၁. ကမ္မဝဂ္ဂေါ

၄၈၂. စတ္တာရိ ကမ္မာနိ. အပလောကနကမ္မံ၊ ဉတ္တိကမ္မံ၊ ဉတ္တိဒုတိယကမ္မံ၊ ဉတ္တိစတုတ္ထကမ္မံ – ဣမာနိ စတ္တာရိ ကမ္မာနိ. ကတိဟာကာရေဟိ ဝိပဇ္ဇန္တိ? ဣမာနိ စတ္တာရိ ကမ္မာနိ ပဉ္စဟာကာရေဟိ ဝိပဇ္ဇန္တိ – ဝတ္ထုတော ဝါ ဉတ္တိတော ဝါ အနုဿာဝနတော ဝါ သီမတော ဝါ ပရိသတော ဝါ.

၄၈၃. ကထံ ဝတ္ထုတော ကမ္မာနိ ဝိပဇ္ဇန္တိ? သမ္မုခါကရဏီယံ ကမ္မံ အသမ္မုခါ ကရောတိ၊ ဝတ္ထုဝိပန္နံ အဓမ္မကမ္မံ၊ ပဋိပုစ္ဆာကရဏီယံ ကမ္မံ အပဋိပုစ္ဆာ ကရောတိ၊ ဝတ္ထုဝိပန္နံ အဓမ္မကမ္မံ၊ ပဋိညာယ ကရဏီယံ ကမ္မံ အပဋိညာယ ကရောတိ၊ ဝတ္ထုဝိပန္နံ အဓမ္မကမ္မံ၊ သတိဝိနယာရဟဿ အမူဠှဝိနယံ ဒေတိ၊ ဝတ္ထုဝိပန္နံ အဓမ္မကမ္မံ၊ အမူဠှဝိနယာရဟဿ တဿပါပိယသိကာကမ္မံ ကရောတိ၊ ဝတ္ထုဝိပန္နံ အဓမ္မကမ္မံ၊ တဿပါပိယသိကာကမ္မာရဟဿ တဇ္ဇနီယကမ္မံ ကရောတိ၊ ဝတ္ထုဝိပန္နံ အဓမ္မကမ္မံ၊ တဇ္ဇနီယကမ္မာရဟဿ နိယဿကမ္မံ ကရောတိ၊ ဝတ္ထုဝိပန္နံ အဓမ္မကမ္မံ၊ နိယဿကမ္မာရဟဿ ပဗ္ဗာဇနီယကမ္မံ ကရောတိ၊ ဝတ္ထုဝိပန္နံ အဓမ္မကမ္မံ၊ ပဗ္ဗာဇနီယကမ္မာရဟဿ ပဋိသာရဏီယကမ္မံ ကရောတိ၊ ဝတ္ထုဝိပန္နံ အဓမ္မကမ္မံ၊ ပဋိသာရဏီယကမ္မာရဟဿ ဥက္ခေပနီယကမ္မံ ကရောတိ၊ ဝတ္ထုဝိပန္နံ အဓမ္မကမ္မံ၊ ဥက္ခေပနီယကမ္မာရဟဿ ပရိဝါသံ ဒေတိ၊ ဝတ္ထုဝိပန္နံ အဓမ္မကမ္မံ၊ ပရိဝါသာရဟံ မူလာယ ပဋိကဿတိ၊ ဝတ္ထုဝိပန္နံ အဓမ္မကမ္မံ၊ မူလာယပဋိကဿနာရဟဿ မာနတ္တံ ဒေတိ၊ ဝတ္ထုဝိပန္နံ အဓမ္မကမ္မံ၊ မာနတ္တာရဟံ အဗ္ဘေတိ၊ ဝတ္ထုဝိပန္နံ အဓမ္မကမ္မံ၊ အဗ္ဘာနာရဟံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ၊ အနုပေါသထေ ဥပေါသထံ ကရောတိ၊ ဝတ္ထုဝိပန္နံ အဓမ္မကမ္မံ၊ အပဝါရဏာယ ပဝါရေတိ၊ ဝတ္ထုဝိပန္နံ အဓမ္မကမ္မံ. ဧဝံ ဝတ္ထုတော ကမ္မာနိ ဝိပဇ္ဇန္တိ.

၄၈၄. ကထံ ဉတ္တိတော ကမ္မာနိ ဝိပဇ္ဇန္တိ? ပဉ္စဟာကာရေဟိ ဉတ္တိတော ကမ္မာနိ ဝိပဇ္ဇန္တိ – ဝတ္ထုံ န ပရာမသတိ၊ သံဃံ န ပရာမသတိ၊ ပုဂ္ဂလံ န ပရာမသတိ၊ ဉတ္တိံ န ပရာမသတိ၊ ပစ္ဆာ ဝါ ဉတ္တိံ ဌပေတိ – ဣမေဟိ ပဉ္စဟာကာရေဟိ ဉတ္တိတော ကမ္မာနိ ဝိပဇ္ဇန္တိ.

