၆. ဧဠကလောမသိက္ခာပဒံ

၅၇၁. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရဿ ဘိက္ခုနော ကောသလေသု ဇနပဒေ သာဝတ္ထိံ ဂစ္ဆန္တဿ အန္တရာမဂ္ဂေ ဧဠကလောမာနိ ဥပ္ပဇ္ဇိံသု. အထ ခေါ သော ဘိက္ခု တာနိ ဧဠကလောမာနိ ဥတ္တရာသင်္ဂေန ဘဏ္ဍိကံ ဗန္ဓိတွာ အဂမာသိ. မနုဿာ တံ ဘိက္ခုံ ပဿိတွာ ဥပ္ပဏ္ဍေသုံ – ‘‘ကိတ္တကေန တေ၊ ဘန္တေ၊ ကီတာနိ? ကိတ္တကော ဥဒယော ဘဝိဿတီ’’တိ? သော ဘိက္ခု တေဟိ မနုဿေဟိ ဥပ္ပဏ္ဍိယမာနော မင်္ကု အဟောသိ. အထ ခေါ သော ဘိက္ခု သာဝတ္ထိံ ဂန္တွာ တာနိ ဧဠကလောမာနိ ဌိတကောဝ အာသုမ္ဘိ. ဘိက္ခူ တံ ဘိက္ခုံ ဧတဒဝေါစုံ – ‘‘ကိဿ တွံ၊ အာဝုသော၊ ဣမာနိ ဧဠကလောမာနိ ဌိတကောဝ အာသုမ္ဘသီ’’တိ? ‘‘တထာ ဟိ ပနာဟံ၊ အာဝုသော၊ ဣမေသံ ဧဠကလောမာနံ ကာရဏာ မနုဿေဟိ ဥပ္ပဏ္ဍိတော’’တိ. ‘‘ကီဝ ဒူရတော ပန တွံ၊ အာဝုသော၊ ဣမာနိ ဧဠကလောမာနိ အာဟရီ’’တိ? ‘‘အတိရေကတိယောဇနံ၊ အာဝုသော’’တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခု အတိရေကတိယောဇနံ ဧဠကလောမာနိ အာဟရိဿတီ’’တိ! အထ ခေါ တေ ဘိက္ခူ တံ ဘိက္ခုံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ သစ္စံ ကိရ တွံ၊ ဘိက္ခု၊ အတိရေကတိယောဇနံ ဧဠကလောမာနိ အာဟရီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တွံ၊ မောဃပုရိသ၊ အတိရေကတိယောဇနံ ဧဠကလောမာနိ အာဟရိဿသိ! နေတံ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၇၂. ‘‘ဘိက္ခုနော ပနေဝ အဒ္ဓါနမဂ္ဂပ္ပဋိပန္နဿ ဧဠကလောမာနိ ဥပ္ပဇ္ဇယျုံ. အာကင်္ခမာနေန ဘိက္ခုနာ ပဋိဂ္ဂဟေတဗ္ဗာနိ. ပဋိဂ္ဂဟေတွာ တိယောဇနပရမံ သဟတ္ထာ ဟရိတဗ္ဗာနိ [ဟာရေတဗ္ဗာနိ (သီ. သျာ. က.)]၊ အသန္တေ ဟာရကေ. တတော စေ ဥတ္တရိ ဟရေယျ၊ အသန္တေပိ ဟာရကေ၊ နိဿဂ္ဂိယံ ပါစိတ္တိယ’’န္တိ.

၅၇၃. ဘိက္ခုနော ပနေဝ အဒ္ဓါနမဂ္ဂပ္ပဋိပန္နဿာတိ ပန္ထံ ဂစ္ဆန္တဿ.

ဧဠကလောမာနိ ဥပ္ပဇ္ဇေယျုန္တိ ဥပ္ပဇ္ဇေယျုံ သင်္ဃတော ဝါ ဂဏတော ဝါ ဉာတိတော ဝါ မိတ္တတော ဝါ ပံသုကူလံ ဝါ အတ္တနော ဝါ ဓနေန.

အာကင်္ခမာနေနာတိ ဣစ္ဆမာနေန ပဋိဂ္ဂဟေတဗ္ဗာနိ.

