၇. ဝိဿဇ္ဇနာဝါရော
၃၅၀. ယသ္မိံ သမယေ သမ္မုခါဝိနယေန စ သတိဝိနယေန စ အဓိကရဏံ ဝူပသမ္မတိ – ယတ္ထ သတိဝိနယော တတ္ထ သမ္မုခါဝိနယော၊ ယတ္ထ သမ္မုခါဝိနယော တတ္ထ သတိဝိနယော၊ န တတ္ထ အမူဠှဝိနယော၊ န တတ္ထ ပဋိညာတကရဏံ၊ န တတ္ထ ယေဘုယျသိကာ၊ န တတ္ထ တဿပါပိယသိကာ၊ န တတ္ထ တိဏဝတ္ထာရကော. ယသ္မိံ သမယေ သမ္မုခါဝိနယေန စ အမူဠှဝိနယေန စ။ပေ။ သမ္မုခါဝိနယေန စ ပဋိညာတကရဏေန စ။ပေ။ သမ္မုခါဝိနယေန စ ယေဘုယျသိကာယ စ။ပေ။ သမ္မုခါဝိနယေန စ တဿပါပိယသိကာယ စ။ပေ။ သမ္မုခါဝိနယေန စ တိဏဝတ္ထာရကေန စ အဓိကရဏံ ဝူပသမ္မတိ – ယတ္ထ တိဏဝတ္ထာရကော တတ္ထ သမ္မုခါဝိနယော၊ ယတ္ထ သမ္မုခါဝိနယော တတ္ထ တိဏဝတ္ထာရကော၊ န တတ္ထ သတိဝိနယော၊ န တတ္ထ အမူဠှဝိနယော၊ န တတ္ထ ပဋိညာတကရဏံ၊ န တတ္ထ ယေဘုယျသိကာ၊ န တတ္ထ တဿပါပိယသိကာ.