ජිනවංසදීපං |ඔ0.0001|

නමො තස්ස භගවතො අරහතො සම්මාසම්බුද්ධස්ස

1. මහාදයො යො හදයො’දයො’දයො

හිතාය දුක්ඛානුභවෙ භවෙ භවෙ,

අකාසි සම්බොධිපදං පදං පදං

තමාභිවන්දාමි ජිනං ජිනං ජිනං; (යමකබන්ධනං)

2. |ඔ0.0002|

පහාය යත්ථා’භිරතිං රතිං රතිං

රමන්ති ධම්මෙව මුනී මුනී මුනී,

විමුත්තිදං සබ්බභවා භවා’භවා

තමාභිවන්දෙ මහිතං හිතං හිතං; (යමකබන්ධනං)

3. |ඔ0.0004|

නිපීතසද්ධම්මරසා රසා’රසා

සුපුඤ්ඤඛෙත්තො’රසතං සතං සතං,

ගතා විධූතා විනයෙන යෙන යෙ

තමාභිවන්දෙ’සිගණඞ්ගණ’ඞ්ගණං; (යමකබන්ධනං)

4. |ඔ0.0005|

ජිනා’නතම්භොරුහ හංසරාජිනී

ජිනොරසානං මුඛපඤ්ජරා’ලි නී,

සදත්ථසාරං සරසං විසූද නී

උපෙතු මෙ මානසමෙව වාණි නී;

5. කම්මාවසෙසා විචිතො’පජාත්‍යා

ගන්ථා’හිසඞ්ඛාරවිබන්ධකා මෙ,

පණාම පුඤ්ඤාතිසයෙන’නෙන

මා පාකදානා’වසරා භවන්තු;

6. සුවණ්ණවණ්ණස්ස ජිනස්ස වණ්ණං

වණ්ණෙය්‍ය කප්පම්පි කජිතො සුවණ්ණො,

කප්පස්සි’වොසාන මනත්තතාය

න පාපුණෙ බුද්ධගුණාන මන්තං;

7. |ඔ0.0006|

නිද්ධන්ත චාමීකර චාරු රූපං

සරස්සතී භූසණ භාසනංච,

අනඤ්ඤ සාධාරණ ඤාණමස්ස

අවාවියා’චින්තිය මපක්පමෙය්‍යං;

8. කුහිං අසාධාරණ රූප ලීලා

කුහිං අසාධාරණ වාණි ලීලා,

කුහිං අසාධාරණඤාණ ලීලා

කුහිං නු මෙ මන්දමතිස්ස ලීලා;

9. |ඔ0.0007|

විභාවිමානී පරවම්හිනො යෙ

ඉස්සා’භිමානෙන විභඤ්ඤමානා,

ගවෙසයන්තී’ධ පරස්ස රන්ධං

තෙසං පසංසාගරහාහි කිම්මෙ;

10. පසත්ථ සත්ථාගම පාරදස්සී

යෙ සාධවො සාධු ගුණප්පසන්තා,

ගන්ථස්ස නිම්මාණපරිස්සමං නො

ජානන්ති තෙයෙව ඉධප්පමාණා;

11. ආදිච්චවංසප්පභවස්ස තස්ස

ජිනස්ස සත්ථාගමකොවිදෙහි,

වුත්තොපි පුබ්බාචරියෙහි යෙසු

ගන්ථෙසු සඞ්ඛෙපවසෙන වංසො;

12. න තෙහි සක්කා සුගතස්ස වංසං

කිඤ්චාපි විඤ්ඤාතු මසෙසයිත්වා,

සම්පුණ්ණවංසස්ස විභාවනාය

තස්මා සමුස්සාහිත මානසෙන;

13. |ඔ0.0008|

අභිප්පසන්නො රතනත්තයම්හි

පසත්ථවංසප්පභවො පභුනං,

විභුසණො විස්සුතකිත්තිඝොසො

යො භාති ලඞ්කාය මුළාරභාග්‍යො;

14. අමන්දචාගා’භිරතස්ස

පුනන්දු නාමස්ස දයාධනස්ස,

බුද්ධෙ පසාදාතිසයස්ස තස්ස

අජ්ඣෙසනඤ්චාපි පටිග්ගහෙත්වා;

15. නස්සාය පුබ්බාචරියො’පදෙසං

සොතූන මත්ථාය මයා හිතාය,

නිරුත්තියා මාගධිකාය සම්මා

විධීයතෙ’දං ජිනවංසදීපං;

16. |ඔ0.0009|

සද්ධාසිනෙහානුගතාය පඤ්ඤා-

දසාය සොතූහි මනොවිමානෙ,

පදීපිතො’යං ජිනවංසදීප-

දීපොහරෙපාපතමප්පබන්ධං;