၄၈၅. ကထံ အနုဿာဝနတော ကမ္မာနိ ဝိပဇ္ဇန္တိ? ပဉ္စဟာကာရေဟိ အနုဿာဝနတော ကမ္မာနိ ဝိပဇ္ဇန္တိ – ဝတ္ထုံ န ပရာမသတိ၊ သံဃံ န ပရာမသတိ၊ ပုဂ္ဂလံ န ပရာမသတိ၊ သာဝနံ ဟာပေတိ၊ အကာလေ ဝါ သာဝေတိ – ဣမေဟိ ပဉ္စဟာကာရေဟိ အနုဿာဝနတော ကမ္မာနိ ဝိပဇ္ဇန္တိ.

၄၈၆. ကထံ သီမတော ကမ္မာနိ ဝိပဇ္ဇန္တိ? ဧကာဒသဟိ အာကာရေဟိ သီမတော ကမ္မာနိ ဝိပဇ္ဇန္တိ – အတိခုဒ္ဒကံ သီမံ သမ္မန္နတိ၊ အတိမဟတိံ သီမံ သမ္မန္နတိ၊ ခဏ္ဍနိမိတ္တံ သီမံ သမ္မန္နတိ၊ ဆာယာနိမိတ္တံ သီမံ သမ္မန္နတိ၊ အနိမိတ္တံ သီမံ သမ္မန္နတိ၊ ဗဟိသီမေ ဌိတော သီမံ သမ္မန္နတိ၊ နဒိယာ သီမံ သမ္မန္နတိ၊ သမုဒ္ဒေ သီမံ သမ္မန္နတိ၊ ဇာတဿရေ သီမံ သမ္မန္နတိ၊ သီမာယ သီမံ သမ္ဘိန္ဒတိ၊ သီမာယ သီမံ အဇ္ဈောတ္ထရတိ – ဣမေဟိ ဧကာဒသဟိ အာကာရေဟိ သီမတော ကမ္မာနိ ဝိပဇ္ဇန္တိ.

၄၈၇. ကထံ ပရိသတော ကမ္မာနိ ဝိပဇ္ဇန္တိ? ဒွါဒသဟိ အာကာရေဟိ ပရိသတော ကမ္မာနိ ဝိပဇ္ဇန္တိ – စတုဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အနာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ၊ စတုဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ၊ စတုဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အာဂတာ ဟောန္တိ၊ ဆန္ဒာရဟာနံ ဆန္ဒော အာဟဋော ဟောတိ၊ သမ္မုခီဘူတာ ပဋိက္ကောသန္တိ. ပဉ္စဝဂ္ဂကရဏေ ကမ္မေ။ပေ။ ဒသဝဂ္ဂကရဏေ ကမ္မေ။ပေ။ ဝီသတိဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အနာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ၊ ဝီသတိဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ၊ တေ အာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ၊ ဝီသတိဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ၊ တေ အာဂတာ ဟောန္တိ၊ ဆန္ဒာရဟာနံ ဆန္ဒော အာဟဋော ဟောတိ သမ္မုခီဘူတာ ပဋိက္ကောသန္တိ – ဣမေဟိ ဒွါဒသဟိ အာကာရေဟိ ပရိသတော ကမ္မာနိ ဝိပဇ္ဇန္တိ.

၄၈၈. စတုဝဂ္ဂကရဏေ ကမ္မေ စတ္တာရော ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော. ပဉ္စဝဂ္ဂကရဏေ ကမ္မေ ပဉ္စ ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော. ဒသဝဂ္ဂကရဏေ ကမ္မေ ဒသ ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော. ဝီသတိဝဂ္ဂကရဏေ ကမ္မေ ဝီသတိ ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော.

၄၈၉. စတ္တာရိ ကမ္မာနိ – အပလောကနကမ္မံ၊ ဉတ္တိကမ္မံ၊ ဉတ္တိဒုတိယကမ္မံ၊ ဉတ္တိစတုတ္ထကမ္မံ. ဣမာနိ စတ္တာရိ ကမ္မာနိ ကတိဟာကာရေဟိ ဝိပဇ္ဇန္တိ? ဣမာနိ စတ္တာရိ ကမ္မာနိ ပဉ္စဟာကာရေဟိ ဝိပဇ္ဇန္တိ – ဝတ္ထုတော ဝါ ဉတ္တိတော ဝါ အနုဿာဝနတော ဝါ သီမတော ဝါ ပရိသတော ဝါ.

