၃. ပတ္တဝဂ္ဂေါ

၄၄. အတိရေကပတ္တံ ဒသာဟံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အတိရေကပတ္တံ ဓာရေသုံ၊ တသ္မိံ ဝတ္ထုသ္မိံ. ဧကာ ပညတ္တိ၊ ဧကာ အနုပညတ္တိ. ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ – သိယာ ကာယတော စ ဝါစတော စ သမုဋ္ဌာတိ၊ န စိတ္တတော၊ သိယာ ကာယတော စ ဝါစတော စ စိတ္တတော စ သမုဋ္ဌာတိ။ပေ။.

၄၅. ဦနပဉ္စဗန္ဓနေန ပတ္တေန အညံ နဝံ ပတ္တံ စေတာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သက္ကေသု ပညတ္တံ. ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အပ္ပမတ္တကေနပိ ဘိန္နေန အပ္ပမတ္တကေနပိ ခဏ္ဍေန ဝိလိခိတမတ္တေနပိ ဗဟူ ပတ္တေ ဝိညာပေသုံ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ။.

၄၆. ဘေသဇ္ဇာနိ ပဋိဂ္ဂဟေတွာ သတ္တာဟံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ ဘေသဇ္ဇာနိ ပဋိဂ္ဂဟေတွာ သတ္တာဟံ အတိက္ကာမေသုံ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ။.

၄၇. အတိရေကမာသေ သေသေ ဂိမှာနေ ဝဿိကသာဋိကစီဝရံ ပရိယေသန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ အတိရေကမာသေ သေသေ ဂိမှာနေ ဝဿိကသာဋိကစီဝရံ ပရိယေသိံသု၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ။.

၄၈. ဘိက္ခုဿ သာမံ စီဝရံ ဒတွာ ကုပိတေန အနတ္တမနေန အစ္ဆိန္ဒန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ. ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ဘိက္ခုဿ သာမံ စီဝရံ ဒတွာ ကုပိတော အနတ္တမနော အစ္ဆိန္ဒိ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ။.

၄၉. သာမံ သုတ္တံ ဝိညာပေတွာ တန္တဝါယေဟိ စီဝရံ ဝါယာပေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? ရာဇဂဟေ ပညတ္တံ. ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ သာမံ သုတ္တံ ဝိညာပေတွာ တန္တဝါယေဟိ စီဝရံ ဝါယာပေသုံ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ။.

၅၀. ပုဗ္ဗေ အပ္ပဝါရိတဿ အညာတကဿ ဂဟပတိကဿ တန္တဝါယေ ဥပသင်္ကမိတွာ စီဝရေ ဝိကပ္ပံ အာပဇ္ဇန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? အာယသ္မန္တံ ဥပနန္ဒံ သကျပုတ္တံ အာရဗ္ဘ. ကိသ္မိံ ဝတ္ထုသ္မိန္တိ? အာယသ္မာ ဥပနန္ဒော သကျပုတ္တော ပုဗ္ဗေ အပ္ပဝါရိတော အညာတကဿ ဂဟပတိကဿ တန္တဝါယေ ဥပသင်္ကမိတွာ စီဝရေ ဝိကပ္ပံ အာပဇ္ဇိ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဆဟိ သမုဋ္ဌာနေဟိ သမုဋ္ဌာတိ။ပေ။.

၅၁. အစ္စေကစီဝရံ ပဋိဂ္ဂဟေတွာ စီဝရကာလသမယံ အတိက္ကာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ အစ္စေကစီဝရံ ပဋိဂ္ဂဟေတွာ စီဝရကာလသမယံ အတိက္ကာမေသုံ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ။.

၅၂. တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပိတွာ အတိရေကဆာရတ္တံ ဝိပ္ပဝသန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? သမ္ဗဟုလေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? သမ္ဗဟုလာ ဘိက္ခူ တိဏ္ဏံ စီဝရာနံ အညတရံ စီဝရံ အန္တရဃရေ နိက္ခိပိတွာ အတိရေကဆာရတ္တံ ဝိပ္ပဝသိံသု၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ ဒွီဟိ သမုဋ္ဌာနေဟိ သမုဋ္ဌာတိ ကထိနကေ။ပေ။.

၅၃. ဇာနံ သံဃိကံ လာဘံ ပရိဏတံ အတ္တနော ပရိဏာမေန္တဿ နိဿဂ္ဂိယံ ပါစိတ္တိယံ ကတ္ထ ပညတ္တန္တိ? သာဝတ္ထိယံ ပညတ္တံ. ကံ အာရဗ္ဘာတိ? ဆဗ္ဗဂ္ဂိယေ ဘိက္ခူ အာရဗ္ဘ. ကိသ္မိံ ဝတ္ထုသ္မိန္တိ? ဆဗ္ဗဂ္ဂိယာ ဘိက္ခူ ဇာနံ သံဃိကံ လာဘံ ပရိဏတံ အတ္တနော ပရိဏာမေသုံ၊ တသ္မိံ ဝတ္ထုသ္မိံ. ဧကာ ပညတ္တိ. ဆန္နံ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ။ပေ။.

ပတ္တဝဂ္ဂေါ တတိယော.

တိံသ နိဿဂ္ဂိယာ ပါစိတ္တိယာ နိဋ္ဌိတာ.

တဿုဒ္ဒါနံ –

ဒသေကရတ္တိမာသော စ၊ ဓောဝနဉ္စ ပဋိဂ္ဂဟော၊

အညာတံ တဉ္စ [အညာတကဉ္စ (က.)] ဥဒ္ဒိဿ၊ ဥဘိန္နံ ဒူတကေန စ.

ကောသိယာ သုဒ္ဓဒွေဘာဂါ၊ ဆဗ္ဗဿာနိ နိသီဒနံ၊

ဒွေ စ လောမာနိ ဥဂ္ဂဏှေ၊ ဥဘော နာနပ္ပကာရကာ.

ဒွေ စ ပတ္တာနိ ဘေသဇ္ဇံ၊ ဝဿိကာ ဒါနပဉ္စမံ၊

သာမံ ဝါယာပနစ္စေကော၊ သာသင်္ကံ သံဃိကေန စာတိ.