၃. ဒုဋ္ဌုလ္လဝါစာသိက္ခာပဒံ

၂၈၃. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မာ ဥဒါယီ အရညေ ဝိဟရတိ. တဿာယသ္မတော ဝိဟာရော အဘိရူပေါ ဟောတိ ဒဿနီယော ပါသာဒိကော. တေန ခေါ ပန သမယေန သမ္ဗဟုလာ ဣတ္ထိယော အာရာမံ အာဂမံသု ဝိဟာရပေက္ခိကာယော. အထ ခေါ တာ ဣတ္ထိယော ယေနာယသ္မာ ဥဒါယီ တေနုပသင်္ကမိံသု၊ ဥပသင်္ကမိတွာ အာယသ္မန္တံ ဥဒါယိံ ဧတဒဝေါစုံ – ‘‘ဣစ္ဆာမ မယံ၊ ဘန္တေ၊ အယျဿ ဝိဟာရံ ပေက္ခိတု’’န္တိ. အထ ခေါ အာယသ္မာ ဥဒါယီ တာ ဣတ္ထိယော ဝိဟာရံ ပေက္ခာပေတွာ တာသံ ဣတ္ထီနံ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ ယာစတိပိ အာယာစတိပိ ပုစ္ဆတိပိ ပဋိပုစ္ဆတိပိ အာစိက္ခတိပိ အနုသာသတိပိ အက္ကောသတိပိ. ယာ တာ ဣတ္ထိယော ဆိန္နိကာ ဓုတ္တိကာ အဟိရိကာယော တာ အာယသ္မတာ ဥဒါယိနာ သဒ္ဓိံ ဥဟသန္တိပိ ဥလ္လပန္တိပိ ဥဇ္ဇဂ္ဃန္တိပိ ဥပ္ပဏ္ဍေန္တိပိ. ယာ ပန တာ ဣတ္ထိယော ဟိရိမနာ တာ နိက္ခမိတွာ ဘိက္ခူ ဥဇ္ဈာပေန္တိ – ‘‘ဣဒံ၊ ဘန္တေ၊ နစ္ဆန္နံ နပ္ပတိရူပံ. သာမိကေနပိ မယံ ဧဝံ ဝုတ္တာ န ဣစ္ဆေယျာမ၊ ကိံ ပနာယျေန ဥဒါယိနာ’’တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိဿတီ’’တိ! အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဥဒါယိံ ပဋိပုစ္ဆိ – ‘‘သစ္စံ ကိရ တွံ၊ ဥဒါယိ၊ မာတုဂါမံ ဒုဋ္ဌုလ္လာဟိ ဝါစာဟိ ဩဘာသသီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ၊ မောဃပုရိသ၊ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တွံ၊ မောဃပုရိသ၊ မာတုဂါမံ ဒုဋ္ဌုလ္လာဟိ ဝါစာဟိ ဩဘာသိဿသိ! နနု မယာ၊ မောဃပုရိသ၊ အနေကပရိယာယေန ဝိရာဂါယ ဓမ္မော ဒေသိတော နော သရာဂါယ။ပေ။ ကာမပရိဠာဟာနံ ဝူပသမော အက္ခာတော. နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၂၈၄. ‘‘ယော ပန ဘိက္ခု ဩတိဏ္ဏော ဝိပရိဏတေန စိတ္တေန မာတုဂါမံ ဒုဋ္ဌုလ္လာဟိ ဝါစာဟိ ဩဘာသေယျ ယထာ တံ ယုဝါ ယုဝတိံ မေထုနုပသံဟိတာဟိ၊ သံဃာဒိသေသော’’တိ.

၂၈၅. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဩတိဏ္ဏော နာမ သာရတ္တော အပေက္ခဝါ ပဋိဗဒ္ဓစိတ္တော.

