၈. သမုစ္စယဝါရော
၂၀၀. မေထုနံ ဓမ္မံ ပဋိသေဝနပစ္စယာ ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝနပစ္စယာ စတဿော အာပတ္တိယော အာပဇ္ဇတိ. အက္ခာယိတေ သရီရေ မေထုနံ ဓမ္မံ ပဋိသေဝတိ၊ အာပတ္တိ ပါရာဇိကဿ၊ ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ၊ အာပတ္တိ ထုလ္လစ္စယဿ၊ ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေတိ၊ အာပတ္တိ ဒုက္ကဋဿ၊ ဇတုမဋ္ဌကေ ပါစိတ္တိယံ – မေထုနံ ဓမ္မံ ပဋိသေဝနပစ္စယာ ဣမာ စတဿော အာပတ္တိယော အာပဇ္ဇတိ. တာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌန္တိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မန္တိ? တာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ သိယာ အာစာရဝိပတ္တိံ. သတ္တန္နံ အာပတ္တိက္ခန္ဓာနံ စတူဟိ အာပတ္တိက္ခန္ဓေဟိ သင်္ဂဟိတာ – သိယာ ပါရာဇိကာပတ္တိက္ခန္ဓေန၊ သိယာ ထုလ္လစ္စယာပတ္တိက္ခန္ဓေန၊ သိယာ ပါစိတ္တိယာပတ္တိက္ခန္ဓေန၊ သိယာ ဒုက္ကဋာပတ္တိက္ခန္ဓေန. ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌန္တိ – ကာယတော စ စိတ္တတော စ သမုဋ္ဌန္တိ၊ န ဝါစတော. စတုန္နံ အဓိကရဏာနံ၊ အာပတ္တာဓိကရဏံ. သတ္တန္နံ သမထာနံ၊ တီဟိ သမထေဟိ သမ္မန္တိ – သိယာ သမ္မုခါဝိနယေန စ၊ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စ။ပေ။.
အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဧကံ အာပတ္တိံ အာပဇ္ဇတိ. ဒုက္ကဋံ – အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဣမံ ဧကံ အာပတ္တိံ အာပဇ္ဇတိ. သာ အာပတ္တိ စတုန္နံ ဝိပတ္တီနံ ကတိ ဝိပတ္တိယော ဘဇတိ? သတ္တန္နံ အာပတ္တိက္ခန္ဓာနံ ကတိဟိ အာပတ္တိက္ခန္ဓေဟိ သင်္ဂဟိတာ? ဆန္နံ အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ? စတုန္နံ အဓိကရဏာနံ ကတမံ အဓိကရဏံ? သတ္တန္နံ သမထာနံ ကတိဟိ သမထေဟိ သမ္မတိ? သာ အာပတ္တိ စတုန္နံ ဝိပတ္တီနံ ဧကံ ဝိပတ္တိံ ဘဇတိ – အာစာရဝိပတ္တိံ. သတ္တန္နံ အာပတ္တိက္ခန္ဓာနံ ဧကေန အာပတ္တိက္ခန္ဓေန သင်္ဂဟိတာ – ဒုက္ကဋာပတ္တိက္ခန္ဓေန. ဆန္နံ အာပတ္တိသမုဋ္ဌာနာနံ ဧကေန သမုဋ္ဌာနေန သမုဋ္ဌာတိ – ကာယတော စ စိတ္တတော စ သမုဋ္ဌာတိ၊ န ဝါစတော. စတုန္နံ အဓိကရဏာနံ၊ အာပတ္တာဓိကရဏံ. သတ္တန္နံ သမထာနံ တီဟိ သမထေဟိ သမ္မတိ – သိယာ သမ္မုခါဝိနယေန စ ပဋိညာတကရဏေန စ၊ သိယာ သမ္မုခါဝိနယေန စ တိဏဝတ္ထာရကေန စာတိ.
သမုစ္စယဝါရော နိဋ္ဌိတော အဋ္ဌမော.
အဋ္ဌပစ္စယဝါရာ နိဋ္ဌိတာ.
မဟာဝိဘင်္ဂေ သောဠသမဟာဝါရာ နိဋ္ဌိတာ.
ဘိက္ခုဝိဘင်္ဂမဟာဝါရော နိဋ္ဌိတော.