ද්වාදසම පරිච්ඡෙද

නානාදෙසපසාදො

1. ථෙරො මොග්ගලිපුත්තො සො, ජිනසාසන ජොතකො;

නිට්ඨාපෙත්වාන සංගීතිං, පෙක්ඛමානො අනාගතං.

2. සාසනස්ස පතිට්ඨානං, පච්චන්තෙසු අවෙක්ඛිය;

පෙසෙසි කත්තිකෙ මාසෙ, තෙතෙ ථෙරෙ තහිං තහිං.

3. ථෙරං කස්මීරගන්ධාරං, මජ්ඣන්තිකමපෙසයි;

අපෙසයී මහාදෙව-ත්ථෙරං මහිසමණ්ඩලං.

4. වනවාසිං අපෙසයි, ථෙරං රක්ඛිතනාමකං;

තථා’පරන්තකං යොන-ධම්මරක්ඛිතනාමකං.

5. මහාරට්ඨං මහාධම්ම-රක්ඛිතත්ථෙර නාමකං;

මහාරක්ඛිත ථෙරං තං, යොන ලොකමපෙසයි.

6. පෙසෙසි මජ්ඣිමං ථෙරං, හිමවන්තපදෙසකං;

සුවණ්ණභූමිං ථෙරෙ ද්වෙ, සොණමුත්තර මෙව ච.

7. මහාමහින්දත්ථෙරං තං, ථෙර ඉට්ටියමුත්තියං;

සම්බලං භද්දසාලඤ්ච, සකෙ සද්ධිවිහාරිකෙ.

8. ලංකාදීපෙ මනුඤ්ඤම්හි, මනුඤ්ඤං ජිනසාසනං;

පතිට්ඨාපෙථ තුම්හෙ’ති, පඤ්ච ථෙරෙ අපෙසයි.

9. තදා කස්මීරගන්ධාරෙ, පක්කං සස්සං මහිද්ධිකො;

අරවාලො නාගරාජා, වස්සං කරකසඤ්ඤිතං.

10. වස්සා පෙත්වා සමුද්දස්මිං, සබ්බං ඛිපතිදාරුණො;

තත්‍ර මජ්ඣන්තිකත්ථෙරො, ඛිප්පං ගන්ත්වා විහායසා.

11. අරවාලදහෙවාරි-පිට්ඨෙ චඞ්කමනාදිකෙ;

අකාසි දිස්වා තංනාගා, රුට්ඨාරඤ්ඤො නිවෙදයුං.

12. නාගරාජා’ථරුට්ඨො සො, විවිධා භිසිකා’කරි;

වාතා මහන්තා වායන්ති, මෙඝො ගජ්ජති වස්සති.

13. ඵලන්ත්‍ය’සනියො විජ්ජු, නිච්ඡරන්ති තතො තතො;

මහිරුහා පබ්බතානං, කූටානි පපතන්ති ච.

14. විරූපරූපා නාගා ච, භිංසාපෙන්ති සමන්තතො;

සයං ධුපායති ජලති, අක්කොසන්තො අනෙකධා.

15. සබ්බං තං ඉද්ධියා ථෙරො, පටිබාහිය භිංසනං;

අවොච නාගරාජං තං, දස්සෙන්තො බලමුත්තමං.

16. සදෙව කොපි චෙ ලොකො, ආගන්ත්වා තාසයෙය්‍ය මං;

න මෙ පටිබලො අස්ස, ජනෙතුං භයභෙරවං.

17. සචෙ’පි ත්වං මහිං සබ්බං, සසමුද්දං සපබ්බතං;

උක්ඛිපිත්වා මහානාග, ඛිපෙය්‍යාසි මමො’පරි.

18. නෙව මෙ සක්කුණෙය්‍යාසි, ජනෙතුං භයභෙරවං;

අඤ්ඤදත්ථු තවෙ‘ව’ස්ස, විඝාතො උරගාධිප.

