၁. ပဌမကထိနသိက္ခာပဒံ

ဣမေ ခေါ ပနာယသ္မန္တော တိံသ နိဿဂ္ဂိယာ ပါစိတ္တိယာ

ဓမ္မာ ဥဒ္ဒေသံ အာဂစ္ဆန္တိ.

၄၅၉. တေနေ သမယေန ဗုဒ္ဓေါ ဘဂဝါ ဝေသာလိယံ ဝိဟရတိ ဂေါတမကေ စေတိယေ. တေန ခေါ ပန သမယေန ဘဂဝတာ ဘိက္ခူနံ တိစီဝရံ အနုညာတံ ဟောတိ. ဆဗ္ဗဂ္ဂိယာ ဘိက္ခူ – ‘‘ဘဂဝတာ တိစီဝရံ အနုညာတ’’န္တိ အညေနေဝ တိစီဝရေန ဂါမံ ပဝိသန္တိ၊ အညေန တိစီဝရေန အာရာမေ အစ္ဆန္တိ၊ အညေန တိစီဝရေန နဟာနံ ဩတရန္တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ အတိရေကစီဝရံ ဓာရေဿန္တီ’’တိ! အထ ခေါ တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ တုမှေ၊ ဘိက္ခဝေ၊ အတိရေကစီဝရံ ဓာရေထာ’’တိ? ‘‘သစ္စံ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ အတိရေကစီဝရံ ဓာရေဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၄၆၀. ‘‘ယော ပန ဘိက္ခု အတိရေကစီဝရံ ဓာရေယျ၊ နိဿဂ္ဂိယံ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၄၆၁. [မဟာဝ. ၃၄၇] တေန ခေါ ပန သမယေန အာယသ္မတော အာနန္ဒဿ အတိရေကစီဝရံ ဥပ္ပန္နံ ဟောတိ. အာယသ္မာ စ အာနန္ဒော တံ စီဝရံ အာယသ္မတော သာရိပုတ္တဿ ဒါတုကာမော ဟောတိ. အာယသ္မာ စ သာရိပုတ္တော သာကေတေ ဝိဟရတိ. အထ ခေါ အာယသ္မတော အာနန္ဒဿ ဧတဒဟောသိ – ‘‘ဘဂဝတာ သိက္ခာပဒံ ပညတ္တံ – ‘န အတိရေကစီဝရံ ဓာရေတဗ္ဗ’န္တိ. ဣဒဉ္စ မေ အတိရေကစီဝရံ ဥပ္ပန္နံ. အဟဉ္စိမံ စီဝရံ အာယသ္မတော သာရိပုတ္တဿ ဒါတုကာမော. အာယသ္မာ စ သာရိပုတ္တော သာကေတေ ဝိဟရတိ. ကထံ နု ခေါ မယာ ပဋိပဇ္ဇိတဗ္ဗ’’န္တိ? အထ ခေါ အာယသ္မာ အာနန္ဒော ဘဂဝတော ဧတမတ္ထံ အာရောစေသိ. ‘‘ကီဝစိရံ ပနာနန္ဒ၊ သာရိပုတ္တော အာဂစ္ဆိဿတီ’’တိ? ‘‘နဝမံ ဝါ၊ ဘဂဝါ၊ ဒိဝသံ ဒသမံ ဝါ’’တိ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဒသာဟပရမံ အတိရေကစီဝရံ ဓာရေတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၄၆၂. ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ ဒသာဟပရမံ အတိရေကစီဝရံ ဓာရေတဗ္ဗံ. တံ အတိက္ကာမယတော နိဿဂ္ဂိယံ ပါစိတ္တိယ’’န္တိ.

၄၆၃. နိဋ္ဌိတစီဝရသ္မိန္တိ ဘိက္ခုနော စီဝရံ ကတံ ဝါ ဟောတိ နဋ္ဌံ ဝါ ဝိနဋ္ဌံ ဝါ ဒဍ္ဎံ ဝါ စီဝရာသာ ဝါ ဥပစ္ဆိန္နာ.

