තෙලකටාහගාථා |ඔ0.0001|

නමො තස්ස භගවතො අරහතො සම්මාසම්බුද්ධස්ස

1. ලංකිස්සරො ජයතු වාරණරාජගාමී

භොගින්දභොග රුචිරායත පීණ බාහු,

සාධුපචාරනිරතො ගුණසන්නිවාසො

ධම්මෙ ඨිතො වීගතකොධමදාවලෙපො;

2. යො සබ්බලොකමහිතො කරුණාධිවාසො

මොක්ඛාකරො රවිකුලම්බර පුණ්ණ චන්දො,

ඤෙය්‍යොදධිං සුවිපුලං සකලං විබුද්ධො

ලොකුත්තමං නමථ තං සිරසා මුනින්දං;

3. සොපානමාලමමලං තිදසාලයස්ස

සංසාර සාගරසමුත්තරණාය සෙතුං,

සබ්බාගතීභය විවජ්ජිත ඛෙම මග්ගං

ධම්මං නමස්සථ සදා මුනිනා පණීතං;

4. |ඔ0.0002|

දෙය්‍යං තදප්පමපි යත්ථ පසන්න චිත්තා

දත්වා නරා ඵලමුළාරතරං ලභන්තෙ,

තං සබ්බදා දසබලෙනපි සුප්පසත්ථං

සඞ්ඝං නමස්සථ සදාමිතපුඤ්ඤඛෙත්තං;

5. තෙජො බලෙන මහතා රතනත්තයස්ස

ලොකත්තයං සමධිගච්ඡති යෙන මොක්ඛං,

රක්ඛා න චත්ථි ච සමා රතනත්තයස්ස

තස්මා සදා භජථ තං රතනත්තයං භො;

6. ලංකිස්සරො පරහිතෙකරතො නිරාසො

රත්තිම්පි ජාගරරතො කරුණාධිවාසො,

ලොකං විබොධයති ලොකහිතාය කාමං

ධම්මං සමාචරථ ජාගරියානුයුත්තා;

7. |ඔ0.0003|

සත්තොපකාර නිරතා කුසලෙ සහායා

භො දුල්ලභා භුවි නරා විහතප්පමාදා,

ලංකාධිපං ගුණධනං කුසලෙ සහායං

ආගම්ම සංචරථ ධම්මමලං පමාදං;

8. ධම්මො තිලොක සරණො පරමො රසානං

ධම්මො මහග්ඝරතනො රතනෙසු ලොකෙ,

ධම්මො භවෙ තිභවදුක්ඛ විනාසහෙතු

ධම්මං සමාචරථ ජාගරියානුයුත්තා;

9. නිද්දං විනොදයථ භාවයථප්පමෙය්‍යං

දුක්ඛං අනිච්චම්පි චෙහ අනත්තතඤ්ච,

දෙහෙ රතිං ජහථ ජ ජජ්ජරභාජනාභො

ධම්මං සමාචරථ ජාගරියානුයුත්තා;

10. |ඔ0.0004|

ඔකාස මජ්ජ මම නත්ථි සුවෙ කරිස්සං

ධම්මං ඉතීහලසතා කුසලප්පයොගෙ,

නා’ලං තියද්ධසු තථා භුවනත්තයෙ ච

කාමං න චත්ථි මනුජො මරණා පමුත්තො;

11. ඛිත්තො යථා නභසි කෙනචිදෙව ලෙඩ්ඩු

භූමිං සමාපත්ති භාරතයා ඛණෙන,

ජාතත්තමෙව ඛලු කාරණමෙකමත්‍ර

ලොකං සදා නනු ධුවං මරණාය ගන්තුං;

12. කාමං නරස්ස පතතො ගිරිමුද්ධනාතො

මජ්ඣෙ න කිඤ්චි භයනිස්සරණාය හෙතු,

කාමං වජන්ති මරණං තිභවෙසු සත්තා

භොගෙ රතිං පජහථාපි ච ජීවිතෙ ච;

13. |ඔ0.0005|

කාමං පතන්ති මහියා ඛලු වස්සධාරා

විජ්ජුල්ලතා විතතමෙඝ මුඛා පමුත්තා,

එවං නරා මරණභීම පපාතමජ්ඣෙ

කාමං පතන්ති නහි කොචි භවෙසු නිච්චො;

14. වෙලාතටෙ පටුතරොරු තරංගමාලා

නාසං වජන්ති සතතං සලිලාලයස්ස,

නාසං තථා සමුපයන්ති නරාමරානං

පාණානි දාරුණතරෙ මරණොදධිම්හි;

15. රුද්ධොපි සො රථවරස්සගජාධිපෙහි

යොධෙහි චාපි සබලෙහි ච සායුධෙහි,

ලොකං විවංචිය සදා මරණූසභො සො

කාමං නිහන්ති භුවනත්තය සාලි දණ්ඩං;

16. |ඔ0.0006|

භො මාරුතෙන මහතා විහතො පදීපො

ඛිප්පං විනාස මුඛමෙති මහප්පභොපි,

ලොකෙ තථා මරණචණ්ඩ සමීරණෙන

ඛිප්පං විනස්සති නරායුමහා පදීපො;

17. රාමජ්ජුනප්පභූති භූපති පුංගවා ච

සූරා පුරෙ රණමුඛෙ විජිතාරි සඞ්ඝා,

තෙපීහ චණ්ඩ මරණොඝ නිමුග්ගදෙහා

නාසං ගතා ජගති කෙ මරණා පමුත්තා?

