၃. ပုဗ္ဗကရဏနိဒါနာဒိဝိဘာဂေါ

၄၀၅. ပုဗ္ဗကရဏံ ကိံနိဒါနံ၊ ကိံသမုဒယံ၊ ကိံဇာတိကံ၊ ကိံပဘဝံ၊ ကိံသမ္ဘာရံ၊ ကိံသမုဋ္ဌာနံ? ပစ္စုဒ္ဓါရော ကိံနိဒါနော၊ ကိံသမုဒယော၊ ကိံဇာတိကော၊ ကိံပဘဝေါ၊ ကိံသမ္ဘာရော၊ ကိံသမုဋ္ဌာနော? အဓိဋ္ဌာနံ ကိံနိဒါနံ၊ ကိံသမုဒယံ၊ ကိံဇာတိကံ၊ ကိံပဘဝံ၊ ကိံသမ္ဘာရံ၊ ကိံသမုဋ္ဌာနံ? အတ္ထာရော ကိံနိဒါနော၊ ကိံသမုဒယော၊ ကိံဇာတိကော၊ ကိံပဘဝေါ၊ ကိံသမ္ဘာရော၊ ကိံသမုဋ္ဌာနော? မာတိကာ စ ပလိဗောဓာ စ ကိံနိဒါနာ၊ ကိံသမုဒယာ၊ ကိံဇာတိကာ၊ ကိံပဘဝါ၊ ကိံသမ္ဘာရာ ကိံသမုဋ္ဌာနာ? အာသာ စ အနာသာ စ ကိံနိဒါနာ၊ ကိံသမုဒယာ၊ ကိံဇာတိကာ၊ ကိံပဘဝါ၊ ကိံသမ္ဘာရာ၊ ကိံသမုဋ္ဌာနာ?

ပုဗ္ဗကရဏံ ပယောဂနိဒါနံ၊ ပယောဂသမုဒယံ၊ ပယောဂဇာတိကံ၊ ပယောဂပဘဝံ၊ ပယောဂသမ္ဘာရံ၊ ပယောဂသမုဋ္ဌာနံ. ပစ္စုဒ္ဓါရော ပုဗ္ဗကရဏနိဒါနော၊ ပုဗ္ဗကရဏသမုဒယော၊ ပုဗ္ဗကရဏဇာတိကော၊ ပုဗ္ဗကရဏပဘဝေါ၊ ပုဗ္ဗကရဏသမ္ဘာရော၊ ပုဗ္ဗကရဏသမုဋ္ဌာနော. အဓိဋ္ဌာနံ ပစ္စုဒ္ဓါရနိဒါနံ၊ ပစ္စုဒ္ဓါရသမုဒယံ၊ ပစ္စုဒ္ဓါရဇာတိကံ၊ ပစ္စုဒ္ဓါရပဘဝံ၊ ပစ္စုဒ္ဓါရသမ္ဘာရံ၊ ပစ္စုဒ္ဓါရသမုဋ္ဌာနံ. အတ္ထာရော အဓိဋ္ဌာနနိဒါနော၊ အဓိဋ္ဌာနသမုဒယော၊ အဓိဋ္ဌာနဇာတိကော၊ အဓိဋ္ဌာနပဘဝေါ၊ အဓိဋ္ဌာနသမ္ဘာရော၊ အဓိဋ္ဌာနသမုဋ္ဌာနော. မာတိကာ စ ပလိဗောဓာ စ အတ္ထာရနိဒါနာ၊ အတ္ထာရသမုဒယာ၊ အတ္ထာရဇာတိကာ၊ အတ္ထာရပဘဝါ၊ အတ္ထာရသမ္ဘာရာ၊ အတ္ထာရသမုဋ္ဌာနာ. အာသာ စ အနာသာ စ ဝတ္ထုနိဒါနာ၊ ဝတ္ထုသမုဒယာ၊ ဝတ္ထုဇာတိကာ၊ ဝတ္ထုပဘဝါ၊ ဝတ္ထုသမ္ဘာရာ၊ ဝတ္ထုသမုဋ္ဌာနာ.

၄၀၆. ပယောဂေါ ကိံနိဒါနော၊ ကိံသမုဒယော၊ ကိံဇာတိကော၊ ကိံပဘဝေါ၊ ကိံသမ္ဘာရော၊ ကိံသမုဋ္ဌာနော၊ ပုဗ္ဗကရဏံ။ပေ။ ပစ္စုဒ္ဓါရော။ အဓိဋ္ဌာနံ။ အတ္ထာရော။ မာတိကာ စ ပလိဗောဓာ စ။ ဝတ္ထု။ အာသာ စ အနာသာ စ ကိံနိဒါနာ၊ ကိံသမုဒယာ၊ ကိံဇာတိကာ၊ ကိံပဘဝါ၊ ကိံသမ္ဘာရာ၊ ကိံသမုဋ္ဌာနာ?