ဥဗ္ဘတသ္မိံ ကထိနေတိ အဋ္ဌန္နံ မာတိကာနံ အညတရာယ မာတိကာယ ဥဗ္ဘတံ ဟောတိ၊ သံဃေန ဝါ အန္တရာ ဥဗ္ဘတံ ဟောတိ.

ဒသာဟပရမန္တိ ဒသာဟပရမတာ ဓာရေတဗ္ဗံ.

အတိရေကစီဝရံ နာမ အနဓိဋ္ဌိတံ အဝိကပ္ပိတံ.

စီဝရံ နာမ ဆန္နံ စီဝရာနံ အညတရံ စီဝရံ၊ ဝိကပ္ပနုပဂံ ပစ္ဆိမံ.

တံ အတိက္ကာမယတော နိဿဂ္ဂိယံ ဟောတီ [ဟောတီတိ ဣဒံ ပဒံ သဗ္ဗပေါတ္ထကေသု အတ္ထိ၊ သိက္ခာပဒေ ပန နတ္ထိ၊ ဧဝမုပရိပိ] တိ ဧကာဒသေ အရုဏုဂ္ဂမနေ နိဿဂ္ဂိယံ ဟောတိ. နိဿဇ္ဇိတဗ္ဗံ သံဃဿ ဝါ ဂဏဿ ဝါ ပုဂ္ဂလဿ ဝါ. ဧဝဉ္စ ပန၊ ဘိက္ခဝေ၊ နိဿဇ္ဇိတဗ္ဗံ. တေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘ဣဒံ မေ၊ ဘန္တေ၊ စီဝရံ ဒသာဟာတိက္ကန္တံ နိဿဂ္ဂိယံ၊ ဣမာဟံ သံဃဿ နိဿဇ္ဇာမီ’’တိ. နိဿဇ္ဇိတွာ အာပတ္တိ ဒေသေတဗ္ဗာ. ဗျတ္တေန ဘိက္ခုနာ ပဋိဗလေန အာပတ္တိ ပဋိဂ္ဂဟေတဗ္ဗာ. နိဿဋ္ဌစီဝရံ ဒါတဗ္ဗံ.

၄၆၄. ‘‘သုဏာတု မေ၊ ဘန္တေ၊ သံဃော. ဣဒံ စီဝရံ ဣတ္ထန္နာမဿ ဘိက္ခုနော နိဿဂ္ဂိယံ သံဃဿ နိဿဋ္ဌံ. ယဒိ သံဃဿ ပတ္တကလ္လံ၊ သံဃော ဣမံ စီဝရံ ဣတ္ထန္နာမဿ ဘိက္ခုနော ဒဒေယျာ’’တိ.

၄၆၅. တေန ဘိက္ခုနာ သမ္ဗဟုလေ ဘိက္ခူ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿု ဝစနီယာ – ‘‘ဣဒံ မေ၊ ဘန္တေ၊ စီဝရံ ဒသာဟာတိက္ကန္တံ နိဿဂ္ဂိယံ. ဣမာဟံ အာယသ္မန္တာနံ နိဿဇ္ဇာမီ’’တိ. နိဿဇ္ဇိတွာ အာပတ္တိ ဒေသေတဗ္ဗာ. ဗျတ္တေန ဘိက္ခုနာ ပဋိဗလေန အာပတ္တိ ပဋိဂ္ဂဟေတဗ္ဗာ. နိဿဋ္ဌစီဝရံ ဒါတဗ္ဗံ.

၄၆၆. ‘‘သုဏန္တု မေ အာယသ္မန္တာ. ဣဒံ စီဝရံ ဣတ္ထန္နာမဿ ဘိက္ခုနော နိဿဂ္ဂိယံ အာယသ္မန္တာနံ နိဿဋ္ဌံ. ယဒါယသ္မန္တာနံ ပတ္တကလ္လံ၊ အာယသ္မန္တာ ဣမံ စီဝရံ ဣတ္ထန္နာမဿ ဘိက္ခုနော ဒဒေယျု’’န္တိ.

