၇. မုသာဝါဒဝဂ္ဂေါ

၄၄၄. ‘‘ကတိ နု ခေါ၊ ဘန္တေ၊ မုသာဝါဒါ’’တိ? ‘‘ပဉ္စိမေ၊ ဥပါလိ၊ မုသာဝါဒါ. ကတမေ ပဉ္စ? အတ္ထိ မုသာဝါဒေါ ပါရာဇိကဂါမီ၊ အတ္ထိ မုသာဝါဒေါ သံဃာဒိသေသဂါမီ၊ အတ္ထိ မုသာဝါဒေါ ထုလ္လစ္စယဂါမီ၊ အတ္ထိ မုသာဝါဒေါ ပါစိတ္တိယဂါမီ၊ အတ္ထိ မုသာဝါဒေါ ဒုက္ကဋဂါမီ – ဣမေ ခေါ၊ ဥပါလိ၊ ပဉ္စ မုသာဝါဒါ’’တိ.

၄၄၅. ‘‘ကတိဟိ နု ခေါ၊ ဘန္တေ၊ အင်္ဂေဟိ သမန္နာဂတဿ ဘိက္ခုနော သံဃမဇ္ဈေ ဥပေါသထံ ဝါ ပဝါရဏံ ဝါ ဌပေန္တဿ – ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ဥပေါသထော ဝါ ပဝါရဏာ ဝါ ကာတဗ္ဗာ’’တိ? ‘‘ပဉ္စဟုပါလိ၊ အင်္ဂေဟိ သမန္နာဂတဿ ဘိက္ခုနော သံဃမဇ္ဈေ ဥပေါသထံ ဝါ ပဝါရဏံ ဝါ ဌပေန္တဿ – ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ဥပေါသထော ဝါ ပဝါရဏာ ဝါ ကာတဗ္ဗာ. ကတမေဟိ ပဉ္စဟိ? အလဇ္ဇီ စ ဟောတိ၊ ဗာလော စ၊ အပကတတ္တော စ၊ စာဝနာဓိပ္ပါယော ဝတ္တာ ဟောတိ၊ နော ဝုဋ္ဌာနာဓိပ္ပါယော – ဣမေဟိ ခေါ၊ ဥပါလိ၊ ပဉ္စဟင်္ဂေဟိ သမန္နာဂတဿ ဘိက္ခုနော သံဃမဇ္ဈေ ဥပေါသထံ ဝါ ပဝါရဏံ ဝါ ဌပေန္တဿ – ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ဥပေါသထော ဝါ ပဝါရဏာ ဝါ ကာတဗ္ဗာ.

‘‘အပရေဟိပိ၊ ဥပါလိ၊ ပဉ္စဟင်္ဂေဟိ သမန္နာဂတဿ ဘိက္ခုနော သံဃမဇ္ဈေ ဥပေါသထံ ဝါ ပဝါရဏံ ဝါ ဌပေန္တဿ – ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ဥပေါသထော ဝါ ပဝါရဏာ ဝါ ကာတဗ္ဗာ. ကတမေဟိ ပဉ္စဟိ? အပရိသုဒ္ဓကာယသမာစာရော ဟောတိ၊ အပရိသုဒ္ဓဝစီသမာစာရော ဟောတိ၊ အပရိသုဒ္ဓါဇီဝေါ ဟောတိ၊ ဗာလော ဟောတိ အဗျတ္တော၊ ဘဏ္ဍနကာရကော ဟောတိ ကလဟကာရကော – ဣမေဟိ ခေါ၊ ဥပါလိ၊ ပဉ္စဟင်္ဂေဟိ သမန္နာဂတဿ ဘိက္ခုနော သံဃမဇ္ဈေ ဥပေါသထံ ဝါ ပဝါရဏံ ဝါ ဌပေန္တဿ – ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ဥပေါသထော ဝါ ပဝါရဏာ ဝါ ကာတဗ္ဗာ’’တိ.

၄၄၆. ‘‘ကတိဟိ နု ခေါ၊ ဘန္တေ၊ အင်္ဂေဟိ သမန္နာဂတဿ ဘိက္ခုနော အနုယောဂေါ န ဒါတဗ္ဗော’’တိ? ‘‘ပဉ္စဟုပါလိ၊ အင်္ဂေဟိ သမန္နာဂတဿ ဘိက္ခုနော အနုယောဂေါ န ဒါတဗ္ဗော. ကတမေဟိ ပဉ္စဟိ? အာပတ္တာနာပတ္တိံ န ဇာနာတိ၊ လဟုကဂရုကံ အာပတ္တိံ န ဇာနာတိ၊ သာဝသေသာနဝသေသံ အာပတ္တိံ န ဇာနာတိ၊ ဒုဋ္ဌုလ္လာဒုဋ္ဌုလ္လံ အာပတ္တိံ န ဇာနာတိ၊ သပ္ပဋိကမ္မာပဋိကမ္မံ အာပတ္တိံ န ဇာနာတိ – ဣမေဟိ ခေါ၊ ဥပါလိ၊ ပဉ္စဟင်္ဂေဟိ သမန္နာဂတဿ ဘိက္ခုနော အနုယောဂေါ န ဒါတဗ္ဗော.