ဝိပရိဏတန္တိ ရတ္တမ္ပိ စိတ္တံ ဝိပရိဏတံ၊ ဒုဋ္ဌမ္ပိ စိတ္တံ ဝိပရိဏတံ မူဠှမ္ပိ စိတ္တံ ဝိပရိဏတံ. အပိစ၊ ရတ္တံ စိတ္တံ ဣမသ္မိံ အတ္ထေ အဓိပ္ပေတံ ဝိပရိဏတန္တိ.

မာတုဂါမော နာမ မနုဿိတ္ထီ၊ န ယက္ခီ၊ န ပေတီ၊ န တိရစ္ဆာနဂတာ. ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ.

ဒုဋ္ဌုလ္လာ နာမ ဝါစာ ဝစ္စမဂ္ဂပဿာဝမဂ္ဂမေထုနဓမ္မပ္ပဋိသံယုတ္တာ ဝါစာ.

ဩဘာသေယျာတိ အဇ္ဈာစာရော ဝုစ္စတိ.

ယထာ တံ ယုဝါ ယုဝတိန္တိ ဒဟရော ဒဟရိံ၊ တရုဏော တရုဏိံ၊ ကာမဘောဂီ ကာမဘောဂိနိံ.

မေထုနုပသံဟိတာဟီတိ မေထုနဓမ္မပ္ပဋိသံယုတ္တာဟိ.

သံဃာဒိသေသောတိ ။ပေ။ တေနပိ ဝုစ္စတိ သံဃာဒိသေသောတိ.

ဒွေ မဂ္ဂေ အာဒိဿ ဝဏ္ဏမ္ပိ ဘဏတိ၊ အဝဏ္ဏမ္ပိ ဘဏတိ၊ ယာစတိပိ၊ အာယာစတိပိ၊ ပုစ္ဆတိပိ၊ ပဋိပုစ္ဆတိပိ၊ အာစိက္ခတိပိ၊ အနုသာသတိပိ၊ အက္ကောသတိပိ.

ဝဏ္ဏံ ဘဏတိ နာမ ဒွေ မဂ္ဂေ ထောမေတိ ဝဏ္ဏေတိ ပသံသတိ.

အဝဏ္ဏံ ဘဏတိ နာမ ဒွေ မဂ္ဂေ ခုံသေတိ ဝမ္ဘေတိ ဂရဟတိ.

ယာစတိ နာမ ဒေဟိ မေ၊ အရဟသိ မေ ဒါတုန္တိ.

အာယာစတိ နာမ ကဒါ တေ မာတာ ပသီဒိဿတိ၊ ကဒါ တေ ပိတာ ပသီဒိဿတိ၊ ကဒါ တေ ဒေဝတာယော ပသီဒိဿန္တိ၊ ကဒါ [ကဒါ တေ (သျာ.)] သုခဏော သုလယော သုမုဟုတ္တော ဘဝိဿတိ၊ ကဒါ တေ မေထုနံ ဓမ္မံ လဘိဿာမီတိ.

ပုစ္ဆတိ နာမ ကထံ တွံ သာမိကဿ ဒေသိ၊ ကထံ ဇာရဿ ဒေသီတိ?

ပဋိပုစ္ဆတိ နာမ ဧဝံ ကိရ တွံ သာမိကဿ ဒေသိ၊ ဧဝံ ဇာရဿ ဒေသီတိ.

အာစိက္ခတိ နာမ ပုဋ္ဌော ဘဏတိ – ‘‘ဧဝံ ဒေဟိ. ဧဝံ ဒေန္တာ သာမိကဿ ပိယာ ဘဝိဿသိ မနာပါ စာ’’တိ.

အနုသာသတိ နာမ အပုဋ္ဌော ဘဏတိ – ‘‘ဧဝံ ဒေဟိ. ဧဝံ ဒေန္တာ သာမိကဿ ပိယာ ဘဝိဿတိ မနာပါ စာ’’တိ.