၄၆၇. တေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘ဣဒံ မေ၊ အာဝုသော၊ စီဝရံ ဒသာဟာတိက္ကန္တံ နိဿဂ္ဂိယံ. ဣမာဟံ အာယသ္မတော နိဿဇ္ဇာမီ’’တိ. နိဿဇ္ဇိတွာ အာပတ္တိ ဒေသေတဗ္ဗာ. တေန ဘိက္ခုနာ အာပတ္တိ ပဋိဂ္ဂဟေတဗ္ဗာ. နိဿဋ္ဌစီဝရံ ဒါတဗ္ဗံ – ‘‘ဣမံ စီဝရံ အာယသ္မတော ဒမ္မီ’’တိ.

၄၆၈. ဒသာဟာတိက္ကန္တေ အတိက္ကန္တသညီ၊ နိဿဂ္ဂိယံ ပါစိတ္တိယံ. ဒသာဟာတိက္ကန္တေ ဝေမတိကော၊ နိဿဂ္ဂိယံ ပါစိတ္တိယံ. ဒသာဟာတိက္ကန္တေ အနတိက္ကန္တသညီ၊ နိဿဂ္ဂိယံ ပါစိတ္တိယံ. အနဓိဋ္ဌိတေ အဓိဋ္ဌိတသညီ၊ နိဿဂ္ဂိယံ ပါစိတ္တိယံ. အဝိကပ္ပိတေ ဝိကပ္ပိတသညီ၊ နိဿဂ္ဂိယံ ပါစိတ္တိယံ. အဝိဿဇ္ဇိတေ ဝိဿဇ္ဇိတသညီ၊ နိဿဂ္ဂိယံ ပါစိတ္တိယံ. အနဋ္ဌေ နဋ္ဌသညီ၊ နိဿဂ္ဂိယံ ပါစိတ္တိယံ. အဝိနဋ္ဌေ ဝိနဋ္ဌသညီ၊ နိဿဂ္ဂိယံ ပါစိတ္တိယံ. အဒဍ္ဎေ ဒဍ္ဎသညီ၊ နိဿဂ္ဂိယံ ပါစိတ္တိယံ. အဝိလုတ္တေ ဝိလုတ္တသညီ၊ နိဿဂ္ဂိယံ ပါစိတ္တိယံ.

နိဿဂ္ဂိယံ စီဝရံ အနိဿဇ္ဇိတွာ ပရိဘုဉ္ဇတိ၊ အာပတ္တိ ဒုက္ကဋဿ. ဒသာဟာနတိက္ကန္တေ အတိက္ကန္တသညီ၊ အာပတ္တိ ဒုက္ကဋဿ. ဒသာဟာနတိက္ကန္တေ ဝေမတိကော၊ အာပတ္တိ ဒုက္ကဋဿ. ဒသာဟာနတိက္ကန္တေ အနတိက္ကန္တသညီ၊ အနာပတ္တိ.

၄၆၉. အနာပတ္တိ အန္တောဒသာဟံ အဓိဋ္ဌေတိ၊ ဝိကပ္ပေတိ၊ ဝိဿဇ္ဇေတိ၊ နဿတိ၊ ဝိနဿတိ၊ ဍယှတိ၊ အစ္ဆိန္ဒိတွာ ဂဏှန္တိ၊ ဝိဿာသံ ဂဏှန္တိ၊ ဥမ္မတ္တကဿ၊ အာဒိကမ္မိကဿာတိ.

၄၇၀. တေန ခေါ ပန သမယေန ဆဗ္ဗဂ္ဂိယာ ဘိက္ခူ နိဿဋ္ဌစီဝရံ န ဒေန္တိ. ဘဂဝတော ဧတမတ္ထံ အာရောစေသုံ. ‘‘န၊ ဘိက္ခဝေ၊ နိဿဋ္ဌစီဝရံ န ဒါတဗ္ဗံ. ယော န ဒဒေယျ၊ အာပတ္တိ ဒုက္ကဋဿာ’’တိ.

ကထိနသိက္ခာပဒံ နိဋ္ဌိတံ ပဌမံ.