සත්තවීසතිම පරිච්ඡෙද

ලොහපාසාදමහො

1. තතො රාජා විචින්තෙසි, විස්සුතං සුස්සුතං සුතං;

මහාපඤ්ඤො සදා පුඤ්ඤො, පඤ්ඤාය කතනිච්ඡයො.

2. ‘‘දීපප්පසාදකො ථෙරො, රාජිනො අය්‍යකස්ස මෙ;

එවං කිරාහනත්තා තෙ, දුට්ඨගාමණිභූපති.

3. මහාපුඤ්ඤො මහාථූපං, සොණ්ණමාලිං මනොරමං;

වීසංහත්ථසතං උච්චං, කාරෙස්සති අනාගතෙ.

4. පුනො උපොසථාගාරං, නානාරතනමණ්ඩිතං;

නවභූමං කරිත්වාන, ලොහපාසාද මෙව ච.

5. ඉති චින්තිය භූමින්දො, ලිඛිත්වෙවං ඨපාපිතං;

පෙක්ඛාපෙන්තො රාජගෙහෙ, ඨිතං එව කරණ්ඩකෙ.

6. සොවණ්ණපට්ටං ලද්ධාන, ලෙඛං තත්ථ අවාචයි;

‘‘චත්තාලීසසතං වස්සං, අතික්කම්ම අනාගතෙ.

7. කාකවණ්ණසුතො දුට්ඨ-ගාමණිමනුජාධිපො;

ඉදඤ්චිදඤ්ච එවඤ්ච, කාරෙස්සතී’’ති වාචිතං.

8. සුත්වා හට්ඨො උදානෙත්වා, අප්පොට්ඨෙසි මහීපති;

තතො පාතො’ව ගන්ත්වාන, මහාමෙඝවනං සුභං.

9. සන්නිපාතං කාරයිත්වා, භික්ඛුසඞ්ඝස්ස අබ්‍රවි;

‘‘විමානතුල්‍යං පාසාදං, කාරයිස්සාමි වො අහං.

10. දිබ්බං විමානං පෙසෙත්වා, තදා ලෙඛං අදාථ මෙ’’;

භික්ඛුසඞ්ඝො විසජ්ජෙසි, අට්ඨ ඛීණාසවෙ තහිං.

11. කස්සපමුනිනො කාලෙ, අසොකො නාම බ්‍රාහ්මණො;

අට්ඨ සලාකභත්තානි, සඞ්ඝස්ස පරිණාමිය.

12. භරණිං නාම දාසිං සො, ‘‘නිච්චං දෙහී’’ති අබ්‍රවි;

දත්වා සා තානි සක්කච්චං, යාවජීවං තතො චුතා.

13. ආකාසට්ඨවිමානම්හි, නිබ්බත්තිරුචිරෙ සුභෙ;

අච්ඡරානං සහස්සෙන, සදා’සි පරිවාරිතා.

14. තස්සා රතනපාසාදො, ද්වාදසයොජනුග්ගතො;

යොජනානං පරික්ඛෙපො, චත්තාලීසඤ්ච අට්ඨ ච.

15. කූටාගාරසහස්සෙන, මණ්ඩිතො නවභූමිකො;

සහස්සගබ්භසම්පන්නො, රාජමානො චතුම්මුඛො.

16. සහස්සසඞ්ඛසංවුත්ති, සීහපඤ්ජර නෙත්තවා;

සකිඞ්කණිකජාලාය, සජ්ජිතො වෙදිකාය ච.

17. අම්බලට්ඨිකපාසාදො, තස්ස මජ්ඣෙ ඨිතො අහු;

සන්තමතො දිස්සමානො, පග්ගහිතධජාකුලො.

18. තාවතිංසඤ්ච ගච්ඡන්තා, දිස්වා ථෙරං තමෙව තෙ;

හිඞ්ගුලෙන තදා ලෙඛං, ලෙඛයිත්වා පටෙ තතො.

19. නිවත්තිත්වාන ආගන්ත්වා, පටං සඞ්ඝස්ස දස්සයුං;

සඞ්ඝො පටං ගහෙත්වා තං, පාහෙසි රාජසන්තිකං.

20. තං දිස්වා සුමනො රාජා, ආගම්මාරාම මුත්තමං;

ආලෙඛතුල්‍යං කාරෙසි, ලොහපාසාද මුත්තමං.

21. කම්මාරම්භනකාලෙව, චතුද්වාරම්හි භොගවා;

අට්ඨසතසහස්සානි, හිරඤ්ඤානි ඨපාපයි.

22. පුටසහස්ස වත්ථානි, ද්වාරෙ ද්වාරෙ ඨපාපයි;

ගුළ තෙලසක්ඛරමධු-පුරා චානෙක චාටියො.

23. ‘‘අමූලකකම්ම මෙත්ථ, න කාතබ්බ’’න්ති භාසිය;

අග්ඝාපෙත්වා කතං කම්මං, තෙසං මූලමදාපයි.

24. හත්ථසතං හත්ථසතං, ආසි එකෙක පස්සතො;

උච්චතො තත්තකොයෙව, පාසාදො හි චතුම්මුඛො.

