චතුත්ථ පරිච්ඡෙද

දුතිය සංගීති

1. අජාතසත්තු පුත්තො තං, ඝාතෙත්වා’දායි භද්දකො;

රජ්ජං සොළසවස්සානි, කාරෙසි මිත්තදූභිකො.

2. උදයභද්ද පුත්තො තං, ඝාතෙත්වා අනුරුද්ධකො;

අනුරුද්ධස්ස පුත්තො තං, ඝාතෙත්වා මුණ්ඩනාමකො.

3. මිත්තද්දුනො දුම්මතිනො, තෙ’පි රජ්ජමකාරයුං;

තෙසං උභින්නං රජ්ජෙසු, අට්ඨවස්සාන’තික්කමුං.

4. මුණ්ඩස්ස පුත්තො පිතරං, ඝාතෙත්වා නාගදාසකො;

චතුවීසතිවස්සානි, රජ්ජං කාරෙසි පාපකො.

5. පිතුඝාතකවංසො’ය, මීතිකුද්ධා’ථ නාගරා;

නාගදාසක රාජානං, අපනෙත්වා සමාගතා.

6. සුසුනාගොති පඤ්ඤාතං, අමච්චං සාධුසම්මතං;

රජ්ජෙ සමභිසිඤ්ජිංසු, සබ්බෙසං හිතමානසා.

7. සො අට්ඨාරසවස්සානි, රාජා රජ්ජමකාරයි;

කාළාසො කො තස්ස පුත්තො, අට්ඨවීසති කාරයි.

8. අතීතෙ දසමෙ වස්සෙ, කාළාසොකස්ස රාජිනො;

සම්බුද්ධපරිනිබ්බානා, එවං වස්සසතං අහු.

9. තදා වෙසාලියා භික්ඛූ, අනෙකා වජ්ජිපුත්තකා;

සිඞ්ගීලොණං ද්වඞ්ගුලඤ්ච, තථා ගාමන්තරම්මි ච.

10. ආවාසා’නුමතා’චිණ්ණං, අමථිතං ජලොගි ච;

නිසීදනං අදසකං, ජාතරූපාදිකං ඉති.

11. දසවත්ථූනි දීපෙසුං, කප්පන්තීති අලජ්ජීනො;

තං සුත්වාන යසත්ථෙරො, එවං වජ්ජීසු චාරිකං.

12. ඡළභිඤ්ඤො බලප්පත්තො, යසො කාකණ්ඩකත්‍රජො;

තං සමෙතුං සඋස්සාහො, තත්ථාගමි’මහාවනං.

13. ඨපෙත්වා’පොසථග්ගෙ තෙ, කංසපාතිං සහොධකං;

කහාපණාදිං සඞ්ඝස්ස, දෙථ’නා’හු උපාසකෙ.

14. න කප්පතෙ තං මා දෙථ, ඉති ථෙරො සවාරයි;

පටිසාරණීයං කම්මං, යසත්ථෙරස්ස තෙ කරුං.

15. යාචිත්වා අනුදූතං සො, සහ තෙන පුරං ගතො;

අත්තනො ධම්මවාදිත්තං, සඤ්ඤාපෙත්වා’ග සාගරෙ.

16. අනුදූතවචො සුත්වා, තමුක්ඛිපිතුමාගතා;

පරික්ඛිපිය අට්ඨංසු, සරං ථෙරස්ස භික්ඛවො.

17. ථෙරො උග්ගම්ම නභසා, ගන්ත්වා කොසම්බියං තතො;

පාවෙය්‍යකා වන්තිකානං, භික්ඛූනං සන්තිකං ලහුං.

18. වෙසෙසි දූතෙතු සයං, ගන්ත්වා’හො ගඞ්ගපබ්බතං;

ආහ සම්භූතත්ථෙරස්ස, තං සබ්බං සාණවාසිනො.

19. පාවෙය්‍යකා සට්ඨිථෙරා, අසිතා’වන්තිකාපි ච;

මහාඛීණාසවා සබ්බෙ, අහොගඞ්ගම්හි ඔතරුං.

20. භික්ඛවො සන්නිපතිතා, සබ්බෙ තත්ථ තතො තතො;

ආසුං නවුතිසහස්සානි, මන්තෙත්වා අඛිලා’පි තෙ.

21. සොරෙය්‍ය රෙවතත්ථෙරං, බහුස්සුත මනාසවං;

තං කාලපමුඛං ඤත්වා, පස්සිතුං නික්ඛමිංසු තං.

22. ථෙරො තම්මන්තනං සුත්වා, වෙසාලිං ගන්තුමෙව සො;

ඉච්ඡන්තො ඵාසුගමනං, තතො නික්ඛමි තඞ්ඛණං.