19. තංසුත්වා නිම්මදස්ස’ස්ස, ථෙරො ධම්මමදෙසයි;

තතො සරණසීලෙසු, නාගරාජා පතිට්ඨහි.

20. තථෙව චතුරාසීති-සහස්සානි භුජඞ්ගමා;

හිමවන්තෙව ගන්ධබ්බා, යක්ඛා කුම්භණ්ඩකා බහූ.

21. පණ්ඩකො නාම යක්ඛො තු, සද්ධිංහාරිත යක්ඛියා;

පඤ්චසතෙහි පුත්තෙහි, ඵලං පාපුණි ආදිකං.

22. ‘‘මා’’දානි කොධං ජනියිත්ථ, ඉතො උද්ධං යථාපුරෙ;

සසඝාතඤ්ච මා’කත්ථ, සුඛකාමාහි පාණිනො.

23. කරොථ මෙත්තං සත්තෙසු, වසන්තු මනුජා සුඛං;

ඉති තෙනා’නුසිට්ඨා තෙ, තථෙව පටිපජ්ජිසුං.

24. තතො රතනපල්ලඞ්කෙ, ථෙරං සො උරගාධිපො;

නිසීදාපිය අට්ඨාසි, බීජමානො තදන්තිකෙ.

25. තදා කස්මීරගන්ධාර-වාසිනො මනුජා’ගතා;

නාගරාජස්ස පූජත්ථං, මන්ත්වා ථෙරං මහිද්ධිකං.

26. ථෙරමෙවා’භි වාදෙත්වා, එකමන්තං නිසීදිසුං;

තෙසං ධම්මමදෙසෙසි, ථෙරො ආසිවිසොපමං.

27. අසීතියා සහස්සානං, ධම්මාභිසමයො අහු;

සතසහස්ස පුරිසා, පබ්බජුං ථෙරසන්තිකෙ.

28. තතොප්පභුපති කස්මිර-ගන්ධාරං තෙ ඉදානිපි;

ආසුං කාසාව පජ්ජොතා, වත්ථුත්තයපරායනා.

29. ගන්ත්වා මහාදෙවත්ථෙරො, දෙසං මහිසමණ්ඩලං;

සුත්තන්තං දෙවදූතං සො, කථෙසි ජනමජ්ඣගො.

30. චත්තාලීස සහස්සානි, ධම්මචක්ඛුං විසොධයුං;

චත්තාලීස සහස්සානි, පබ්බජිංසු තදන්තිකෙ.

31. ගන්ත්වා’ථ රක්ඛිතත්ථෙරො, වනවාසිං නභෙ ඨිතො;

සංයුත්තමනමතග්ගං, කථෙසි ජනමජ්ඣගො.

32. සට්ඨි නරසහස්සානං, ධම්මාභිසමයො අහු;

සත්තතිංස සහස්සානි, පබ්බජිංසු තදන්තිකෙ.

33. විහාරානං පඤ්චසතං, තස්මිංදෙසෙ පතිට්ඨහි;

පතිට්ඨාපෙසි තත්ථෙවං, ථෙරො සො ජිනසාසනං.

34. ගන්ත්වා’පරන්තකං ථෙරො, යොනකො ධම්මරක්ඛිතො;

අග්ගික්ඛන්ධොපමං සුත්තං, කථෙත්වා ජනමජ්ඣගො.

35. සත්තතිංස සහස්සානි, පාණෙ තත්ථ සමාගතෙ;

ධම්මාමතමපායෙසි, ධම්මා ධම්මෙසු කොවිදො.

36. පුරිසානඤ්ච සහස්සඤ්ච, ඉත්ථියො ච තතො’ධිකා;

ඛත්තියානං කුලායෙව, නික්ඛමිත්වාන පබ්බජුං.

37. මහාරට්ඨමිසී ගන්ත්වා, සො මහාධම්මරක්ඛිතො;

මහානාරදකස්සපව්හං, ජාතකං කථයී තහිං.

