ඡබ්බීසතිම පරිච්ඡෙද

මරිචවට්ටිකවිහාරමහො

1. එකච්ඡත්තං කරිත්වාන, ලංකාරජ්ජං මහායසො;

නානන්තරං සංවිදහි, යොධානං සො යථාරහං.

2. ථෙරපුත්තාභයො යොධො, දිය්‍යමානං න ඉච්ඡිතං;

පුච්ඡිතොව කිමත්ථන්ති, යුද්ධමත්ථීති අබ්‍රවි.

3. එකරජ්ජෙ කතෙ යුද්ධං, කිනාමත්තීති පුච්ඡිතො;

යුද්ධං කිලෙස චොරෙහි, කරිස්සාමි සුදුජ්ජයං.

4. ඉච්චෙව මාහ තං රාජා, පුනප්පුනං නිසෙධයි;

පුනප්පුනං සොයාචිත්වා, රඤ්ඤොනුඤ්ඤාය පබ්බජි.

5. පබ්බජිත්වා ච කාලෙන, අරහත්තමපාපුණි;

පඤ්චඛීණාසවසත-පරිවාඑරා අහොසි ච.

6. ඡත්තමඞ්ගල සත්තාහෙ, ගතෙ ගතභයො’ භයො;

රාජා කතා භිසෙකොව, මහතා විභවෙන සො.

7. තිස්සවාපි’මගා කීළ-විධිනා සමලඞ්ක තං;

කීළිතුං අභිසිත්තානං, චාරිත්තඤ්චා නුරක්ඛිතුං.

8. රඤ්ඤො පරිච්ඡදං සබ්බං, උපායනසතානි ච;

මරිචවට්ටිවිහාරස්ස, ඨානම්හි ඨපයිංසු ච.

9. තත්ථෙව ථූපඨානම්හි, සධාතුං කුන්තමුත්තමං;

ඨපෙසුං කුන්තධරකා, උජුකං රාජමානුසා.

10. සහොරොධො මහාරාජා, කීළිත්වා සලිලෙ දිවා;

සායමාහං ගමිස්සාම, කුන්තං වඩ්ඪෙථ භො’’ඉති.

11. චාලෙතුං තං න සක්ඛිංසු, කුන්තං රාජාධිකාරිකා;

ගන්ධාමාලාහි පූජෙසුං, රාජසෙනාසමාගතා.

12. රාජා මහන්තං අච්ඡෙරං, දිස්වා තං හට්ඨමානසො;

විධාය තත්ථ ආරක්ඛං, පවිසිත්වා පුරං තතො.

13. කුන්තං පරික්ඛිපාපෙත්වා, චෙතියං තත්ථ කාරයි;

ථූපං පරික්ඛිපාපෙත්වා, විහාරඤ්ච අකාරයි.

14. තීහි වස්සෙහි නිඨාසි, විහාරො සො නරිස්සරො;

සඞ්ඝං සසන්නිපාතෙසි, විහරමහාකාරණා.

15. භික්ඛුනං සතසහස්සානි, තදා භික්ඛුනියො පන;

නවුති ච සහස්සානි, අභවිංසු සමාගතා.

16. තස්මිං සමාගමෙ සඞ්ඝං, ඉදමාක මහීපති;

‘‘සඞ්ඝං භන්තෙ විසරිත්වා, භුඤ්ජිං මරිචවට්ටිකං.

17. හස්සෙ’තං දණ්ඩකම්මං මෙ, භවතූති අකාරයි;

සචෙතියං මරිචවට්ටි-විහාරං සුමනොහරං.

18. පතිග්ගණ්හාතු තං සඞ්ඝො, ඉති සො දක්ඛිණොදකං;

පාතිත්වා භික්ඛුසඞ්ඝස්ස, විහාරං සුමනො අදා.

19. විහාරෙ තං සමන්තාපි, මහන්තං මණ්ඩපං සුභං;

කාරෙත්වා තත්ථ සඞ්ඝස්ස, මහාදානං පවත්තයි.

20. පාදෙ පතිට්ඨාපෙත්වාපි,

ජලෙ අභයවාපියා;

කතො සො මණ්ඩපො ආසි,

සෙසො කාසෙ කථාවකා.

21. සත්තාහං අන්නපානාදිං, දත්වාන මනුජාධිපො;

අදා සාමණකං සබ්බං, පරික්ඛාරං මහාරහං.

22. අහු සතසහස්සග්ඝො, පරික්ඛාරො ස ආදිකො;

අන්තෙ සහස්සග්ඝනකො, සබ්බ සඞ්ඝො ච තංලභි.

23. යුද්ධෙ දානෙ ච සූරෙන, සූරිනා රතනත්තයෙ;

පසන්නාමලචිත්තෙන, සාසනුජොත නත්ථිනා.

24. රඤ්ඤා කතඤ්ඤුනා තෙන, ථූපකාරාපනාදිතො;

විහාර මහනන්තානි, පූජෙතුං රතනත්තයං.

25. පරිච්චත්තධනානෙ’ත්ථ, අනග්ඝානි විමුඤ්චිය;

සෙසානි හොන්ති එකාය, ඌනවීසතිකොටියො.

26. තොගා දසද්ධවිධ දොසවිදූසිතාපි,

පඤ්ඤාවිසෙස සහිතෙහි ජනෙහි පත්තා;

හොන්තෙව පඤ්චගුණයොග ගහිතසාරං,

ඉච්චස්ස සාරගහණෙ මතිමායතෙය්‍යාති.

සුජනප්පසාදසංවෙගත්ථාය කතෙ මහාවංසෙ

මරිචවට්ටිකවිහාරමහොනාම

ඡබ්බීසතිමො පරිච්ඡෙදො.