23. පාතො පාතොව නික්ඛන්ත-ට්ඨානං තෙන මහත්තනා;

සායං සායමුපෙන්තානං, සහජොතියමද්දසුං.

24. තත්ථ සම්භූතත්ථෙරෙන, යසත්ථෙරො නියොජිතො;

සද්ධම්මසවනන්තෙ තං, රෙවතථෙර මුත්තමං.

25. උපෙච්ච දසවත්ථූනි, පුච්ඡි ථෙරො පටික්ඛිපි;

සුත්වා’ධිකරණං තඤ්ච, නිසෙධෙමාති අබ්‍රවි.

26. පාපාපි පක්ඛං පෙක්ඛන්තා, රෙවතත්ථෙර මුත්තමං;

සාමණකං පරික්ඛාරං, පටියාදිය තෙ බහුං.

27. සීඝං නාවාය ගන්ත්වාන, සහජාතිසමීපගා;

කරොන්ති භත්තවිස්සග්ගං, භත්තකාලෙ උපට්ඨිතෙ.

28. සහජාතිං ආවසන්තො, සාළථෙරො විචින්තියා;

පාවෙය්‍යකා ධම්මවාදී, ඉති පස්සි අනාසවො.

29. උපෙච්ච තං මහාබ්‍රහ්මා, ධම්මෙ නිට්ඨාති අබ්‍රවි;

නිච්චං ධම්මෙ ඨිතත්තං සො, අත්තනො තස්ස අබ්‍රවි.

30. තෙ පරික්ඛාරමාදාය, රෙවතත්ථෙරමද්දසුං;

ථෙරො න ගණ්හි තප්පක්ඛ-ගාහී සිස්සං පණාමයී.

31. වෙසාලිං තෙ තතො ගන්ත්වා, තතො පුප්ඵපුරං ගතා;

වදිංසු කාළාසොකස්ස, නරින්දස්ස අලජ්ජීනො.

32. සත්ථුස්ස නො ගන්ධකුටිං, ගොපයන්තො මයං තහිං;

මහාවනවිහාරස්මිං, වසාම වජ්ජීභූමියං.

33. ගණ්හිස්සාම විහාර’න්ති, ගාමවාසිකසික්ඛවො;

ආගච්ඡන්ති මහාරාජ, මටිසෙධය තෙ ඉති.

34. රාජානං දුග්ගහිතං තෙ, කත්වා වෙසාලිමාගමුං;

රෙවතත්ථෙර මූලම්හි, සහජාතියමෙත්ථ තු.

35. භික්ඛූ සතසහස්සානි, එකාදස සමාගතා;

නවුතිඤ්ච සහස්සානි, අහු තං වත්ථු සන්තියා.

36. මූලට්ඨෙහි විනා වත්ථු-සමනං නෙව රොචයි;

ථෙරො සබ්බෙපි භික්ඛූ තෙ, වෙසාලිමාගමුං තතො.

37. දුග්ගහිතොව සො රාජා, තත්ථාමච්චෙ අපෙසයි;

මූළා දෙවානුභාවෙන, අඤ්ඤත්ථ අගමිංසු තෙ.

38. පෙසෙත්වා තෙ මහීපාලො, තං රත්තිං සුපිනෙනසො;

අපස්සි සකමත්තානං, පක්ඛිත්තං ලොහකුම්භියං.

39. අතිභීතො අහු රාජා, තමස්සා සෙතු මාගමා;

භගිනී නන්දථෙරී තු, ආකාසෙන අනාසවා.

40. භාරියං තෙ කතං කම්මං, ධම්මිකෙ’ය්‍යෙ ඛමාපය;

පක්ඛො තෙසං භවිත්වා ත්වං, කුරු සාසනපග්ගහං.

41. එවං කතෙ සොත්ථි තුය්හං, හෙස්සතීති අපක්කමි;

පසාතෙයෙව වෙසාලිං, ගන්තුං නික්ඛමි භූපති.

42. ගන්ත්වා මහාවනං භික්ඛූ-සඞ්ඝං සො සන්නිපාතිය;

සුත්වා උභින්නං වාදඤ්ච, ධම්මපක්ඛඤ්ච රොචිය.

43. ඛමාපෙත්වා ධම්මිකෙ තෙ, භික්ඛූ සබ්බෙ මහීපති;

අත්තනො ධම්මපක්ඛත්තං, වත්වා තුම්හෙ යථාරුචි.

44. සම්පග්ගහං සාසනස්ස, කරොථාති ච භාසිය;

දත්වා ච තෙසං ආරක්ඛං, අගමාසි සකං පුරං.

45. නිච්ඡෙතුං තානි වත්ථූනි, සඞ්ඝො සන්නිපතී තදා;

අනග්ගානි තත්ථ භස්සානි, සඞ්ඝමජ්ඣෙ අජායිසුං.

