၈. ရူပိယသိက္ခာပဒံ

၅၈၂. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဝေဠုဝနေ ကလန္ဒကနိဝါပေ. တေန ခေါ ပန သမယေန အာယသ္မာ ဥပနန္ဒော သကျပုတ္တော အညတရဿ ကုလဿ ကုလူပကော ဟောတိ နိစ္စဘတ္တိကော. ယံ တသ္မိံ ကုလေ ဥပ္ပဇ္ဇတိ ခါဒနီယံ ဝါ ဘောဇနီယံ ဝါ တတော အာယသ္မတော ဥပနန္ဒဿ သကျပုတ္တဿ ပဋိဝိသော ဌပိယျတိ. တေန ခေါ ပန သမယေန သာယံ တသ္မိံ ကုလေ မံသံ ဥပ္ပန္နံ ဟောတိ. တတော အာယသ္မတော ဥပနန္ဒဿ သကျပုတ္တဿ ပဋိဝိသော ဌပိတော ဟောတိ. တဿ ကုလဿ ဒါရကော ရတ္တိယာ ပစ္စူသသမယံ ပစ္စုဋ္ဌာယ ရောဒတိ – ‘‘မံသံ မေ ဒေထာ’’တိ. အထ ခေါ သော ပုရိသော ပဇာပတိံ ဧတဒဝေါစ – ‘‘အယျဿ ပဋိဝိသံ ဒါရကဿ ဒေဟိ. အညံ စေတာပေတွာ အယျဿ ဒဿာမာ’’တိ.

အထ ခေါ အာယသ္မာ ဥပနန္ဒော သကျပုတ္တော ပုဗ္ဗဏှသမယံ နိဝါသေတွာ ပတ္တစီဝရံ အာဒါယ ယေန တံ ကုလံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. အထ ခေါ သော ပုရိသော ယေနာယသ္မာ ဥပနန္ဒော သကျပုတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ ဥပနန္ဒံ သကျပုတ္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ သော ပုရိသော အာယသ္မန္တံ ဥပနန္ဒံ သကျပုတ္တံ ဧတဒဝေါစ – ‘‘ဟိယျော ခေါ၊ ဘန္တေ၊ သာယံ မံသံ ဥပ္ပန္နံ အဟောသိ. တတော အယျဿ ပဋိဝိသော ဌပိတော. အယံ၊ ဘန္တေ၊ ဒါရကော ရတ္တိယာ ပစ္စူသသမယံ ပစ္စုဋ္ဌာယ ရောဒတိ – ‘မံသံ မေ ဒေထာ’တိ. အယျဿ ပဋိဝိသော ဒါရကဿ ဒိန္နော. ကဟာပဏေန၊ ဘန္တေ၊ ကိံ အာဟရိယျတူ’’တိ? ‘‘ပရိစ္စတ္တော မေ၊ အာဝုသော၊ ကဟာပဏော’’တိ? ‘‘အာမ၊ ဘန္တေ၊ ပရိစ္စတ္တော’’တိ. ‘‘တညေဝ မေ၊ အာဝုသော၊ ကဟာပဏံ ဒေဟီ’’တိ.

အထ ခေါ သော ပုရိသော အာယသ္မတော ဥပနန္ဒဿ သကျပုတ္တဿ ကဟာပဏံ ဒတွာ ဥဇ္ဈာယတိ ခိယျတိ ဝိပါစေတိ – ‘‘တထေဝ မယံ ရူပိယံ ပဋိဂ္ဂဏှာမ ဧဝမေဝိမေ သမဏာ သကျပုတ္တိယာ ရူပိယံ ပဋိဂ္ဂဏှန္တီ’’တိ. အဿောသုံ ခေါ ဘိက္ခူ တဿ ပုရိသဿ ဥဇ္ဈာယန္တဿ ခိယျန္တဿ ဝိပါစေန္တဿ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥပနန္ဒော သကျပုတ္တော ရူပိယံ ပဋိဂ္ဂဟေဿတီ’’တိ! အထ ခေါ တေ ဘိက္ခူ အာယသ္မန္တံ ဥပနန္ဒံ သကျပုတ္တံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ တွံ၊ ဥပနန္ဒ၊ ရူပိယံ ပဋိဂ္ဂဟေသီ’’တိ [ပဋိဂ္ဂဏှာသီတိ (သျာ.)]? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တွံ၊ မောဃပုရိသ၊ ရူပိယံ ပဋိဂ္ဂဟေဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၈၃. ‘‘ယော ပန ဘိက္ခု ဇာတရူပရဇတံ ဥဂ္ဂဏှေယျ ဝါ ဥဂ္ဂဏှာပေယျ ဝါ ဥပနိက္ခိတ္တံ ဝါ သာဒိယေယျ၊ နိဿဂ္ဂိယံ ပါစိတ္တိယ’’န္တိ.

၅၈၄. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဇာတရူပံ နာမ သတ္ထုဝဏ္ဏော ဝုစ္စတိ.

ရဇတံ နာမ ကဟာပဏော လောဟမာသကော ဒါရုမာသကော ဇတုမာသကော ယေ ဝေါဟာရံ ဂစ္ဆန္တိ.

ဥဂ္ဂဏှေယျာတိ သယံ ဂဏှာတိ နိဿဂ္ဂိယံ ပါစိတ္တိယံ [နိဿဂ္ဂိယံ ဟောတိ (သျာ.)].

ဥဂ္ဂဏှာပေယျာတိ အညံ ဂါဟာပေတိ နိဿဂ္ဂိယံ ပါစိတ္တိယံ [နိဿဂ္ဂိယံ ဟောတိ (သျာ.)].

