၈. ဥပက္ခဋသိက္ခာပဒံ

၅၂၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရော ပုရိသော ပဇာပတိံ ဧတဒဝေါစ – ‘‘အယျံ ဥပနန္ဒံ စီဝရေန အစ္ဆာဒေဿာမီ’’တိ. အဿောသိ ခေါ အညတရော ပိဏ္ဍစာရိကော ဘိက္ခု တဿ ပုရိသဿ ဣမံ ဝါစံ ဘာသမာနဿ. အထ ခေါ သော ဘိက္ခု ယေနာယသ္မာ ဥပနန္ဒော သကျပုတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ ဥပနန္ဒံ သကျပုတ္တံ ဧတဒဝေါစ – ‘‘မဟာပုညောသိ တွံ၊ အာဝုသော ဥပနန္ဒ၊ အမုကသ္မိံ ဩကာသေ အညတရော ပုရိသော ပဇာပတိံ ဧတဒဝေါစ – ‘‘အယျံ ဥပနန္ဒံ စီဝရေန အစ္ဆာဒေဿာမီ’’’တိ. ‘‘အတ္ထာဝုသော၊ မံ သော ဥပဋ္ဌာကော’’တိ. အထ ခေါ အာယသ္မာ ဥပနန္ဒော သကျပုတ္တော ယေန သော ပုရိသော တေနုပသင်္ကမိ၊ ဥပသင်္ကမိတွာ တံ ပုရိသံ ဧတဒဝေါစ – ‘‘သစ္စံ ကိရ မံ တွံ၊ အာဝုသော၊ စီဝရေန အစ္ဆာဒေတုကာမောသီ’’တိ? ‘‘အပိ မေယျ၊ ဧဝံ ဟောတိ – ‘အယျံ ဥပနန္ဒံ စီဝရေန အစ္ဆာဒေဿာမီ’’’တိ. ‘‘သစေ ခေါ မံ တွံ၊ အာဝုသော၊ စီဝရေန အစ္ဆာဒေတုကာမောသိ၊ ဧဝရူပေန စီဝရေန အစ္ဆာဒေဟိ. ကျာဟံ တေန အစ္ဆန္နောပိ ကရိဿာမိ ယာဟံ န ပရိဘုဉ္ဇိဿာမီ’’တိ.

အထ ခေါ သော ပုရိသော ဥဇ္ဈာယတိ ခိယျတိ ဝိပါစေတိ – ‘‘မဟိစ္ဆာ ဣမေ သမဏာ သကျပုတ္တိယာ အသန္တုဋ္ဌာ. နယိမေ သုကရာ စီဝရေန အစ္ဆာဒေတုံ. ကထဉှိ နာမ အယျော ဥပနန္ဒော မယာ ပုဗ္ဗေ အပ္ပဝါရိတော မံ ဥပသင်္ကမိတွာ စီဝရေ ဝိကပ္ပံ အာပဇ္ဇိဿတီ’’တိ! အဿောသုံ ခေါ ဘိက္ခူ တဿ ပုရိသဿ ဥဇ္ဈာယန္တဿ ခိယျန္တဿ ဝိပါစေန္တဿ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယျန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥပနန္ဒော သကျပုတ္တော ပုဗ္ဗေ အပ္ပဝါရိတော ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇိဿတီ’’တိ! အထ ခေါ တေ ဘိက္ခူ အာယသ္မန္တံ ဥပနန္ဒံ သကျပုတ္တံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ ။ပေ။ ‘‘သစ္စံ ကိရ တွံ၊ ဥပနန္ဒ၊ ပုဗ္ဗေ အပ္ပဝါရိတော ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇသီ’’တိ? ‘‘သစ္စံ၊ ဘဂဝါ’’တိ. ‘‘ဉာတကော တေ၊ ဥပနန္ဒ၊ အညာတကော’’တိ? ‘‘အညာတကော၊ ဘဂဝါ’’တိ. ‘‘အညာတကော၊ မောဃပုရိသ၊ အညာတကဿ န ဇာနာတိ ပတိရူပံ ဝါ အပ္ပတိရူပံ ဝါ သန္တံ ဝါ အသန္တံ ဝါ. တတ္ထ နာမ တွံ၊ မောဃပုရိသ၊ ပုဗ္ဗေ အပ္ပဝါရိတော အညာတကံ ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇိဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၂၈. ‘‘ဘိက္ခုံ ပနေဝ ဥဒ္ဒိဿ အညာတကဿ ဂဟပတိဿ ဝါ ဂဟပတာနိယာ ဝါ စီဝရစေတာပန္နံ [စီဝရစေတာပနံ (သျာ.)] ဥပက္ခဋံ ဟောတိ – ‘ဣမိနာ စီဝရစေတာပန္နေန စီဝရံ စေတာပေတွာ ဣတ္ထန္နာမံ ဘိက္ခုံ စီဝရေန အစ္ဆာဒေဿာမီ’တိ၊ တတြ စေ သော ဘိက္ခု ပုဗ္ဗေ အပ္ပဝါရိတော ဥပသင်္ကမိတွာ စီဝရေ ဝိကပ္ပံ အာပဇ္ဇေယျ – ‘သာဓု ဝတ မံ အာယသ္မာ ဣမိနာ စီဝရစေတာပန္နေန ဧဝရူပံ ဝါ ဧဝရူပံ ဝါ စီဝရံ စေတာပေတွာ အစ္ဆာဒေဟီ’တိ၊ ကလျာဏကမျတံ ဥပါဒါယ၊ နိဿဂ္ဂိယံ ပါစိတ္တိယ’’န္တိ.

