තෙරසම පරිච්ඡෙද

මහින්දාගමනො

1. මහාමහින්දත්ථෙරො සො, තදා ද්වාදසවස්සිකො;

උපජ්ඣායෙන ආණත්තො, සඞ්ඝෙන ච මහාමතී.

2. ලංකාදීපං පසාදෙතුං,

කාලං පෙක්ඛං විචින්තයී;

‘‘වුඩ්ඪො මුටසිවො රාජා,

රාජා හොතු සුතො’’ ඉති.

3. තදන්තරෙ ඤාතිගණං, දට්ඨුං කත්වාන මානසං;

උපජ්ඣායඤ්ච සඞ්ඝඤ්ච, වන්දිත්වා පුච්ඡ භූපතිං.

4. ආදාය චතුරො ථෙරෙ, සඞ්ඝමිත්තාය අත්‍රජං;

සුමනං සාමණෙරඤ්ච, ඡළාභිඤ්ඤං මහිද්ධිකං.

5. ඤාතීනං සඞ්ගහං කාතුං, අගමා දක්ඛිණාගිරිං;

තතො තත්ථ චරන්තස්ස, ඡම්මාසා සමතික්කමුං.

6. කමෙන වෙදිසගිරිං, නගරං මාතුදෙවියා;

සම්පත්වා මතරං පස්සි, දෙවී දිස්වා පියං සුතං.

7. භොජයිත්වා සපරිසං, අත්තනායෙව කාරිතං;

විහාරං චෙතියගිරිං, ථෙරං ආරොපයී සුභං.

8. අවන්තිරට්ඨං භුඤ්ජන්තො, පිතරා දින්නමත්තනො;

සො අසොක කුමාරො හි, උජ්ජෙනීගමනා පුරා.

9. වෙදිසෙ නගරෙ වාසං, උපගන්ත්වා තහිං සුභං;

දෙවින්නාම ලභිත්වාන, කුමාරිං සෙට්ඨිධීතරං.

10. සංවාසං තාය කප්පෙසි, ගබ්භං ගණ්හිය තෙන සා;

උජ්ජෙනියං කුමාරං තං, මහින්දං ජනයී සුභං.

11. වස්සද්වයමතික්කම්ම, සඞ්ඝමිත්තඤ්ච ධීතරං;

තස්මිං කාලෙ වසති සා, වෙදිසෙ නගරෙ තහිං.

12. ථෙරො තත්ථ නිසීදිත්වා, කාලඤ්ඤූ ඉති චින්තයි;

පිතරා මෙ සමාණත්තං, අභිසෙක මහුස්සවං.

13. දෙවානංපියතිස්සො සො, මහාරාජා’නුභොතු ච;

වත්ථුත්තයගුණෙ චාපි, සුත්වා ජානාතු දූහතො.

14. ආරොහතු මිස්සනගං, ජෙට්ඨමාසස්සු’පොසථෙ;

තදහෙව ගමිස්සාම, ලංකාදීපවරං මයං.

15. මහින්දො උපසඞ්කම්ම, මහින්දත්ථෙර මුත්තමං;

යාහි ලංකං පසාදෙතුං, සම්බුද්ධෙනා’සි බ්‍යාකතො.

16. මයම්පි තත්ථුපත්ථම්භා, භවිස්සාමා’ති අබ්‍රවි;

දෙවියා භගිනී ධීතු-පුත්තො භණ්ඩුක නාමකො.

17. ථෙරෙන දෙවියා ධම්මං, සුත්වා දෙසිතමෙව තු;

අනාගාමිඵලං පත්වා, වසි ථෙරස්ස සන්තිකෙ.

18. තත්ථ මාසං වසිත්වාන, ජෙට්ඨමාසස්සු’ පොසථෙ;

ථෙරො චතූහි ථෙරෙහි, සුමනෙනා’ථ භණ්ඩුනා.

19. සද්ධිං තෙන ගහට්ඨෙන, න රතො ඤාතිහෙතුනා;

තස්මා විහාරා ආකාසං, උග්ගන්ත්වා සො මහිද්ධිකො.

20. ඛණෙනෙව ඉධාගම්ම, රම්මෙ මිස්සක පබ්බතෙ;

අට්ඨාසි විලුකූටම්හි, රුචිරම්බත්ථලෙ වරෙ.

21. ලංකාපසාද ගුණෙන වියාකතො සො;

ලංකාහිතාය මුනිනා සයිතෙන අන්තෙ;

ලංකාය සත්ථුසදිසො හිතහෙතු තස්සා;

ලංකාමරූහි මහිතො’භිනිසීදි තත්තාති.

සුජනප්පසාදසංවෙගත්ථාය කතෙ මහාවංසෙ

මහින්දාගමනො නාම

තෙරසමො පරිච්ඡෙදො.