ပဋိဂ္ဂဟေတွာ တိယောဇနပရမံ သဟတ္ထာ ဟရိတဗ္ဗာနီတိ တိယောဇနပရမတာ သဟတ္ထာ ဟရိတဗ္ဗာနိ.

အသန္တေ ဟာရကေတိ နာညော ကောစိ ဟာရကော ဟောတိ ဣတ္ထီ ဝါ ပုရိသော ဝါ ဂဟဋ္ဌော ဝါ ပဗ္ဗဇိတော ဝါ.

တတော စေ ဥတ္တရိ ဟရေယျ၊ အသန္တေပိ ဟာရကေတိ ပဌမံ ပါဒံ တိယောဇနံ အတိက္ကာမေတိ၊ အာပတ္တိ ဒုက္ကဋဿ. ဒုတိယံ ပါဒံ အတိက္ကာမေတိ၊ နိဿဂ္ဂိယံ ပါစိတ္တိယံ [နိဿဂ္ဂိယာနိ ဟောန္တိ (သျာ.)]. အန္တောတိယောဇနေ ဌိတော ဗဟိတိယောဇနံ ပါတေတိ၊ နိဿဂ္ဂိယံ ပါစိတ္တိယံ [နိဿဂ္ဂိယာနိ ဟောန္တိ (သျာ.)]. အညဿ ယာနေ ဝါ ဘဏ္ဍေ ဝါ အဇာနန္တဿ ပက္ခိပိတွာ တိယောဇနံ အတိက္ကာမေတိ၊ နိဿဂ္ဂိယာနိ ဟောန္တိ. နိဿဇ္ဇိတဗ္ဗာနိ သံဃဿ ဝါ ဂဏဿ ဝါ ပုဂ္ဂလဿ ဝါ. ဧဝဉ္စ ပန၊ ဘိက္ခဝေ၊ နိဿဇ္ဇိတဗ္ဗာနိ။ပေ။ ဣမာနိ မေ၊ ဘန္တေ၊ ဧဠကလောမာနိ တိယောဇနံ အတိက္ကာမိတာနိ နိဿဂ္ဂိယာနိ. ဣမာနာဟံ သံဃဿ နိဿဇ္ဇာမီတိ။ပေ။ ဒဒေယျာတိ။ပေ။ ဒဒေယျုန္တိ။ပေ။ အာယသ္မတော ဒမ္မီတိ.

၅၇၄. အတိရေကတိယောဇနေ အတိရေကသညီ အတိက္ကာမေတိ [တိယောဇနံ အတိက္ကာမေတိ (သျာ.)]၊ နိဿဂ္ဂိယံ ပါစိတ္တိယံ. အတိရေကတိယောဇနေ ဝေမတိကော အတိက္ကာမေတိ [တိယောဇနံ အတိက္ကာမေတိ (သျာ.)]၊ နိဿဂ္ဂိယံ ပါစိတ္တိယံ. အတိရေကတိယောဇနေ ဦနကသညီ အတိက္ကာမေတိ [တိယောဇနံ အတိက္ကာမေတိ (သျာ.)]၊ နိဿဂ္ဂိယံ ပါစိတ္တိယံ.

ဦနကတိယောဇနေ အတိရေကသညီ၊ အာပတ္တိ ဒုက္ကဋဿ. ဦနကတိယောဇနေ ဝေမတိကော၊ အာပတ္တိ ဒုက္ကဋဿ. ဦနကတိယောဇနေ ဦနကသညီ၊ အနာပတ္တိ.

၅၇၅. အနာပတ္တိ တိယောဇနံ ဟရတိ၊ ဦနကတိယောဇနံ ဟရတိ၊ တိယောဇနံ ဟရတိပိ၊ ပစ္စာဟရတိပိ၊ တိယောဇနံ ဝါသာဓိပ္ပါယော ဂန္တွာ တတော ပရံ ဟရတိ၊ အစ္ဆိန္နံ ပဋိလဘိတွာ ဟရတိ၊ နိဿဋ္ဌံ ပဋိလဘိတွာ ဟရတိ၊ အညံ ဟရာပေတိ ကတဘဏ္ဍံ၊ ဥမ္မတ္တကဿ၊ အာဒိကမ္မိကဿာတိ.

ဧဠကလောမသိက္ခာပဒံ နိဋ္ဌိတံ ဆဋ္ဌံ.