38. මග්ගඵලං පාපුණිංසු, චතුරාසීති සහස්සකා;

තෙරසන්තු සහස්සානි, පබ්බජිංසු තදන්තිකෙ.

39. ගන්ත්වාන යොනවිසයං, සො මහාධම්මරක්ඛිතො ඉසි;

කාළකාරාම සුත්තන්තං, කථෙසි ජනමජ්ඣගො.

40. පාණසත සහස්සානි, සහස්සානි ච සත්තති;

මග්ගඵලං පාපුණිංසු, දස සහස්සානි පබ්බජුං.

41. ගන්ත්වා චතූහි ථෙරෙහි, දෙසෙසි මජ්ඣිමො ඉසි;

හිමවන්තපදෙසස්මිං, ධම්මචක්කපවත්තනං.

42. මග්ගඵලපාපුණිංසු, අසීතිපාණ කොටියො;

විසුං තෙ පඤ්චරට්ඨානි, පඤ්චථෙරා පසාදයුං.

43. පුරිසසතසහස්සානි, එකෙකස්සෙව සන්තිකෙ;

පබ්බජිංසු පසාදෙන, සම්මාසම්බුද්ධ සාසනෙ.

44. සද්ධිං උත්තරථෙරෙන, සොණත්ථෙරො මහිද්ධිකො;

සුවණ්ණභූමිං අගමා, තස්මිං තු සමයෙ පන.

45. ජාතෙ ජාතෙ රාජගෙහෙ, දාරකෙ රුද්දරක්ඛසී;

සමුද්දතො නික්ඛමිත්වා, භක්ඛිත්වා පන ගච්ඡති.

46. තස්මිං ඛණෙ රාජගෙහෙ,

ජාතො හොති කුමාරකො;

ථෙරෙ මනුස්සා පස්සිත්වා,

රක්ඛසානං සහායකා.

47. ඉති චින්තිය මාරෙතුං, සා යුවා උපසඞ්කමුං;

‘‘කිමෙතන්ති’’ච පුච්ඡිත්වා, ථෙරං තෙ එව මාහුතෙ.

48. සමණා මයං හිමවන්තා, න රක්ඛසි සහායකා;

රක්ඛසී සා සපරිසා, නික්ඛන්තා හොති සාගරා.

49. තං දිස්වාන මහාරාවං, විරවිංසු මහාජනා;

දිගුණෙ රක්ඛසෙ ථෙරො, මාපයිත්වා භයානකෙ.

50. තං රක්ඛසිං සපරිසං, පරික්ඛිපි සමන්තතො;

ඉදං ඉමෙහි උද්ධන්ති, මන්ත්වා භීතා පලායිසා.

51. තස්ස දෙසස්ස ආරක්ඛං, ඨපෙත්වාන සමන්තතො;

තස්මිං සමාගමෙ ථෙරො, බ්‍රහ්මජාලමදෙසයි.

52. සරණෙසු ච සීලෙසු, අට්ඨංසු බහවො ජනා;

සට්ඨියා තු සහස්සානං, ධම්මාභිසමයො අහු.

53. අඩ්ඪුඩ්ඪානි සහස්සානි, පබ්බජුං කුලදාරකා;

පබ්බජිංසු දියඩ්ඪන්තු, සහස්සං කුලධීතරො.

54. තතොප්පභුති සඤ්ජාතෙ, රාජගෙහෙ කුමාරකෙ;

නාමං කරිංසු රාජානො, සොණුත්තර සනාමකෙ.

55. මහාජනස්සාපි ජිනස්ස කඩ්ඪනං;

විහාය පත්තං අමතං සුඛම්පිතෙ;

කරිංසු ලොකස්ස හිතං තහිං තහිං;

භවෙය්‍ය යො ලොකහිතෙ පමාදවාති.

සුජනප්පසාද සංවෙගත්ථාය කතෙ මහාවංසෙ

නානාදෙසපසාදො නාම ද්වාදසමො පරිච්ඡෙදො.