25. තස්මිං පාසාද සෙට්ඨස්මිං, අහෙසුං නවභූමියො;

එකෙකිස්සා භූමියා ච, කූටාගාරසතානි ච.

26. කූටාගාරානි සබ්බානි, සජ්ඣුනා ඛචිතා න’යුං;

පවාලවෙදිකා තෙසං, නානාරතන භූසිතා.

27. නානාරතන චිත්තානි, තාසං පදුමකානි ච;

සජ්ඣකිංකිණිකාපන්ති-පරික්ඛිත්තාව තා අහු.

28. සහස්සං තත්ථ පාසාදො, ගබ්භා ආසුං සුසඞ්ඛතා;

නානාරතන ඛචිතා, සීහපඤ්ජරනෙත්තවා.

29. නාරිවාහනයානන්තු, සුත්වා වෙස්සවණස්ස සො;

තදා කාරමකාරෙසි, මජ්ඣෙ රතනමණ්ඩපං.

30. සීහබ්‍යග්ඝාදිරූපෙහි, දෙවතා රූපකෙහි ච;

අහු රතනමයොහෙ’ස, ථම්භෙහි ච විභූසිතො.

31. මුත්තාජාලපරික්ඛෙපො, මණ්ඩපන්තෙ සමන්තතො;

පවාලවෙදිකා චෙත්ථ, පුබ්බෙ වුත්තවිධා අහු.

32. සත්තරතන චිත්තස්ස, වෙමජ්ඣෙ මණ්ඩපස්ස තු;

රුචිරො දන්තපල්ලඞ්කො, රම්මො ඵලිකසන්ථරො.

33. දන්තමයාපස්සයෙ’ත්ථ, සුවණ්ණමය සූරියො;

සජ්ඣුමයෙ චන්දිමා ච, තාරා ච මුත්තකා මයා.

34. නානාරතන පදුමානි, තත්ථ තත්ථ යථාරහං;

ජාතකානි ච තත්ථෙව, ආසුං සොණ්ණලතන්තරෙ.

35. මහග්ඝපච්චත්ථරණෙ, පල්ලඞ්කෙ’ති මනොරමෙ;

මනොහරා’සිට්ඨපිතා, රුචිරං දන්තබීජනී.

36. පවාලපාදුකා තත්ථ, ඵලිකම්හි පතිට්ඨිතා;

සෙතච්ඡත්තං සජ්ඣුදණ්ඩං, පල්ලඞ්කො’පරිසොභථ.

37. සත්තරතන මයානෙත්ථ, අට්ඨමඞ්ගලිකානි ච;

චතුප්පදානං පන්තී ච, මණිමුත්තන්තරා අහුං.

38. රජතානඤ්ච ඝණ්ටානං, පන්තී භත්තන්තලම්බිතා;

පාසාදඡත්තපල්ලඞ්ක-මණ්ඩපා’සුං අනග්ඝිකා.

39. මහග්ඝ පඤ්ඤපාපෙසි, මඤ්චපීඨං යථාරහං;

තථෙව භූමත්ථරණං, කම්බලඤ්ච මහාරහං.

40. ආචාම කුම්භිසොවණ්ණා, උලුඞ්කො ච අහු තහිං;

පාසාද පරිභොගෙසු, සෙසෙසු ච කථා’ වකා.

41. චාරුපාකාර පරිවාරො,

සො චතුද්වාරකොට්ඨකො;

පාසාදො’ලඞ්කතො සොභි,

තාවතිංස සභා විය.

42. තම්බ ලොහිට්ඨකාහෙ’සො,

පාසාදො ඡාදිතො අහු;

ලොහ පාසාද වොහාරො,

තෙන තස්ස අජායථ.

43. නට්ඨිතෙ ලොහපාසාදෙ, සො සඞ්ඝං සන්නිපාතයි;

රාජා සඞ්ඝො සන්නිපති, මරිචවට්ටිමහෙ විය.

44. පුථුජ්ජනා’ව අට්ඨංසු, භික්ඛූ පඨමභූමියං;

තෙපිටකා දුතියාය, සොතාපන්නාදයො පන.

45. එකෙ කෙයෙව අට්ඨංසු, තතියාදීසු භූමිසු;

අරහන්තො ච අට්ඨංසු, උද්ධං චතූසු භූමිසු.

46. සඞ්ඝස්ස දත්වා පාසාදං, දක්ඛිණම්බුපුරස්සරං;

රාජා’දත්ථ මහාදානං, සත්තාහං පුබ්බකං පිය.

47. පාසාද මහචත්තානි, මහාචාගෙන රාජිනා;

අනග්ඝානි ඨපෙත්වාන, අහෙසුං තිංසකොටියො.

48. නිස්සාරෙ ධනනිචයෙ විසෙසසාරං,

යෙ දානං පරිගණයන්ති සාධුපඤ්ඤා;

තෙ දානං විපුලමපෙත චිත්තසඞ්ගා,

සත්තානං හිතපරමා දදන්ති එවංති.

සුජනප්පසාදසංවෙගත්ථාය කතෙ මහාවංසෙ

ලොකහපාසාදමහො නාම

සත්තවීසතිමො පරිච්ඡෙදො.