၁. ပါရာဇိကကဏ္ဍံ

၂၂၈. အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ကတိ အာပတ္တိယော အာပဇ္ဇတိ? အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ တိဿော အာပတ္တိယော အာပဇ္ဇတိ. အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ၊ အာပတ္တိ ပါရာဇိကဿ၊ ဥဗ္ဘက္ခကံ အဓောဇာဏုမဏ္ဍလံ ဂဟဏံ သာဒိယတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓံ ဂဟဏံ သာဒိယတိ၊ အာပတ္တိ ဒုက္ကဋဿ – အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ကာယသံသဂ္ဂံ သာဒိယန္တီ ဣမာ တိဿော အာပတ္တိယော အာပဇ္ဇတိ.

ဝဇ္ဇပ္ပဋိစ္ဆာဒိကာ ဘိက္ခုနီ ဝဇ္ဇံ ပဋိစ္ဆာဒေန္တီ ကတိ အာပတ္တိယော အာပဇ္ဇတိ? ဝဇ္ဇပ္ပဋိစ္ဆာဒိကာ ဘိက္ခုနီ ဝဇ္ဇံ ပဋိစ္ဆာဒေန္တီ တိဿော အာပတ္တိယော အာပဇ္ဇတိ. ဇာနံ ပါရာဇိကံ ဓမ္မံ ပဋိစ္ဆာဒေတိ၊ အာပတ္တိ ပါရာဇိကဿ၊ ဝေမတိကာ ပဋိစ္ဆာဒေတိ၊ အာပတ္တိ ထုလ္လစ္စယဿ၊ အာစာရဝိပတ္တိံ ပဋိစ္ဆာဒေတိ၊ အာပတ္တိ ဒုက္ကဋဿ – ဝဇ္ဇပ္ပဋိစ္ဆာဒိကာ ဘိက္ခုနီ ဝဇ္ဇံ ပဋိစ္ဆာဒေန္တီ ဣမာ တိဿော အာပတ္တိယော အာပဇ္ဇတိ.

ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ ကတိ အာပတ္တိယော အာပဇ္ဇတိ? ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ ပါရာဇိကဿ – ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ ဣမာ တိဿော အာပတ္တိယော အာပဇ္ဇတိ.

အဋ္ဌမံ ဝတ္ထုံ ပရိပူရေန္တီ ကတိ အာပတ္တိယော အာပဇ္ဇတိ? အဋ္ဌမံ ဝတ္ထုံ ပရိပူရေန္တီ တိဿော အာပတ္တိယော အာပဇ္ဇတိ. ပုရိသေန – ‘‘ဣတ္ထန္နာမံ ဩကာသံ [ဣတ္ထန္နာမံ ဂဟနံ (သီ.)၊ ဣတ္ထန္နာမံ ဂဗ္ဘံ (သျာ.)] အာဂစ္ဆာ’’တိ ဝုတ္တာ ဂစ္ဆတိ၊ အာပတ္တိ ဒုက္ကဋဿ၊ ပုရိသဿ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿ၊ အဋ္ဌမံ ဝတ္ထုံ ပရိပူရေတိ၊ အာပတ္တိ ပါရာဇိကဿ – အဋ္ဌမံ ဝတ္ထုံ ပရိပူရေန္တီ ဣမာ တိဿော အာပတ္တိယော အာပဇ္ဇတိ.

ပါရာဇိကာ နိဋ္ဌိတာ.