46. තතො සො රෙවතත්ථෙරො, සාවෙත්වා සඞ්ඝමජ්ඣගො;

උබ්භාහිකාය තං වත්ථුං, සමෙතුං නිච්ඡයං අකා.

47. පාචිනකෙච චතුරො, චතුරො පාවෙය්‍යකෙපි ච;

උබ්භාහිකාය සම්මන්නි, භික්ඛූ තං වත්ථු සන්තියා.

48. සබ්බකාමී ච සාළ්හො ච, ඛුජ්ජසොභිතනාමකො;

වාසභගාමිකො චාති, ථෙරො පාචිනකා ඉමෙ.

49. රෙවතො සාණසම්භූතො,

යසො කාකොණ්ඩකත්‍රජො;

සුමනො චාති චත්තාරො,

ථෙරා පාවෙය්‍යකා ඉමෙ.

50. සමෙතුං තානි වත්ථූනි, අප්පසද්දං අනාකුලං;

අගමුං වාලුකාරාමං, අට්ඨත්ථෙරා අනාසවා.

51. දහරෙනා’ජි තෙ නෙත්ථ, පඤ්ඤත්තෙ ආසනෙ සුභෙ;

නිසීදිංසු මහාථෙරා, මහාමුනි මතඤ්ඤුනො.

52. තෙසු වත්ථූසු එකෙකං, කමතො රෙවතො මහා;

ථෙරො ථෙරං සබ්බකාමිං, පුච්ඡි පුච්ඡාසු කොවිදො.

53. සබ්බකාමී මහාථෙරො, තෙන පුට්ඨො’ථ බ්‍යාකරි;

සබ්බානි තානි වත්ථූනි, න කප්පන්තීති සුත්තතො.

54. නිහනිත්වා’ධිකරණං, තං තෙ තත්ථ යථාක්කමං;

තථෙව සඞ්ඝමජ්ඣෙපි, පුච්ඡාවිස්සජ්ජනං කරුං.

55. නිග්ගහං පාපභික්ඛූනං, දසවත්ථුකදීපනං;

තෙසං දසසහස්සානං, මහාථෙරො අකංසු තෙ.

56. සබ්බකාමී පුථවියා, සඞ්ඝත්ථෙරො තදා අහු;

සො වීසං වස්සසතිකො, තදා’සි උපසම්පදා.

57. සබ්බකාමී ච සාළ්හො ච,

රෙවතො ඛුජ්ජසොභිතො;

යසො කාකොණ්ඩකසුතො,

සම්භූතො සාණවාසිකො.

58. ථෙරා ආනන්දත්ථෙරස්ස, එතෙ සද්ධිවිහාරිනො;

වාසභගාමිකො චෙව, සුමනො ච දුවෙ පන.

59. ථෙරා’නුරුද්ධත්ථෙරස්ස, එතෙ සද්ධිවිහාරිනො;

අට්ඨ ථෙරා’පි ධඤ්ඤා තෙ, දිට්ඨපුබ්බා තථාගතං.

60. භික්ඛූ සතසහස්සානි, ද්වාදසාසුං සමාගතා;

සබ්බෙසං රෙවතත්ථෙරො, භික්ඛූනංපමුඛොතදා.

61. තතො සො රෙවතත්ථෙරො, සද්ධම්මට්ඨිතියා චිරං;

කාරෙතුං ධම්මසංගීතිං, සබ්බභික්ඛුසමූහතො.

62. පභින්නත්ථාදිඤාණානං, පිටකත්තයධාරිනං;

සතානි සත්තභික්ඛූනං, අරහන්තානමුච්චිනි.

63. තෙ සබ්බෙ වාලුකාරාමෙ, කාළාසොකෙන රක්ඛිතා;

රෙවතත්ථෙරපාමොක්ඛා, අකරුං ධම්මසඞ්ගහං.

64. පුබ්බෙ කතං තථා එව, ධම්මං පච්ඡා ච භාසිතං;

ආදාය නිට්ඨපෙසුං තං, එතං මාසෙහි අට්ඨහි.

65. එවං දුතියසංගීතිං, කත්වා තෙපි මහායසා;

ථෙරා දොසක්ඛයං පත්තා, පත්තාකාලෙන නිබ්බුතිං.

66. ඉති පරමමතීනං පත්තිපත්තබ්බකානං,

තිභවහිතකරානං ලොකනාථෙරසානං;

සුමරියමරණං තං සඞ්ඛතා සාරකත්තං,

පරිගණියමසෙසං අප්පමත්තො භවෙය්‍යාති.

සුජනප්පසාදසංවෙගත්ථාය කතෙ

මහාවංසෙ දුතියසංගීති නාම

චතුත්ථො පරිච්ඡෙදො.