၃. အဓိကရဏမူလာဒိ

၃၄၃. စတုန္နံ အဓိကရဏာနံ ကတိ မူလာနိ၊ ကတိ သမုဋ္ဌာနာ? စတုန္နံ အဓိကရဏာနံ တေတ္တိံသ မူလာနိ၊ တေတ္တိံသ သမုဋ္ဌာနာ.

စတုန္နံ အဓိကရဏာနံ ကတမာနိ တေတ္တိံသ မူလာနိ? ဝိဝါဒါဓိကရဏဿ ဒွါဒသ မူလာနိ၊ အနုဝါဒါဓိကရဏဿ စုဒ္ဒသ မူလာနိ၊ အာပတ္တာဓိကရဏဿ ဆ မူလာနိ၊ ကိစ္စာဓိကရဏဿ ဧကံ မူလံ၊ သံဃော – စတုန္နံ အဓိကရဏာနံ ဣမာနိ တေတ္တိံသ မူလာနိ.

စတုန္နံ အဓိကရဏာနံ ကတမေ တေတ္တိံသ သမုဋ္ဌာနာ? ဝိဝါဒါဓိကရဏဿ အဋ္ဌာရသဘေဒကရဝတ္ထူနိ သမုဋ္ဌာနာ၊ အနုဝါဒါဓိကရဏဿ စတဿော ဝိပတ္တိယော သမုဋ္ဌာနာ၊ အာပတ္တာဓိကရဏဿ သတ္တာပတ္တိက္ခန္ဓာ သမုဋ္ဌာနာ၊ ကိစ္စာဓိကရဏဿ စတ္တာရိ ကမ္မာနိ သမုဋ္ဌာနာ – စတုန္နံ အဓိကရဏာနံ ဣမေ တေတ္တိံသ သမုဋ္ဌာနာ.