၅. နဝသင်္ဂဟဝဂ္ဂေါ

၅၀၁. နဝသင်္ဂဟာ – ဝတ္ထုသင်္ဂဟော၊ ဝိပတ္တိသင်္ဂဟော အာပတ္တိသင်္ဂဟော၊ နိဒါနသင်္ဂဟော၊ ပုဂ္ဂလသင်္ဂဟော၊ ခန္ဓသင်္ဂဟော၊ သမုဋ္ဌာနသင်္ဂဟော၊ အဓိကရဏသင်္ဂဟော၊ သမထသင်္ဂဟောတိ.

အဓိကရဏေ သမုပ္ပန္နေ သစေ ဥဘော အတ္ထပစ္စတ္ထိကာ အာဂစ္ဆန္တိ ဥဘိန္နမ္ပိ ဝတ္ထု အာရောစာပေတဗ္ဗံ. ဥဘိန္နမ္ပိ ဝတ္ထု အာရောစာပေတွာ ဥဘိန္နမ္ပိ ပဋိညာ သောတဗ္ဗာ. ဥဘိန္နမ္ပိ ပဋိညံ သုတွာ ဥဘောပိ ဝတ္တဗ္ဗာ – ‘‘အမှာကံ ဣမသ္မိံ အဓိကရဏေ ဝူပသမိတေ [ဝူပသမေပိ (က.)] ဥဘောပိ တုဋ္ဌာ ဘဝိဿထာ’’တိ. သစေ အာဟံသု – ‘‘ဥဘောပိ တုဋ္ဌာ ဘဝိဿာမာ’’တိ၊ သံဃေန တံ အဓိကရဏံ သမ္ပဋိစ္ဆိတဗ္ဗံ. သစေ အလဇ္ဇုဿန္နာ ဟောတိ၊ ပရိသာ ဥဗ္ဗာဟိကာယ ဝူပသမေတဗ္ဗံ. သစေ ဗာလုဿန္နာ ဟောတိ၊ ပရိသာ ဝိနယဓရော ပရိယေသိတဗ္ဗော ယေန ဓမ္မေန ယေန ဝိနယေန ယေန သတ္ထုသာသနေန တံ အဓိကရဏံ ဝူပသမ္မတိ. တထာ တံ အဓိကရဏံ ဝူပသမေတဗ္ဗံ.

ဝတ္ထု ဇာနိတဗ္ဗံ၊ ဂေါတ္တံ ဇာနိတဗ္ဗံ၊ နာမံ ဇာနိတဗ္ဗံ၊ အာပတ္တိ ဇာနိတဗ္ဗာ.

မေထုနဓမ္မောတိ ဝတ္ထု စေဝ ဂေါတ္တဉ္စ – ပါရာဇိကန္တိ နာမဉ္စေဝ အာပတ္တိ စ.

အဒိန္နာဒါနန္တိ ဝတ္ထု စေဝ ဂေါတ္တဉ္စ – ပါရာဇိကန္တိ နာမဉ္စေဝ အာပတ္တိ စ.

မနုဿဝိဂ္ဂဟောတိ ဝတ္ထု စေဝ ဂေါတ္တဉ္စ – ပါရာဇိကန္တိ နာမဉ္စေဝ အာပတ္တိ စ.

ဥတ္တရိမနုဿဓမ္မောတိ ဝတ္ထု စေဝ ဂေါတ္တဉ္စ – ပါရာဇိကန္တိ နာမဉ္စေဝ အာပတ္တိ စ.

သုက္ကဝိဿဋ္ဌီတိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ကာယသံသဂ္ဂေါတိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ဒုဋ္ဌုလ္လဝါစာတိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

အတ္တကာမန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

သဉ္စရိတ္တန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

သညာစိကာယ ကုဋိံ ကာရာပနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

မဟလ္လကံ ဝိဟာရံ ကာရာပနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

သံဃဘေဒကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ဘေဒကာနုဝတ္တကာနံ ဘိက္ခူနံ ယာဝတတိယံ သမနုဘာသနာယ န ပဋိနိဿဇ္ဇနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ဒုဗ္ဗစဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ.

ကုလဒူသကဿ ဘိက္ခုနော ယာဝတတိယံ သမနုဘာသနာယ န ပဋိနိဿဇ္ဇနန္တိ ဝတ္ထု စေဝ ဂေါတ္တဉ္စ – သံဃာဒိသေသောတိ နာမဉ္စေဝ အာပတ္တိ စ။ပေ။.

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏန္တိ ဝတ္ထု စေဝ ဂေါတ္တဉ္စ – ဒုက္ကဋန္တိ နာမဉ္စေဝ အာပတ္တိ စာတိ.

နဝသင်္ဂဟဝဂ္ဂေါ နိဋ္ဌိတော ပဉ္စမော.