၈. သမုစ္စယဝါရော

၂၄၆. အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ကတိ အာပတ္တိယော အာပဇ္ဇတိ? အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ တိဿော အာပတ္တိယော အာပဇ္ဇတိ. အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ၊ အာပတ္တိ ပါရာဇိကဿ၊ ဥဗ္ဘက္ခကံ အဓောဇာဏုမဏ္ဍလံ ဂဟဏံ သာဒိယတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓံ ဂဟဏံ သာဒိယတိ၊ အာပတ္တိ ဒုက္ကဋဿ – အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ဣမာ တိဿော အာပတ္တိယော အာပဇ္ဇတိ.

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ. သတ္တန္နံ အာပတ္တိက္ခန္ဓာနံ တီဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန. ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ၊ န ဝါစတော. စတုန္နံ အဓိကရဏာနံ အာပတ္တာဓိကရဏံ. သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။ပေ။.

ဒဓိံ ဝိညာပေတွာ ဘုဉ္ဇန္တီ ကတိ အာပတ္တိယော အာပဇ္ဇတိ? ဒဓိံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – ဒဓိံ ဝိညာပေတွာ ဘုဉ္ဇန္တီ ဣမာ ဒွေ အာပတ္တိယော အာပဇ္ဇတိ.

တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ. သတ္တန္နံ အာပတ္တိက္ခန္ဓာနံ ဒွီဟိ အာပတ္တိက္ခန္ဓေဟိ သင်္ဂဟိတာ – သိယာ ပါဋိဒေသနီယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန. ဆန္နံ အာပတ္တိသမုဋ္ဌာနာနံ စတူဟိ သမုဋ္ဌာနေဟိ သမုဋ္ဌန္တိ – သိယာ ကာယတော သမုဋ္ဌန္တိ န ဝါစတော န စိတ္တတော၊ သိယာ ကာယတော စ ဝါစတော စ သမုဋ္ဌန္တိ န စိတ္တတော၊ သိယာ ကာယတော စ စိတ္တတော စ သမုဋ္ဌန္တိ န ဝါစတော၊ သိယာ ကာယတော စ ဝါစတော စ စိတ္တတော စ သမုဋ္ဌန္တိ. စတုန္နံ အဓိကရဏာနံ – အာပတ္တာဓိကရဏံ. သတ္တန္နံ သမထာနံ တီဟိ သမထေဟိ သမ္မန္တိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ.

သမုစ္စယဝါရော နိဋ္ဌိတော အဋ္ဌမော.