ဥပနိက္ခိတ္တံ ဝါ သာဒိယေယျာတိ ဣဒံ အယျဿ ဟောတူတိ ဥပနိက္ခိတ္တံ သာဒိယတိ၊ နိဿဂ္ဂိယံ ဟောတိ. သံဃမဇ္ဈေ နိဿဇ္ဇိတဗ္ဗံ. ဧဝဉ္စ ပန၊ ဘိက္ခဝေ၊ နိဿဇ္ဇိတဗ္ဗံ – တေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ ဘန္တေ၊ ရူပိယံ ပဋိဂ္ဂဟေသိံ. ဣဒံ မေ နိဿဂ္ဂိယံ. ဣမာဟံ သံဃဿ နိဿဇ္ဇာမီ’’တိ. နိဿဇ္ဇိတွာ အာပတ္တိ ဒေသေတဗ္ဗာ. ဗျတ္တေန ဘိက္ခုနာ ပဋိဗလေန အာပတ္တိ ပဋိဂ္ဂဟေတဗ္ဗာ. သစေ တတ္ထ အာဂစ္ဆတိ အာရာမိကော ဝါ ဥပါသကော ဝါ သော ဝတ္တဗ္ဗော – ‘‘အာဝုသော၊ ဣမံ ဇာနာဟီ’’တိ. သစေ သော ဘဏတိ – ‘‘ဣမိနာ ကိံ အာဟရိယျတူ’’တိ၊ န ဝတ္တဗ္ဗော – ‘‘ဣမံ ဝါ ဣမံ ဝါ အာဟရာ’’တိ. ကပ္ပိယံ အာစိက္ခိတဗ္ဗံ – သပ္ပိ ဝါ တေလံ ဝါ မဓု ဝါ ဖာဏိတံ ဝါ. သစေ သော တေန ပရိဝတ္တေတွာ ကပ္ပိယံ အာဟရတိ ရူပိယပ္ပဋိဂ္ဂါဟကံ ဌပေတွာ သဗ္ဗေဟေဝ ပရိဘုဉ္ဇိတဗ္ဗံ. ဧဝဉ္စေတံ လဘေထ၊ ဣစ္စေတံ ကုသလံ၊ နော စေ လဘေထ၊ သော ဝတ္တဗ္ဗော – ‘‘အာဝုသော၊ ဣမံ ဆဍ္ဍေဟီ’’တိ. သစေ သော ဆဍ္ဍေတိ၊ ဣစ္စေတံ ကုသလံ၊ နော စေ ဆဍ္ဍေတိ၊ ပဉ္စဟင်္ဂေဟိ သမန္နာဂတော ဘိက္ခု ရူပိယဆဍ္ဍကော သမ္မန္နိတဗ္ဗော – ယော န ဆန္ဒာဂတိံ ဂစ္ဆေယျ၊ န ဒေါသာဂတိံ ဂစ္ဆေယျ၊ န မောဟာဂတိံ ဂစ္ဆေယျ၊ န ဘယာဂတိံ ဂစ္ဆေယျ၊ ဆဍ္ဍိတာဆဍ္ဍိတဉ္စ ဇာနေယျ. ဧဝဉ္စ ပန၊ ဘိက္ခဝေ၊ သမ္မန္နိတဗ္ဗော. ပဌမံ ဘိက္ခု ယာစိတဗ္ဗော. ယာစိတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၅၈၅. ‘‘သုဏာတု မေ၊ ဘန္တေ၊ သံဃော. ယဒိ သံဃဿ ပတ္တကလ္လံ၊ သံဃော ဣတ္ထန္နာမံ ဘိက္ခုံ ရူပိယဆဍ္ဍကံ သမ္မန္နေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. သံဃော ဣတ္ထန္နာမံ ဘိက္ခုံ ရူပိယဆဍ္ဍကံ သမ္မန္နတိ. ယဿာယသ္မတော ခမတိ ဣတ္ထန္နာမဿ ဘိက္ခုနော ရူပိယဆဍ္ဍကဿ သမ္မုတိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘သမ္မတော သံဃေန ဣတ္ထန္နာမော ဘိက္ခု ရူပိယဆဍ္ဍကော. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

တေန သမ္မတေန ဘိက္ခုနာ အနိမိတ္တံ ကတွာ ပါတေတဗ္ဗံ. သစေ နိမိတ္တံ ကတွာ ပါတေတိ၊ အာပတ္တိ ဒုက္ကဋဿ.

၅၈၆. ရူပိယေ ရူပိယသညီ ရူပိယံ ပဋိဂ္ဂဏှာတိ၊ နိဿဂ္ဂိယံ ပါစိတ္တိယံ. ရူပိယေ ဝေမတိကော ရူပိယံ ပဋိဂ္ဂဏှာတိ၊ နိဿဂ္ဂိယံ ပါစိတ္တိယံ. ရူပိယေ အရူပိယသညီ ရူပိယံ ပဋိဂ္ဂဏှာတိ၊ နိဿဂ္ဂိယံ ပါစိတ္တိယံ.

အရူပိယေ ရူပိယသညီ၊ အာပတ္တိ ဒုက္ကဋဿ. အရူပိယေ ဝေမတိကော၊ အာပတ္တိ ဒုက္ကဋဿ. အရူပိယေ အရူပိယသညီ၊ အနာပတ္တိ.

အနာပတ္တိ အဇ္ဈာရာမေ ဝါ အဇ္ဈာဝသထေ ဝါ ဥဂ္ဂဟေတွာ ဝါ ဥဂ္ဂဟာပေတွာ ဝါ နိက္ခိပတိ – ယဿ ဘဝိဿတိ သော ဟရိဿတီတိ၊ ဥမ္မတ္တကဿ၊ အာဒိကမ္မိကဿာတိ.

ရူပိယသိက္ခာပဒံ နိဋ္ဌိတံ အဋ္ဌမံ.