සුජනකණ්ඩ

176. සද්ධාසීලාදිධම්මෙහි, සප්පන්නො සෙට්ඨමානුසො;

වුත්තො බුද්ධාදිසන්තෙහි, සාධුසප්පුරිසො ඉති.

සද්දාධනං සීලධනං, හිරීඔත්තප්පියං ධනං;

සුතධනඤ්ච චාගො ච, පඤ්ඤා වෙ සත්තමං ධනං.

යස්ස එතෙ ධනා අත්ථි, ඉත්ථියා පුරිසස්ස වා;

අදලිද්දොති තං ආහු, අමොඝං තස්ස ජීවිතං.

තස්මා සද්ධඤ්ච සීලඤ්ච, පසාදං ධම්මදස්සනං;

අනුයුඤ්ජෙථ මෙධාවී, සරං බුද්ධානසාසනං.

177. සබ්භිරෙව සමාසෙථ, සබ්භි කුබ්බෙථ සන්ථවං;

සතං සද්ධම්මමඤ්ඤාය, සෙය්‍යො හොති න පාපියො.

178. චජ දුජ්ජනසංසග්ගං, භජ සාධුසමාගමං;

කර පුඤ්ඤමහොරත්තං, සර නිච්චමනිච්චතං.

179. යො වෙ කතඤ්ඤූ කතවෙදී ධීරො,

කල්‍යාණමිත්තො දළ්හභත්ති ච හොති;

දුක්ඛිතස්ස සක්කච්ච කරොති කිච්චං,

තථාවිධං සප්පුරිසං වදන්ති.

180. මාතාපෙත්තිභරං ජන්තුං, කුලෙ ජෙට්ඨාපචායිනං;

සණ්හං සඛිලසම්භාසං, පෙසුණෙය්‍යප්පහායිනං.

181. මච්ඡෙරවිනයෙ යුත්තං, සච්චං කොධාභිභුං නරං;

තං වෙ දෙවා තාවතිංසා, ආහු ‘‘සප්පුරිසො’’ඉති.

182. කුලජාතො කුලපුත්තො, කුලවංසසුරක්ඛතො;

අත්තනා දුක්ඛප්පත්තොපි, හීනකම්මං න කාරයෙ.

183. උදෙය්‍ය භාණු පච්ඡිමෙ, නමෙය්‍ය මෙරුඅද්දිපි;

සීතලං යදි නරග්ගි, පබ්බතග්ගෙ ච උප්පලං;

විකසෙ න විපරිතා, සාධුවාචා කුදාචනං.

184. සුඛා රුක්ඛස්ස ඡායාව, තතො ඤාතිමාතාපිතු;

තතො ආචෙරස්ස රඤ්ඤො, තතො බුද්ධස්සනෙකධා.

185. භමරා පුප්ඵමිච්ඡන්ති, ගුණමිච්ඡන්ති සජ්ජනා;

මක්ඛිකා පූතිමිච්ඡන්ති, දොසමිච්ඡන්ති දුජ්ජනා.

186. මාතුහීනො දුබ්භාසො හි, පිතුහීනො දුක්කිරියො;

උභො මාතුපිතුහීනා, දුබ්භාසා ච දුක්කිරියා.

187. මාතුසෙට්ඨො සුභාසො හි, පිතුසෙට්ඨො සුකිරියො;

උභොමාතු පිතුසෙට්ඨා, සුභාසා ච සුකිරියා.

188. සුනඛො සුනඛං දිස්වා, දන්තං දස්සෙති හිංසිතුං;

දුජ්ජනො සුජනං දිස්වා, රොසයං හිංසමිච්ඡති.

189. න ච වෙගෙන කිච්චානි, කත්තබ්බානි කුදාචනං;

සහසා කාරිතං කම්මං, බාලො පච්ඡානුතප්පති.

190. කොධං වධිත්වා න කදාචි සොචති,

මක්ඛප්පහානං ඉසයො වණ්ණයන්ති;

සබ්බෙසං වුත්තං ඵරුසං ඛමෙථ,

එතං ඛන්තිං උත්තමමාහු සන්තො.

191. දුක්ඛො නිවාසො සම්බාධෙ, ඨානෙ අසුචීසඞ්කතෙ;

තතො අරිම්හි අප්පියෙ, තතොපි අකතඤ්ඤුනා.

192. ඔවදෙය්‍යා’නුසාසෙය්‍ය, අසබ්භා ච නිවාරයෙ;

සතඤ්හි සො පියො හොති, අසතං හොතිඅප්පියො.

193. උත්තමත්තනිවාතෙන, කක්ඛළං මුදුනා ජයෙ;

නීචං අප්පකදානෙන, වායාමෙන සමං ජයෙ.

194. න විසං විසමිච්චාහ, ධනං සඞ්ඝස්ස උච්චතෙ;

විසං එකංව හනති, හනති සඞ්ඝස්ස සබ්බං.

195. ධනමප්පම්පි සාධූනං, කූපෙ වාරිව නිස්සයො;

බහුංඅපි අසාධූනං, න ච වාරිව අණ්ණවෙ.

196. අපත්ථෙය්‍යං න පත්ථෙය්‍ය, අචින්තෙය්‍යං න චින්තයෙ;

ධම්මමෙව සුචින්තෙය්‍ය, කාලං මොඝං න ඉච්ඡයෙ.

197. අචින්තිතම්පි භවති, චින්තිතම්පි විනස්සති;

න හි චින්තාමයා භොගා, ඉත්ථියා පුරිසස්ස වා.

198. අසන්තස්ස පියො හොති, සන්තෙ න කුරුතෙ පියං;

අසතං ධම්මං රොචෙති, තං පරාභවතො මුඛං.

199. ගුණා කුබ්බන්ති දූතත්තං, දූරෙපි වසතං සතං;

කෙතකෙ ගන්ධං ඝායිත්වා, ගච්ඡන්ති භමරා සයං.

200. පුබ්බජාතිකතං කම්මං, තං කම්මමීති කථ්‍යතෙ;

තස්මා පුරිසාකාරෙනං, යතං කරෙ අතන්දිතො.

201. මත්තිකපිණ්ඩතො කත්තා, කුරුතෙ යං යදිච්ඡති;

එවමත්තකතං කම්මං, මාණවො පටිපජ්ජතෙ.

202. උට්ඨායොට්ඨාය බොධෙය්‍යං, මහබ්භය මුපට්ඨිතං;

මරණබ්‍යාධිසොකානං, කිමජ්ජ නිපතිස්සති.

203. පාණා යථාත්තනොභිට්ඨා, භූතානමපි තෙ තථා;

අත්තොපමෙන භූතෙසු, දයං කුබ්බන්ති සාධවො.

සබ්බෙ තසන්ති දණ්ඩස්ස, සබ්බෙ භායන්ති මච්චුනො;

අත්තානං උපමං කත්වා, න හනෙය්‍ය න ඝාතයෙ.

204. බාලො වා යදි වා වුද්ධො, යුවා වා ගෙහමාගතො;

තස්ස පූජා විධාතබ්බා, සබ්බස්සාභ්‍යාගතො ගරු.

205. ආකිණ්ණොපි අසන්තෙහි, අසංසට්ඨොව භද්දකො;

බහුනා සන්නජාතෙන, ගච්ඡෙන උබ්බත්තෙනිධ.