18. ලක්ඛී ච සාගරපටා සධරාධරා ච

සම්පත්තියො ච විවිධා අපි රූපසොභා,

සබ්බා ච තා අපි ච මිත්තසුතා ච දාරා

කෙ චාපි කං අනුගතා මරණං වජන්තං?

19. |ඔ0.0007|

බ්‍රහ්මාසුරාසුරගණා ච මහානුභාවා

ගන්ධබ්බකින්නරමහොරගරක්ඛසා ච,

තෙ චා පරෙ ච මරණග්ගිසිඛාය සබ්බෙ

අන්තෙ පතන්ති සලභා ඉව ඛීණපුඤ්ඤා;

20. යෙ සාරිපුත්තපමුඛා මුනිසාවකා ච

සුද්ධා සදාසවනුදා පරමිද්ධිපත්තා,

තෙ චාපි මච්චුවළභා මුඛ සන්නිමුග්ගා

දීපානිවානලහතා ඛයතං උපෙතා;

21. බුද්ධාපි බුද්ධකමලාමලචාරුනෙත්තා

බත්තිංසලක්ඛණ විරාජිත රූපසොභා,

සබ්බාසචක්ඛයකරාපි ච ලොකනාථා

සම්මද්දිතා මරණමත්තමහාගජෙන;

22. |ඔ0.0008|

රොගාතුරෙසු කරුණා න ජරාතුරෙසු

ඛිඩ්ඩාපරෙසු සුකුමාරකුමාරකෙසු,

ලොකං සදා හනති මච්චු මහාගජින්දො

දවානලො වනමිවාවරතං අසෙසං;

23. ආපුණ්ණතා න සලිලෙ න ජලාසයස්ස

කට්ඨස්ස චාපි බහුතා න හුතාසනස්ස,

භුත්වාන සො තිභූවනම්පි තථා අසෙසං

භො නිද්දයො න ඛලු පීතිමුපෙති මච්චු;

24. භො මොහ මොහිතතයා විවසො අධඤ්ඤො

ලොකො පතත්‍යපිපි මච්චුමුඛෙ සුභීමෙ,

භොගෙ රතිං සමුපයාති නිහීනපඤ්ඤො

දොලා තරඞ්ගචපලෙ සුපිනොපමෙය්‍යෙ;

25. |ඔ0.0009|

එකොපි මච්චුරභිහන්තුමලං තිලොකං

කිං නිද්දයා අපි ජරාමරණානුයායී,

කො වා කරෙය්‍ය විභසුවෙසු ච ජීවිතාසං

ජාතො නරො සුපින සංගම සන්නිභෙසු;

26. නිච්චාතුරං ජගදිදං සභයං සසොකං

දිස්වා ච කොධමදමොහජරාභිභූතං,

උබ්බෙගමත්තමපි යස්ස න විජ්ජතී චෙ

සො දාරුණොන මරණං වත තං ධිරත්ථු!

භො භො න පස්සථ ජරාසිධරඤ්හි මච්චු

මාහඤ්ඤමානමඛිලං සතතං තිලොකං,

කිං නිද්දයා නයථ වීතභයා තියාමං

ධම්මං සදා’සවනුදං චරථ’ප්පමත්තා;

28. |ඔ0.0010|

භාවෙථ භො මරණමාරවිවජ්ජනාය

ලොකෙ සදා මරණ සඤ්ඤමිමං යතත්තා,

එවඤ්හි භාවනරතස්ස නරස්ස තස්ස

තණ්හා පහීයති සරීරගතා අසෙසා;

29. රූපං ජරා පියතරං මලිනීකරොති

සබ්බං බලං හරති අත්තනි ඝොරරොගො,

නානූපභොග පරිරක්ඛිත මත්තභාවං

භො මච්චු සංහරති කිං ඵලමත්තභාවෙ?

30. කම්මානිලාපහතරොගතරංගභංගෙ

සංසාර සාගර මුඛෙ විතතෙ විපන්නා,

මා මාපමාදමකරිත්ථ කරොථ මොක්ඛං

දුක්ඛොදයො නනු පමාදමයං නරානං;

31. |ඔ0.0011|

භොගා ච මිත්තසුතපොරිස බන්ධවා ච

නාරී ච ජීවිතසමා අපි ඛෙත්තවත්ථු,

සබ්බානි තානි පරලොකමිතො වජන්තං

නානුබ්බජන්ති කුසලාකුසලංව ලොකෙ;

32. භො විජ්ජුචංචලතරෙ භවසාගරම්හි

ඛිත්තා පුරා කතමහාපවනෙන තෙන,

කාමං විභිජ්ජති ඛණෙන සරීරනාවා

හත්ථෙ කරොථ පරමං ගුණහත්ථසාරං;

33. නිච්චං විභිජ්ජතිහ ආමක භාජනංව

සංරක්ඛිතොපි බහුධා ඉහ අත්තභාවො,

ධම්මං සමාචරථ සග්ගපතිප්පතිට්ඨං

ධම්මො සුචිණ්ණමිහමෙව ඵලං දදාති;

34. |ඔ0.0012|

රන්ත්වා සදා පියතරෙ දිවි දෙවරජ්ජෙ

නම්හා චවන්ති විබුධා අපි ඛීණපුඤ්ඤා,

සබ්බං සුඛං දිවි භුවීහ වියොගනිට්ඨං

කො පඤ්ඤවා භවසුඛෙසු රතිං කරෙය්‍ය?

35. බුද්ධො සසාවකගණො ජගදෙකනාථො