၄၉၀. ကထံ ဝတ္ထုတော ကမ္မာနိ ဝိပဇ္ဇန္တိ? ပဏ္ဍကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. ထေယျသံဝါသကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. တိတ္ထိယပက္ကန္တကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. တိရစ္ဆာနဂတံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. မာတုဃာတကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. ပိတုဃာတကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. အရဟန္တဃာတကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. ဘိက္ခုနိဒူသကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. သံဃဘေဒကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. လောဟိတုပ္ပါဒကံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. ဥဘတောဗျဉ္ဇနံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. ဦနဝီသတိဝဿံ ပုဂ္ဂလံ ဥပသမ္ပာဒေတိ၊ ဝတ္ထုဝိပန္နံ အဓမ္မကမ္မံ. ဧဝံ ဝတ္ထုတော ကမ္မာနိ ဝိပဇ္ဇန္တိ.

၄၉၁. ကထံ ဉတ္တိတော ကမ္မာနိ ဝိပဇ္ဇန္တိ? ပဉ္စဟာကာရေဟိ ဉတ္တိတော ကမ္မာနိ ဝိပဇ္ဇန္တိ. ဝတ္ထုံ န ပရာမသတိ၊ သံဃံ န ပရာမသတိ၊ ပုဂ္ဂလံ န ပရာမသတိ၊ ဉတ္တိံ န ပရာမသတိ၊ ပစ္ဆာ ဝါ ဉတ္တိံ ဌပေတိ – ဣမေဟိ ပဉ္စဟာကာရေဟိ ဉတ္တိတော ကမ္မာနိ ဝိပဇ္ဇန္တိ.

၄၉၂. ကထံ အနုဿာဝနတော ကမ္မာနိ ဝိပဇ္ဇန္တိ? ပဉ္စဟာကာရေဟိ အနုဿာဝနတော ကမ္မာနိ ဝိပဇ္ဇန္တိ – ဝတ္ထုံ န ပရာမသတိ၊ သံဃံ န ပရာမသတိ၊ ပုဂ္ဂလံ န ပရာမသတိ၊ သာဝနံ ဟာပေတိ၊ အကာလေ ဝါ သာဝေတိ – ဣမေဟိ ပဉ္စဟာကာရေဟိ အနုဿာဝနတော ကမ္မာနိ ဝိပဇ္ဇန္တိ.

၄၉၃. ကထံ သီမတော ကမ္မာနိ ဝိပဇ္ဇန္တိ? ဧကာဒသဟိ အာကာရေဟိ သီမတော ကမ္မာနိ ဝိပဇ္ဇန္တိ. အတိခုဒ္ဒကံ သီမံ သမ္မန္နတိ၊ အတိမဟတိံ သီမံ သမ္မန္နတိ၊ ခဏ္ဍနိမိတ္တံ သီမံ သမ္မန္နတိ၊ ဆာယာနိမိတ္တံ သီမံ သမ္မန္နတိ၊ အနိမိတ္တံ သီမံ သမ္မန္နတိ၊ ဗဟိသီမေ ဌိတော သီမံ သမ္မန္နတိ၊ နဒိယာ သီမံ သမ္မန္နတိ၊ သမုဒ္ဒေ သီမံ သမ္မန္နတိ၊ ဇာတဿရေ သီမံ သမ္မန္နတိ၊ သီမာယ သီမံ သမ္ဘိန္ဒတိ၊ သီမာယ သီမံ အဇ္ဈောတ္ထရတိ – ဣမေဟိ ဧကာဒသဟိ အာကာရေဟိ သီမတော ကမ္မာနိ ဝိပဇ္ဇန္တိ.

၄၉၄. ကထံ ပရိသတော ကမ္မာနိ ဝိပဇ္ဇန္တိ? ဒွါဒသဟိ အာကာရေဟိ ပရိသတော ကမ္မာနိ ဝိပဇ္ဇန္တိ – စတုဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အနာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ၊ စတုဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ. စတုဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အာဂတာ ဟောန္တိ၊ ဆန္ဒာရဟာနံ ဆန္ဒော အာဟဋော ဟောတိ သမ္မုခီဘူတာ ပဋိက္ကောသန္တိ. ပဉ္စဝဂ္ဂကရဏေ ကမ္မေ။ပေ။ ဒသဝဂ္ဂကရဏေ ကမ္မေ။ပေ။ ဝီသတိဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အနာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ. ဝီသတိဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အာဂတာ ဟောန္တိ၊ ဆန္ဒာရဟာနံ ဆန္ဒော အနာဟဋော ဟောတိ၊ သမ္မုခီဘူတာ ပဋိက္ကောသန္တိ. ဝီသတိဝဂ္ဂကရဏေ ကမ္မေ ယာဝတိကာ ဘိက္ခူ ကမ္မပတ္တာ တေ အာဂတာ ဟောန္တိ၊ ဆန္ဒာရဟာနံ ဆန္ဒော အာဟဋော ဟောတိ၊ သမ္မုခီဘူတာ ပဋိက္ကောသန္တိ – ဣမေဟိ ဒွါဒသဟိ အာကာရေဟိ ပရိသတော ကမ္မာနိ ဝိပဇ္ဇန္တိ.

