၁. ပါရာဇိကံ

၄၇၀. အတ္ထာပတ္တိ အစိတ္တကော အာပဇ္ဇတိ၊ သစိတ္တကော ဝုဋ္ဌာတိ. အတ္ထာပတ္တိ သစိတ္တကော အာပဇ္ဇတိ၊ အစိတ္တကော ဝုဋ္ဌာတိ. အတ္ထာပတ္တိ အစိတ္တကော အာပဇ္ဇတိ၊ အစိတ္တကော ဝုဋ္ဌာတိ. အတ္ထာပတ္တိ သစိတ္တကော အာပဇ္ဇတိ၊ သစိတ္တကော ဝုဋ္ဌာတိ. အတ္ထာပတ္တိ ကုသလစိတ္တော အာပဇ္ဇတိ၊ ကုသလစိတ္တော ဝုဋ္ဌာတိ. အတ္ထာပတ္တိ ကုသလစိတ္တော အာပဇ္ဇတိ၊ အကုသလစိတ္တော ဝုဋ္ဌာတိ. အတ္ထာပတ္တိ ကုသလစိတ္တော အာပဇ္ဇတိ၊ အဗျာကတစိတ္တော ဝုဋ္ဌာတိ. အတ္ထာပတ္တိ အကုသလစိတ္တော အာပဇ္ဇတိ၊ ကုသလစိတ္တော ဝုဋ္ဌာတိ. အတ္ထာပတ္တိ အကုသလစိတ္တော အာပဇ္ဇတိ၊ အကုသလစိတ္တော ဝုဋ္ဌာတိ. အတ္ထာပတ္တိ အကုသလစိတ္တော အာပဇ္ဇတိ၊ အဗျာကတစိတ္တော ဝုဋ္ဌာတိ. အတ္ထာပတ္တိ အဗျာကတစိတ္တော အာပဇ္ဇတိ၊ ကုသလစိတ္တော ဝုဋ္ဌာတိ. အတ္ထာပတ္တိ အဗျာကတစိတ္တော အာပဇ္ဇတိ၊ အကုသလစိတ္တော ဝုဋ္ဌာတိ. အတ္ထာပတ္တိ အဗျာကတစိတ္တော အာပဇ္ဇတိ၊ အဗျာကတစိတ္တော ဝုဋ္ဌာတိ.

ပဌမံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? ပဌမံ ပါရာဇိကံ ဧကေန သမုဋ္ဌာနေန သမုဋ္ဌာတိ. ကာယတော စ စိတ္တတော စ သမုဋ္ဌာတိ၊ န ဝါစတော.

ဒုတိယံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? ဒုတိယံ ပါရာဇိကံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ.

တတိယံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? တတိယံ ပါရာဇိကံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ.

စတုတ္ထံ ပါရာဇိကံ ကတိဟိ သမုဋ္ဌာနေဟိ သမုဋ္ဌာတိ? စတုတ္ထံ ပါရာဇိကံ တီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ စိတ္တတော စ သမုဋ္ဌာတိ၊ န ဝါစတော၊ သိယာ ဝါစတော စ စိတ္တတော စ သမုဋ္ဌာတိ၊ န ကာယတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ.

စတ္တာရော ပါရာဇိကာ နိဋ္ဌိတာ.