၅၂၉. ဘိက္ခုံ ပနေဝ ဥဒ္ဒိဿာတိ ဘိက္ခုဿတ္ထာယ၊ ဘိက္ခုံ အာရမ္မဏံ ကရိတွာ၊ ဘိက္ခုံ အစ္ဆာဒေတုကာမော.

အညာတကော နာမ မာတိတော ဝါ ပိတိတော ဝါ ယာဝ သတ္တမာ ပိတာမဟယုဂါ အသမ္ဗဒ္ဓေါ.

ဂဟပတိ နာမ ယော ကောစိ အဂါရံ အဇ္ဈာဝသတိ.

ဂဟပတာနီ နာမ ယာ ကာစိ အဂါရံ အဇ္ဈာဝသတိ.

စီဝရစေတာပန္နံ နာမ ဟိရညံ ဝါ သုဝဏ္ဏံ ဝါ မုတ္တာ ဝါ မဏိ ဝါ ပဝါဠော ဝါ ဖလိကော ဝါ ပဋကော ဝါ သုတ္တံ ဝါ ကပ္ပါသော ဝါ.

ဣမိနာ စီဝရစေတာပန္နေနာတိ ပစ္စုပဋ္ဌိတေန.

စေတာပေတွာတိ ပရိဝတ္တေတွာ.

အစ္ဆာဒေဿာမီတိ ဒဿာမိ.

တတြ စေ သော ဘိက္ခူတိ ယံ ဘိက္ခုံ ဥဒ္ဒိဿ စီဝရစေတာပန္နံ ဥပက္ခဋံ ဟောတိ သော ဘိက္ခု.

ပုဗ္ဗေ အပ္ပဝါရိတောတိ ပုဗ္ဗေ အဝုတ္တော ဟောတိ – ‘‘ကီဒိသေန တေ၊ ဘန္တေ၊ စီဝရေန အတ္ထော၊ ကီဒိသံ တေ စီဝရံ စေတာပေမီ’’တိ?

ဥပသင်္ကမိတွာတိ ဃရံ ဂန္တွာ ယတ္ထ ကတ္ထစိ ဥပသင်္ကမိတွာ .

စီဝရေ ဝိကပ္ပံ အာပဇ္ဇေယျာတိ အာယတံ ဝါ ဟောတု ဝိတ္ထတံ ဝါ အပ္ပိတံ ဝါ သဏှံ ဝါ.

ဣမိနာ စီဝရစေတာပန္နေနာတိ ပစ္စုပဋ္ဌိတေန.

ဧဝရူပံ ဝါ ဧဝရူပံ ဝါတိ. အာယတံ ဝါ ဝိတ္ထတံ ဝါ အပ္ပိတံ ဝါ သဏှံ ဝါ.

စေတာပေတွာတိ ပရိဝတ္တေတွာ.

အစ္ဆာဒေဟီတိ ဒဇ္ဇေဟိ.

ကလျာဏကမျတံ ဥပါဒါယာတိ သာဓတ္ထိကော [သာဓုတ္ထိကော (သျာ.)] မဟဂ္ဃတ္ထိကော. တဿ ဝစနေန အာယတံ ဝါ ဝိတ္ထတံ ဝါ အပ္ပိတံ ဝါ သဏှံ ဝါ စေတာပေတိ၊ ပယောဂေ ဒုက္ကဋံ. ပဋိလာဘေန နိဿဂ္ဂိယံ ဟောတိ. နိဿဇ္ဇိတဗ္ဗံ သံဃဿ ဝါ ဂဏဿ ဝါ ပုဂ္ဂလဿ ဝါ. ဧဝဉ္စ ပန၊ ဘိက္ခဝေ၊ နိဿဇ္ဇိတဗ္ဗံ။ပေ။ ဣဒံ မေ၊ ဘန္တေ၊ စီဝရံ ပုဗ္ဗေ အပ္ပဝါရိတော အညာတကံ ဂဟပတိကံ ဥပသင်္ကမိတွာ စီဝရေ ဝိကပ္ပံ အာပန္နံ နိဿဂ္ဂိယံ၊ ဣမာဟံ သံဃဿ နိဿဇ္ဇာမီတိ။ပေ။ ဒဒေယျာတိ။ပေ။ ဒဒေယျုန္တိ။ပေ။ အာယသ္မတော ဒမ္မီတိ.

၅၃၀. အညာတကေ အညာတကသညီ ပုဗ္ဗေ အပ္ပဝါရိတော ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇတိ၊ နိဿဂ္ဂိယံ ပါစိတ္တိယံ. အညာတကေ ဝေမတိကော ပုဗ္ဗေ အပ္ပဝါရိတော ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇတိ၊ နိဿဂ္ဂိယံ ပါစိတ္တိယံ. အညာတကေ ဉာတကသညီ ပုဗ္ဗေ အပ္ပဝါရိတော ဂဟပတိကံ ဥပသင်္ကမိတွာ စီဝရေ ဝိကပ္ပံ အာပဇ္ဇတိ၊ နိဿဂ္ဂိယံ ပါစိတ္တိယံ.

ဉာတကေ အညာတကသညီ၊ အာပတ္တိ ဒုက္ကဋဿ. ဉာတကေ ဝေမတိကော၊ အာပတ္တိ ဒုက္ကဋဿ. ဉာတကေ ဉာတကသညီ၊ အနာပတ္တိ.

၅၃၁. အနာပတ္တိ ဉာတကာနံ၊ ပဝါရိတာနံ၊ အညဿတ္ထာယ၊ အတ္တနော ဓနေန၊ မဟဂ္ဃံ စေတာပေတုကာမဿ အပ္ပဂ္ဃံ စေတာပေတိ၊ ဥမ္မတ္တကဿ၊ အာဒိကမ္မိကဿာတိ.

ဥပက္ခဋသိက္ခာပဒံ နိဋ္ဌိတံ အဋ္ဌမံ.