පඤ්චමකණ්ඩ
42. , 32. ගොසරෙ පුථස්සාගමො ක්වචි.
පුථඉච්චෙතස්ස අන්තෙ සරෙ පරෙ ක්වචි ගකාරාගමො හොති.
පුථගෙ ව.
43. , 33. පාස්ස චන්තො රස්සො.
පාඉච්චෙතස්ස අන්තෙ සරෙ පරෙ ක්වචි ගකාරාගමො හොති, අන්තො ච සරො රස්සො හොති.
පගෙව වුත්‍යස්ස.
ක්වචීති කස්මා? පා එව වුත්‍යස්ස.
44. , 24. අබ්භො අභි.
අභිඉච්චෙතස්ස සරෙ පරෙ අබ්භාදෙසො හොති. අබ්භුදීරිතං, අබ්භුග්ගච්ඡති.
45. , 25. අජ්ඣො අධි.
අධිඉච්චෙතස්ස සරෙ පරෙ අජ්ඣාදෙසො හොති.
අජ්ඣොකාසෙ, අජ්ඣාගමා.
46. , 26. තෙ න වා ඉවණ්ණෙ.
තෙ ච ඛො අභිඅධිඉච්චෙතෙ ඉවණ්ණෙ පරෙ අබ්භො අජ්ඣොඉතිවුත්තරූපා නං හොන්ති වා.
අභිච්ඡිතං, අධීරිතං.
වාති කස්මා? අබ්භීරිතං, අජ්ඣිණමුත්තො.
47. , 23. අතිස්ස චන්තස්ස.
අතිඉච්චෙතස්ස අන්තභූතස්ස තිසද්දස්ස ඉවණ්ණෙ පරෙ ‘‘සබ්බො චං තී’’ති වුත්තරූපං න හොති.
අතීසිගණො, අතීරිතං.
ඉවණ්ණෙති කස්මා? අච්චන්තං.
48. , 43. ක්වචි පටි පතිස්ස.
පතිඉච්චෙතස්ස සරෙ වා බ්‍යඤ්ජනෙ වා පරෙ ක්වචි පටිආදෙසො හොති.
පටග්ගි දාතබ්බො, පටිහඤ්ඤති.
ක්වචීති කස්මා? පච්චන්තිමෙසු ජනපදෙසු, පතිලීයති, පතිරූපදෙසවාසො ච.
49. , 44. පුථස්සු බ්‍යඤ්ජනෙ.
පුථඉච්චෙතස්ස අන්තො සරො බ්‍යඤ්ජනෙ පරෙ උකාරො හොති.
පුථුජ්ජනො, පුථුභූතං.
අන්තග්ගහණෙන අපුථස්සාපි සරෙ පරෙ අන්තස්ස උකාරො හොති, මනුඤ්ඤං.
50. , 45. ඔ අවස්ස.
අවඉච්චෙතස්ස බ්‍යඤ්ජනෙ පරෙ ක්වචි ඔකාරො හොති.
අන්ධකාරෙන ඔනද්ධා.
ක්වචීති කස්මා? අවසුස්සතු මෙ සරීරෙ මංසලොහිතං.
51. , 59. අනුපදිට්ඨානං වුත්තයොගතො.
අනුපදිට්ඨානං උපසග්ගනිපාතානං සරසන්ධීහි බ්‍යඤ්ජනසන්ධීහි වුත්තසන්ධීහි ච යථායොගං යොජෙතබ්බං.
පාපනං, පරායණං, උපායනං, උපාහනං, න්‍යායොගො, නිගුපධි, අනුබොධො, දුවූපසන්තං, සුවූපසන්තං, ද්වාලයො, ස්වාලයො, දුරාඛ්‍යාතං, ස්වාඛ්‍යාතො, උදීරිතං, සමුද්දිට්ඨං, වියග්ගං, විජ්ඣග්ගං, බ්‍යග්ගං, අවයාගමනං, අන්වෙති, අනුපඝාතො, අනච්ඡරියං, පරියෙසනා, පරාමාසො, එවං සරෙ ච හොන්ති.
පරිග්ගහො, පග්ගහො, පක්කමො, පරක්කමො, නික්කමො, නික්කසාවො, නිල්ලයනං, දුල්ලයනං, දුම්භික්ඛං, දුබ්බුත්තං, සන්දිට්ඨං, දුග්ගහො, විග්ගහො, නිග්ගතො, අභික්කමො, පටික්කමො, එවං බ්‍යඤ්ජනෙ ච. සෙසා සබ්බෙ යොජෙතබ්බා.
ඉති සන්ධිකප්පෙ පඤ්චමො කණ්ඩො.
සන්ධිකප්පො නිට්ඨිතො.