ပယောဂေါ ဟေတုနိဒါနော၊ ဟေတုသမုဒယော၊ ဟေတုဇာတိကော၊ ဟေတုပဘဝေါ၊ ဟေတုသမ္ဘာရော၊ ဟေတုသမုဋ္ဌာနော. ပုဗ္ဗကရဏံ။ပေ။ ပစ္စုဒ္ဓါရော။ အဓိဋ္ဌာနံ။ အတ္ထာရော ။ မာတိကာ စ ပလိဗောဓာ စ။ ဝတ္ထု။ အာသာ စ အနာသာ စ ဟေတုနိဒါနာ၊ ဟေတုသမုဒယာ၊ ဟေတုဇာတိကာ၊ ဟေတုပဘဝါ၊ ဟေတုသမ္ဘာရာ၊ ဟေတုသမုဋ္ဌာနာ.

၄၀၇. ပယောဂေါ ကိံနိဒါနော၊ ကိံသမုဒယော၊ ကိံဇာတိကော၊ ကိံပဘဝေါ၊ ကိံသမ္ဘာရော၊ ကိံသမုဋ္ဌာနော? ပုဗ္ဗကရဏံ။ပေ။ ပစ္စုဒ္ဓါရော။ အဓိဋ္ဌာနံ။ အတ္ထာရော။ မာတိကာ စ ပလိဗောဓာ စ။ ဝတ္ထု။ အာသာ စ အနာသာ စ ကိံနိဒါနာ၊ ကိံသမုဒယာ၊ ကိံဇာတိကာ၊ ကိံပဘဝါ၊ ကိံသမ္ဘာရာ၊ ကိံသမုဋ္ဌာနာ?

ပယောဂေါ ပစ္စယနိဒါနော၊ ပစ္စယသမုဒယော၊ ပစ္စယဇာတိကော၊ ပစ္စယပဘဝေါ၊ ပစ္စယသမ္ဘာရော၊ ပစ္စယသမုဋ္ဌာနော. ပုဗ္ဗကရဏံ။ပေ။ ပစ္စုဒ္ဓါရော။ အဓိဋ္ဌာနံ။ အတ္ထာရော။ မာတိကာ စ ပလိဗောဓာ စ။ ဝတ္ထု။ အာသာ စ အနာသာ စ ပစ္စယနိဒါနာ၊ ပစ္စယသမုဒယာ၊ ပစ္စယဇာတိကာ၊ ပစ္စယပဘဝါ၊ ပစ္စယသမ္ဘာရာ၊ ပစ္စယသမုဋ္ဌာနာ.

၄၀၈. ပုဗ္ဗကရဏံ ကတိဟိ ဓမ္မေဟိ သင်္ဂဟိတံ? ပုဗ္ဗကရဏံ သတ္တဟိ ဓမ္မေဟိ သင်္ဂဟိတံ. ဓောဝနေန၊ ဝိစာရဏေန၊ ဆေဒနေန၊ ဗန္ဓနေန၊ သိဗ္ဗနေန၊ ရဇနေန၊ ကပ္ပကရဏေန – ပုဗ္ဗကရဏံ ဣမေဟိ သတ္တဟိ ဓမ္မေဟိ သင်္ဂဟိတံ.

ပစ္စုဒ္ဓါရော ကတိဟိ ဓမ္မေဟိ သင်္ဂဟိတော? ပစ္စုဒ္ဓါရော တီဟိ ဓမ္မေဟိ သင်္ဂဟိတော – သင်္ဃာဋိယာ၊ ဥတ္တရာသင်္ဂေန၊ အန္တရဝါသကေန.

အဓိဋ္ဌာနံ ကတိဟိ ဓမ္မေဟိ သင်္ဂဟိတံ? အဓိဋ္ဌာနံ တီဟိ ဓမ္မေဟိ သင်္ဂဟိတံ – သင်္ဃာဋိယာ၊ ဥတ္တရာသင်္ဂေန၊ အန္တရဝါသကေန.

အတ္ထာရော ကတိဟိ ဓမ္မေဟိ သင်္ဂဟိတော? အတ္ထာရော ဧကေန ဓမ္မေန သင်္ဂဟိတော – ဝစီဘေဒေန.

ကထိနဿ ကတိ မူလာနိ၊ ကတိ ဝတ္ထူနိ၊ ကတိ ဘူမိယော? ကထိနဿ ဧကံ မူလံ – သံဃော၊ တီဏိ ဝတ္ထူနိ – သင်္ဃာဋိ၊ ဥတ္တရာသင်္ဂေါ၊ အန္တရဝါသကော၊ ဆ ဘူမိယော – ခေါမံ၊ ကပ္ပါသိကံ၊ ကောသေယျံ၊ ကမ္ဗလံ၊ သာဏံ၊ ဘင်္ဂံ.