17. පුරඞ්ගපුණ්ණා සිරිජම්බුදීපෙ

සම්පත්තිභාරෙන දිවා’වතිණ්ණා,

යා දෙවරාජස්ස’මරාවතී’වා-

මරාවතීනාම පුරී පුරෙ’සී;

18. විජ්ජාධරානඤ්ච විහඞ්ගමානං

විබන්ධ වෙහාසගතිං බහාස,

යස්මිං පුරස්මිං ජිතවෙරි චක්කං

පාකාරචක්කං විය චක්කවාළං;

19. |ඔ0.0010|

සඤ්චුම්බිතම්හොජ රජො පබන්ධ-

සුපිඤ්ජරාපා පරිඛාහිරාමා,

පුරිත්ථි පාකාර නිතම්බභාගෙ

සමුබ්බහී කඤ්චන මෙඛලා’භං;

20. රත්තින්දිවා රත්තමණි’න්දනීල-

මණිප්පභාරඤ්ජිත රාජධානි,

බබන්ධ යා’මන්දසුරින්දචාප-

සමුජ්ජලාකාසතලබ්බිලාසං;

21. යහිංවධූනං වදනම්බුජෙහි

කතාවමානං හරිණඞ්කබිම්බං,

පභාහි නීලොපලතොරණාතං

සොකාභීභූතංච විවණ්ණමාප;

22. |ඔ0.0011|

සරොරුහ’න්තී මණිමන්දිරාභා-

සඤ්චුම්බිතං පුණ්ණසසඞ්කබිම්බං;

සඞ්කාය රාමාජනතා’භිරාමා

කරෙ පසාරෙසි පුරම්හි යස්මිං;

23. යත්ථ’ඞ්ගනානං පටිබිම්බිතානි

ආදාසභිත්තීසු මුඛම්බුජානි,

ආසුං විඝාතාය මධුබ්බතානං

විලොචනාලීන මනුග්ගහාය;

24. සම්මත්ත මාතඞ්ග ධරාධරෙහි

යස්මිං අභිස්සන්ද මදස්සවන්ති,

තුරඞ්ග රඞ්ගෙහී තරඞ්ග මාලා

සමාකුලෙවා’සි විධූත ධූලී;

25. |ඔ0.0012|

නික්ඛිත්තවීණා මණිනුපුරානං

විලාසිනීනං මුදුපාණි පාදෙ,

මත්තාලිමාලා කලනාදිනී කිං

නාලඞ්කරුං යත්ථ කතාවකාසා;

26. ධවත්ථිනීනං කුචසාරසෙහි

නෙත්තාලිභාරා’නනනීරජෙහි,

යා හාසවීචීහි පුරී රජන්‍යා

රරාජ සමඵුල්ලසරොජිනී’ව;

27. චන්දප්පභා චුම්බිත චන්දකන්ත

පාසාණධාරා මණිචන්දිකාසූ,

චන්දානනානං යහි මඞ්ගනාහං

පරිස්සමස්සො’පසමාය’හෙසුං;

28. |ඔ0.0013|

යස්මිං පූරෙ උද්ධමධො විනද්ධ-

ජුතිප්පබන්ධො මණිමන්දිරානං,

සමුබ්බහී ගෙරුක පඞ්ක දිද්ධ-

විතාන පච්චත්ථරණබ්බිලාසං

29. සුවණ්ණ මුත්තා මණි වංසවණ්ණා-

පවාළ රූපී වජිරෙහිඤ්චා’පි,

යා සත්තධඤ්ඤෙහි ධනෙහි ඵීතා

අහූ පුරි ධඤ්ඤවතී’ව නාරී; (සිලෙසබන්ධනං)

30. පසාරිතා’නෙකදිසාමුඛෙසු

විචිත්තවත්ථා’භරණාදිපූරා,

යත්ථා’පණා නිජ්ජිතකප්පරුක්ඛා

කරිංසු ලොකාභිමතත්ථසිද්ධිං;

31. |ඔ0.0014|

පරාගරත්තා මධුපාතිමත්තා

සම්හින්නවෙලා ඝනනීලවාලා,

හංසාසයා පඤ්චසරාභිරාමා

යස්මිං තළාකා විය කාමභොගී; (සිලෙසබන්ධනං)

32. පුරන්තරස්මිං රතනග්ඝිකානං

රංසිප්පබන්ධෙහි හතන්ධකාරෙ,

කුන්දාරවින්දබ්භුදයෙනයස්මිං

රත්තින්දිවාභෙද මවෙදි ලොකො;

33. |ඔ0.0015|

මාතඞ්ගජීමූතඝටාය ඝණ්ටා-

ටඞ්කාරගම්භීරරවාය යස්මිං,

පලම්භීතා මත්තසිඛණ්ඩිමාලා

අකා විකාලෙපි අඛණ්ඩකීළං;

34. පුරම්හි යස්මිං චරණම්බුජෙහි

වධූජතො බන්ධිතනූපුරෙහි,

විකාස කොකාසන සීස බද්ධ