකන්ධකාරහනනම්හි මහාපදීපා;

නිබ්බාපිතා මරණඝොරමහානිලෙන,

තෙනාපි ජීවිතමදං මතිමා ජහෙය්‍යාති.

සුජනප්පසාදංසංවෙගත්ථාය කතෙ මහාවංසෙ

පඨමධම්මසංගීතිනාම

තතියො පරිච්ඡෙදො.