‘‘ပဉ္စဟုပါလိ၊ အင်္ဂေဟိ သမန္နာဂတဿ ဘိက္ခုနော အနုယောဂေါ ဒါတဗ္ဗော. ကတမေဟိ ပဉ္စဟိ? အာပတ္တာနာပတ္တိံ ဇာနာတိ၊ လဟုကဂရုကံ အာပတ္တိံ ဇာနာတိ၊ သာဝသေသာနဝသေသံ အာပတ္တိံ ဇာနာတိ၊ ဒုဋ္ဌုလ္လာဒုဋ္ဌုလ္လံ အာပတ္တိံ ဇာနာတိ၊ သပ္ပဋိကမ္မာပဋိကမ္မံ အာပတ္တိံ ဇာနာတိ – ဣမေဟိ ခေါ၊ ဥပါလိ၊ ပဉ္စဟင်္ဂေဟိ သမန္နာဂတဿ ဘိက္ခုနော အနုယောဂေါ ဒါတဗ္ဗော’’တိ.

၄၄၇. ‘‘ကတိဟိ နု ခေါ၊ ဘန္တေ၊ အာကာရေဟိ ဘိက္ခု အာပတ္တိံ အာပဇ္ဇတီ’’တိ? ‘‘ပဉ္စဟုပါလိ၊ အာကာရေဟိ ဘိက္ခု အာပတ္တိံ အာပဇ္ဇတိ. ကတမေဟိ ပဉ္စဟိ? အလဇ္ဇိတာ၊ အညာဏတာ၊ ကုက္ကုစ္စပကတတာ၊ အကပ္ပိယေ ကပ္ပိယသညိတာ၊ ကပ္ပိယေ အကပ္ပိယသညိတာ – ဣမေဟိ ခေါ၊ ဥပါလိ၊ ပဉ္စဟာကာရေဟိ ဘိက္ခု အာပတ္တိံ အာပဇ္ဇတိ.

‘‘အပရေဟိပိ၊ ဥပါလိ၊ ပဉ္စဟာကာရေဟိ ဘိက္ခု အာပတ္တိံ အာပဇ္ဇတိ. ကတမေဟိ ပဉ္စဟိ? အဒဿနေန၊ အဿဝနေန၊ ပသုတ္တကတာ၊ တထာသညီ၊ သတိသမ္မောသာ – ဣမေဟိ ခေါ၊ ဥပါလိ၊ ပဉ္စဟာကာရေဟိ ဘိက္ခု အာပတ္တိံ အာပဇ္ဇတီ’’တိ.

၄၄၈. ‘‘ကတိ နု ခေါ၊ ဘန္တေ၊ ဝေရာ’’တိ? ‘‘ပဉ္စိမေ၊ ဥပါလိ၊ ဝေရာ. ကတမေ ပဉ္စ? ပါဏာတိပါတော၊ အဒိန္နာဒါနံ၊ ကာမေသုမိစ္ဆာစာရော၊ မုသာဝါဒေါ၊ သုရာမေရယမဇ္ဇပ္ပမာဒဋ္ဌာနံ – ဣမေ ခေါ၊ ဥပါလိ၊ ပဉ္စ ဝေရာ’’တိ.

‘‘ကတိ နု ခေါ၊ ဘန္တေ၊ ဝေရမဏိယော’’တိ? ‘‘ပဉ္စိမာ၊ ဥပါလိ၊ ဝေရမဏိယော. ကတမာ ပဉ္စ? ပါဏာတိပါတာ ဝေရမဏီ [ဝေရမဏိ (က.)]၊ အဒိန္နာဒါနာ ဝေရမဏီ၊ ကာမေသုမိစ္ဆာစာရာ ဝေရမဏီ၊ မုသာဝါဒါ ဝေရမဏီ၊ သုရာမေရယမဇ္ဇပ္ပမာဒဋ္ဌာနာ ဝေရမဏီ – ဣမာ ခေါ၊ ဥပါလိ၊ ပဉ္စ ဝေရမဏိယော’’တိ.

၄၄၉. ‘‘ကတိ နု ခေါ၊ ဘန္တေ၊ ဗျသနာနီ’’တိ? ‘‘ပဉ္စိမာနိ၊ ဥပါလိ၊ ဗျသနာနိ. [ပရိ. ၃၂၅၊ အ. နိ. ၅.၁၃၀] ကတမာနိ ပဉ္စ? ဉာတိဗျသနံ၊ ဘောဂဗျသနံ၊ ရောဂဗျသနံ၊ သီလဗျသနံ၊ ဒိဋ္ဌိဗျသနံ – ဣမာနိ ခေါ၊ ဥပါလိ၊ ပဉ္စ ဗျသနာနီ’’တိ.

‘‘ကတိ နု ခေါ၊ ဘန္တေ၊ သမ္ပဒါ’’တိ? ‘‘ပဉ္စိမာ၊ ဥပါလိ၊ သမ္ပဒါ. [ပရိ. ၃၂၅၊ အ. နိ. ၅.၁၃၀] ကတမာ ပဉ္စ? ဉာတိသမ္ပဒါ၊ ဘောဂသမ္ပဒါ၊ အာရောဂျသမ္ပဒါ၊ သီလသမ္ပဒါ၊ ဒိဋ္ဌိသမ္ပဒါ – ဣမာ ခေါ၊ ဥပါလိ၊ ပဉ္စ သမ္ပဒါ’’တိ.

မုသာဝါဒဝဂ္ဂေါ နိဋ္ဌိတော သတ္တမော.

တဿုဒ္ဒါနံ –

မုသာဝါဒေါ စ ဩမဒ္ဒိ၊ အပရေဟိ အနုယောဂေါ၊

အာပတ္တိဉ္စ အပရေဟိ၊ ဝေရာ ဝေရမဏီပိ စ၊

ဗျသနံ သမ္ပဒါ စေဝ၊ သတ္တမော ဝဂ္ဂသင်္ဂဟောတိ.