රාජකණ්ඩ

251. මහාජනං යො රඤ්ජෙති, චතූහිපි වත්ථූහි වා;

රාජාති වුච්චතෙ ලොකෙ, ඉති සල්ලක්ඛයෙ විද්වා.

252. දානඤ්ච අත්ථචරියා, පියවාචා අත්තසමං;

සඞ්ගහා චතුරො ඉමෙ, මුනින්දෙන පකාසිතා.

දානම්පි අත්ථචරියතඤ්ච, පියවාදිතඤ්ච සමානත්තතඤ්ච;

කරියචරියසුසඞ්ගහං බහූනං, අනවමතෙන ගුණෙන යාති සග්ගං;

දානඤ්ච පෙය්‍යවජ්ජඤ්ච, අත්ථචරියා ච යා ඉධ;

සමානත්තතා ච ධම්මෙසු, තත්ථ තත්ථ යථාරහං;

එතෙ ඛො සඞ්ගහා ලොකෙ, රථස්සාණීව යායතො.

253. දානං සීලං පරිච්චාගං, අජ්ජවං මද්දවං තපං;

අක්කොධං අවිහිංසඤ්ච, ඛන්තී ච අවිරොධනං;

දසෙතෙ ධම්මෙ රාජානො, අප්පමත්තෙන ධාරය්‍යුං.

254. එකයාමං සයෙ රාජා, ද්වියා මඤ්ඤෙව පණ්ඩිතො;

ඝරාවාසො තියාමොව, චතුයාමො තු යාචකො.

255. අපුත්තකං ඝරං සුඤ්ඤං, රට්ඨං සුඤ්ඤං අරාජකං;

අසිප්පස්ස මුඛං සුඤ්ඤං, සබ්බසුඤ්ඤං දලිද්දත්තං.

256. ධනමිච්ඡෙ වාණිජෙය්‍ය, විජ්ජමිච්ඡෙ භජෙ සුතං;

පුත්තමිච්ඡෙ තරුණිත්ථිං, රාජාමච්චං ඉච්ඡාගතෙ.

257. පක්ඛීනං බලමාකාසො, මච්ඡානමුදකං බලං;

දුබ්බලස්ස බලං රාජා, කුමාරානං රුදං බලං.

258. ඛමා ජාගරියුට්ඨානං, සංවිභාගො දයික්ඛණා;

නායකස්ස ගුණා එතෙ, ඉච්ඡිතබ්බා සතං සදා.

259. සකිං වදන්ති රාජානො, සකිං සමණබ්‍රාහ්මණා;

සකිං සප්පුරිසා ලොකෙ, එස ධම්මො සනන්තනො.

260. අලසො ගීහි කාමභොගී න සාධු,

අසඤ්ඤතො පබ්බජිතො න සාධු;

රාජා න සාධු අනිසම්මකාරී,

යො පණ්ඩිතො කොධනො තං න සාධු.

261. ආයං ඛයං සයං ජඤ්ඤා, කතාකතං සයං ජඤ්ඤා;

නිග්ගහෙ නිග්ගහාරහං, පග්ගහෙ පග්ගහාරහං.

262. මාතා පුත්තකතං පාපං, සිස්සකතං ගුරු තථා;

රාජා රට්ඨකතං පාපං, රාජකතං පුරොහිතො.

263. අක්කොධෙන ජිනෙ කොධං, අසාධුං සාධුනා ජිනෙ;

ජිනෙ කදරියං දානෙන, සච්චෙනාලිකවාදිනං.

264. අදන්තදමනං දානං, දානං සබ්බත්ථසාධකං;

දානෙන පියවාචාය, උන්නමන්ති නමන්ති ච.

අදන්තදමනං දානං, අදානං දන්තදූසකං;

දානෙන පියවාචාය, උන්නමන්ති නමන්ති ච.

265. දානං සිනෙහභෙසජ්ජං, මච්ඡෙරං දොසනොසධං;

දානං යසස්සීභෙසජ්ජං, මච්ඡෙරං කපණොසධං.

266. න රඤ්ඤා සමකං භුඤ්ජෙ, කාමභොගං කුදාචනං;

ආකප්පං රසභුත්තං වා, මාලාගන්ධවිලෙපනං;

වත්ථසබ්බමලඞ්කාරං, න රඤ්ඤා සදිසං කරෙ.

267. න මෙ රාජා සඛා හොති, න රාජා හොති සමකො;

එසො සාමිකො මය්හන්ති, චිත්තෙ නිට්ඨං සණ්ඨාපයෙ.

268. නාතිදූරෙ භජෙ රඤ්ඤො, නච්චාසන්නෙ පවාතකෙ;

උජුකෙ නාතිනින්නෙ ච, න භජෙ උච්චමාසනෙ;

ඡ දොසෙ වජ්ජෙ සෙවකො, අග්ගීව සංයතො තිට්ඨෙ.

න පච්ඡතො න පුරතො, නාපි ආසන්නදූරතො;

න කච්ඡෙ නොපි පටිවාතෙ, න චාපි ඔණතුණ්ණතෙ;

ඉමෙ දොසෙ විවජ්ජෙත්වා, එකමන්තං ඨිතා අහු –

269. ජප්පෙන මන්තෙන සුභාසිතෙන,

අනුප්පදානෙන පවෙණියා වා;

යථා යථා යත්ථ ලභෙථ අත්ථං,

තථා තථා තත්ථ පරක්කමෙය්‍ය.

270. කස්සකො වාණිජො මච්චො, සමණො සුතසීල වා;

තෙසු විපුලජාතෙසු, රට්ඨම්පි විපුලං සියා.

271. තෙසු දුබ්බලජාතෙසු, රට්ඨම්පි දුබ්බලං සියා;

තස්මා සරට්ඨං විපුලං, ධාරයෙ රට්ඨභාරවා.

272. මහාරුක්ඛස්ස ඵලිනො, ආමං ඡින්දති යො ඵලං;

රසඤ්චස්ස න ජානාති, බීජඤ්චස්ස විනස්සති.

273. මහාරුක්ඛූපමං රට්ඨං, අධම්මෙන පසාසති;

රසඤ්චස්ස න ජානාති, රට්ඨඤ්චස්ස විනස්සති.

274. මහාරුක්ඛස්ස ඵලිනො, පක්කං ඡින්දති යො ඵලං;

රසඤ්චස්ස විජානාති, බීජඤ්ජස්ස න නස්සති.

275. මහාරුක්ඛූපමං රට්ඨං, ධම්මෙන යො පසාසති;

රසඤ්චස්ස විජානාති, රට්ඨඤ්චස්ස න නස්සති.