පකිණ්ණකකණ්ඩ

316. කුලසීලගුණොපෙතො, සබ්බධම්මපරායණො;

පවීණො පෙසනාජ්ඣක්ඛො, ධම්මජ්ඣක්ඛො විධීයතෙ.

317. වෙදවෙදඞ්ගතත්වඤ්ඤො, ජප්පහොමපරායණො;

ආසීවාදවචොයුත්තො, එස රාජපුරොහිතො.

කප්පො බ්‍යාකරණං ජොති – සත්ථං සික්ඛා නිරුත්ති ච;

ඡන්දොවිචිති චෙතානි, වෙදඞ්ගානි වදන්ති ඡ.

318. සකිං වුත්තගහිතත්තො, ලහුහත්ථො ජිතක්ඛරො;

සබ්බසත්ථසමාලොකී, පකට්ඨො නාම ලෙඛකො.

319. සමත්තනීතිසත්ථඤ්ඤො, වාහනෙ පූරිතස්සමො;

සූරවීරගුණොපෙතො, සෙනාඣක්ඛො විධීයතෙ.

320. සුධී වාක්‍යපටු, පඤ්ඤො, පරචිත්තොපලක්ඛණො;

ධීරො යථාත්ථවාදී ච, එස දූතො විධීයතෙ.

321. පුත්තනත්තගුණොපෙතො, සත්ථඤ්ඤො රසපාචකො;

සූරො ච කථිනො චෙව, සූපකාරො ස වුච්චතෙ.

322. ඉඞ්ගිතාකාරතත්තඤ්ඤො, බලවාපියදස්සනො;

අප්පමාදී සදා දක්ඛො, පතීහාරො ස උච්චතෙ.

323. ඉත්ථිමිස්සෙ කුතො සීලං, මංසභක්ඛෙ කුතො දයා;

සුරාපානෙ කුතො සච්චං, මහාලොභෙ කුතො ලජ්ජා;

මහාතන්දෙ කුතො සිප්පං, මහාකොධෙ කුතො ධනං.

324. සුරායොගො වෙලාලො ච, සමජ්ජචරණඞ්ගතො;

ඛිඩ්ඩා ධුත්තො පාපමිත්තො, අලසො භොගනාසකා.

325. ජීවන්තාපි මතා පඤ්ච, බ්‍යාසෙන පරිකිත්තිතා;

දුක්ඛිතො බ්‍යාධිති මූළ්හො, ඉණවා නිච්චසෙවකො.

326. නිද්දාලුකො පමාදො ච, සුඛිතො රොගවාලසො;

කාමුකො කම්මාරාමො ච, සත්තෙතෙ සත්ථවජ්ජිතා.

327. ගොණාහි සබ්බගිහීනං, පොසකා භොගදායකො;

තස්මා හි මාතාපිතූව, මානයෙ සක්කරෙය්‍ය ච.

328. යථා මාතා පිතා භාතා, අඤ්ඤෙවාපි ච ඤාතකා;

ගාවො නො පරමා මිත්තා, යාසු ජායන්ති ඔසධා.

329. අන්නදා බලදා චෙතා, වණ්ණදා සුඛදා තථා;

එතමත්ථවසං ඤත්වා, නාසු ගාවො හනිංසු තෙ.

330. යෙ ච ඛාදන්ති ගොමංසං, මාතුමංසංව ඛාදරෙ;

මතෙසු තෙසු ගිජ්ඣානං, දදෙ සොතෙ ච වාහයෙ.

331. ද්විගුණො ථීනමාහාරො, බුද්ධිචාපි චතුග්ගුණො;

ඡග්ගුණො හොති වායාමො, කාමොත්වට්ඨගුණො භවෙ.

332. න ලොකෙ සොභතෙ මූළ්හො, කෙවලත්තපසංසකො;

අපි සම්පිහිතෙ කූපෙ, කතවිජ්ජො පකාසතෙ.

333. කොසජ්ජං භයතො දිස්වා, වීරියාරම්භඤ්ච ඛෙමතො;

ආරද්ධවීරියා හොථ, එසා බුද්ධානුසාසනී.

334. විවාදං භයතො දිස්වා, අවිවාදඤ්ච ඛෙමතො;

සමග්ගා සඛිලා හොථ, එසා බුද්ධානුසාසනී.

335. පමාදං භයතො දිස්වා, අප්පමාදඤ්ච ඛෙමතො;

භාවෙථට්ඨඞ්ගිකං මග්ගං, එසා බුද්ධානුසාසනී.

336. ගරහා ච පසංසා ච, අනිච්චා තාවකාලිකා;

අප්පකාචෙකදෙසාව, න තා ඉක්ඛෙය්‍ය පණ්ඩිතො;

ධම්මාධම්මංව ඉක්ඛෙය්‍ය, අත්ථානත්ථං හිතාහිතං.