ကထိနဿ ကော အာဒိ၊ ကိံ မဇ္ဈေ၊ ကိံ ပရိယောသာနံ? ကထိနဿ ပုဗ္ဗကရဏံ အာဒိ၊ ကြိယာ မဇ္ဈေ၊ အတ္ထာရော ပရိယောသာနံ.

၄၀၉. ကတိဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ? ကတိဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ? အဋ္ဌဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ. အဋ္ဌဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ. ကတမေဟိ အဋ္ဌဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ? ပုဗ္ဗကရဏံ န ဇာနာတိ၊ ပစ္စုဒ္ဓါရံ န ဇာနာတိ၊ အဓိဋ္ဌာနံ န ဇာနာတိ၊ အတ္ထာရံ န ဇာနာတိ၊ မာတိကံ န ဇာနာတိ၊ ပလိဗောဓံ န ဇာနာတိ၊ ဥဒ္ဓါရံ န ဇာနာတိ၊ အာနိသံသံ န ဇာနာတိ – ဣမေဟိ အဋ္ဌဟင်္ဂေဟိ သမန္နာဂတော ပုဂ္ဂလော အဘဗ္ဗော ကထိနံ အတ္ထရိတုံ. ကတမေဟိ အဋ္ဌဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ? ပုဗ္ဗကရဏံ ဇာနာတိ၊ ပစ္စုဒ္ဓါရံ ဇာနာတိ၊ အဓိဋ္ဌာနံ ဇာနာတိ၊ အတ္ထာရံ ဇာနာတိ၊ မာတိကံ ဇာနာတိ၊ ပလိဗောဓံ ဇာနာတိ၊ ဥဒ္ဓါရံ ဇာနာတိ၊ အာနိသံသံ ဇာနာတိ – ဣမေဟိ အဋ္ဌဟင်္ဂေဟိ သမန္နာဂတော ပုဂ္ဂလော ဘဗ္ဗော ကထိနံ အတ္ထရိတုံ.

၄၁၀. ကတိနံ ပုဂ္ဂလာနံ ကထိနတ္ထာရာ န ရုဟန္တိ? ကတိနံ ပုဂ္ဂလာနံ ကထိနတ္ထာရာ ရုဟန္တိ? တိဏ္ဏံ ပုဂ္ဂလာနံ ကထိနတ္ထာရာ န ရုဟန္တိ. တိဏ္ဏံ ပုဂ္ဂလာနံ ကထိနတ္ထာရာ ရုဟန္တိ. ကတမေသံ တိဏ္ဏံ ပုဂ္ဂလာနံ ကထိနတ္ထာရာ န ရုဟန္တိ? နိဿီမဋ္ဌော အနုမောဒတိ၊ အနုမောဒေန္တော န ဝါစံ ဘိန္ဒတိ၊ ဝါစံ ဘိန္ဒန္တော န ပရံ ဝိညာပေတိ – ဣမေသံ တိဏ္ဏံ ပုဂ္ဂလာနံ ကထိနတ္ထာရာ န ရုဟန္တိ. ကတမေသံ တိဏ္ဏံ ပုဂ္ဂလာနံ ကထိနတ္ထာရာ ရုဟန္တိ? သီမဋ္ဌော အနုမောဒတိ၊ အနုမောဒေန္တော ဝါစံ ဘိန္ဒတိ၊ ဝါစံ ဘိန္ဒန္တော ပရံ ဝိညာပေတိ – ဣမေသံ တိဏ္ဏံ ပုဂ္ဂလာနံ ကထိနတ္ထာရာ ရုဟန္တိ.

၄၁၁. ကတိ ကထိနတ္ထာရာ န ရုဟန္တိ? ကတိ ကထိနတ္ထာရာ ရုဟန္တိ? တယော ကထိနတ္ထာရာ န ရုဟန္တိ. တယော ကထိနတ္ထာရာ ရုဟန္တိ. ကတမေ တယော ကထိနတ္ထာရာ န ရုဟန္တိ? ဝတ္ထုဝိပန္နဉ္စေဝ ဟောတိ၊ ကာလဝိပန္နဉ္စ၊ ကရဏဝိပန္နဉ္စ – ဣမေ တယော ကထိနတ္ထာရာ န ရုဟန္တိ. ကတမေ တယော ကထိနတ္ထာရာ ရုဟန္တိ? ဝတ္ထုသမ္ပန္နဉ္စေဝ ဟောတိ၊ ကာလသမ္ပန္နဉ္စ၊ ကရဏသမ္ပန္နဉ္စ – ဣမေ တယော ကထိနတ္ထာရာ ရုဟန္တိ.