၄၉၅. အပလောကနကမ္မံ ကတိ ဌာနာနိ ဂစ္ဆတိ? ဉတ္တိကမ္မံ ကတိ ဌာနာနိ ဂစ္ဆတိ? ဉတ္တိဒုတိယကမ္မံ ကတိ ဌာနာနိ ဂစ္ဆတိ? ဉတ္တိစတုတ္ထကမ္မံ ကတိ ဌာနာနိ ဂစ္ဆတိ? အပလောကနကမ္မံ ပဉ္စ ဌာနာနိ ဂစ္ဆတိ. ဉတ္တိကမ္မံ နဝ ဌာနာနိ ဂစ္ဆတိ. ဉတ္တိဒုတိယကမ္မံ သတ္တ ဌာနာနိ ဂစ္ဆတိ. ဉတ္တိစတုတ္ထကမ္မံ သတ္တ ဌာနာနိ ဂစ္ဆတိ.

၄၉၆. အပလောကနကမ္မံ ကတမာနိ ပဉ္စ ဌာနာနိ ဂစ္ဆတိ? ဩသာရဏံ၊ နိဿာရဏံ၊ ဘဏ္ဍုကမ္မံ၊ ဗြဟ္မဒဏ္ဍံ၊ ကမ္မလက္ခဏညေဝ ပဉ္စမံ – အပလောကနကမ္မံ ဣမာနိ ပဉ္စ ဌာနာနိ ဂစ္ဆတိ. ဉတ္တိကမ္မံ ကတမာနိ နဝ ဌာနာနိ ဂစ္ဆတိ? ဩသာရဏံ၊ နိဿာရဏံ၊ ဥပေါသထံ၊ ပဝါရဏံ၊ သမ္မုတိံ၊ ဒါနံ၊ ပဋိဂ္ဂဟံ၊ ပစ္စုက္ကဍ္ဎနံ၊ ကမ္မလက္ခဏညေဝ နဝမံ – ဉတ္တိကမ္မံ ဣမာနိ နဝ ဌာနာနိ ဂစ္ဆတိ. ဉတ္တိဒုတိယကမ္မံ ကတမာနိ သတ္တ ဌာနာနိ ဂစ္ဆတိ? ဩသာရဏံ၊ နိဿာရဏံ၊ သမ္မုတိံ၊ ဒါနံ၊ ဥဒ္ဓရဏံ၊ ဒေသနံ၊ ကမ္မလက္ခဏညေဝ သတ္တမံ – ဉတ္တိဒုတိယကမ္မံ ဣမာနိ သတ္တ ဌာနာနိ ဂစ္ဆတိ. ဉတ္တိစတုတ္ထကမ္မံ ကတမာနိ သတ္တ ဌာနာနိ ဂစ္ဆတိ? ဩသာရဏံ၊ နိဿာရဏံ၊ သမ္မုတိံ၊ ဒါနံ၊ နိဂ္ဂဟံ၊ သမနုဘာသနံ၊ ကမ္မလက္ခဏညေဝ သတ္တမံ – ဉတ္တိစတုတ္ထကမ္မံ ဣမာနိ သတ္တ ဌာနာနိ ဂစ္ဆတိ.

၄၉၇. စတုဝဂ္ဂကရဏေ ကမ္မေ စတ္တာရော ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော. ပဉ္စဝဂ္ဂကရဏေ ကမ္မေ ပဉ္စ ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော. ဒသဝဂ္ဂကရဏေ ကမ္မေ ဒသ ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော. ဝီသတိဝဂ္ဂကရဏေ ကမ္မေ ဝီသတိ ဘိက္ခူ ပကတတ္တာ ကမ္မပတ္တာ၊ အဝသေသာ ပကတတ္တာ ဆန္ဒာရဟာ. ယဿ သံဃော ကမ္မံ ကရောတိ သော နေဝ ကမ္မပတ္တော နာပိ ဆန္ဒာရဟော၊ အပိ စ ကမ္မာရဟော.

ကမ္မဝဂ္ဂေါ နိဋ္ဌိတော ပဌမော.