အက္ကောသတိ နာမ အနိမိတ္တာသိ၊ နိမိတ္တမတ္တာသိ၊ အလောဟိတာသိ၊ ဓုဝလောဟိတာသိ၊ ဓုဝစောဠာသိ၊ ပဂ္ဃရန္တီသိ၊ သိခရဏီသိ၊ ဣတ္ထိပဏ္ဍကာသိ၊ ဝေပုရိသိကာသိ၊ သမ္ဘိန္နာသိ၊ ဥဘတောဗျဉ္ဇနာသီတိ.

၂၈၆. ဣတ္ထီ စ ဟောတိ ဣတ္ထိသညီ သာရတ္တော စ. ဘိက္ခု စ နံ ဣတ္ထိယာ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ ယာစတိပိ အာယာစတိပိ ပုစ္ဆတိပိ ပဋိပုစ္ဆတိပိ အာစိက္ခတိပိ အနုသာသတိပိ အက္ကောသတိပိ၊ အာပတ္တိ သံဃာဒိသေသဿ။ပေ။.

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ. ဘိက္ခု စ နံ ဒွိန္နံ ဣတ္ထီနံ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏံပိ ဘဏတိ။ပေ။ အက္ကောသတိပိ၊ အာပတ္တိ ဒွိန္နံ သံဃာဒိသေသာနံ။ပေ။.

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ. ဘိက္ခု စ နံ ဥဘိန္နံ ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ သံဃာဒိသေသေန ဒုက္ကဋဿ။ပေ။.

ဣတ္ထီ စ ဟောတိ ဣတ္ထိသညီ သာရတ္တော စ. ဘိက္ခု စ နံ ဣတ္ထိယာ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ထုလ္လစ္စယဿ။ပေ။.

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ. ဘိက္ခု စ နံ ဒွိန္နံ ဣတ္ထီနံ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒွိန္နံ ထုလ္လစ္စယာနံ။ပေ။.

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ. ဘိက္ခု စ နံ ဥဘိန္နံ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ထုလ္လစ္စယေန ဒုက္ကဋဿ။ပေ။.

ဣတ္ထီ စ ဟောတိ ဣတ္ထိသညီ သာရတ္တော စ. ဘိက္ခု စ နံ ဣတ္ထိယာ ဥဗ္ဘက္ခကံ အဓောဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒုက္ကဋဿ။ပေ။.

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ. ဘိက္ခု စ နံ ဒွိန္နံ ဣတ္ထီနံ ဥဗ္ဘက္ခကံ အဓောဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒွိန္နံ ဒုက္ကဋာနံ။ပေ။.

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ. ဘိက္ခု စ နံ ဥဘိန္နံ ဥဗ္ဘက္ခကံ အဓောဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒွိန္နံ ဒုက္ကဋာနံ။ပေ။.

ဣတ္ထီ စ ဟောတိ ဣတ္ထိသညီ သာရတ္တော စ. ဘိက္ခု စ နံ ဣတ္ထိယာ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒုက္ကဋဿ။ပေ။.

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ. ဘိက္ခု စ နံ ဒွိန္နံ ဣတ္ထီနံ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒွိန္နံ ဒုက္ကဋာနံ။ပေ။.

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ. ဘိက္ခု စ နံ ဥဘိန္နံ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ။ပေ။ အက္ကောသတိပိ၊ အာပတ္တိ ဒွိန္နံ ဒုက္ကဋာနံ။ပေ။.

၂၈၇. အနာပတ္တိ အတ္ထပုရေက္ခာရဿ၊ ဓမ္မပုရေက္ခာရဿ၊ အနုသာသနိပုရေက္ခာရဿ၊ ဥမ္မတ္တကဿ၊ အာဒိကမ္မိကဿာတိ.

ဝိနီတဝတ္ထုဥဒ္ဒါနဂါထာ

လောဟိတံ ကက္ကသာကိဏ္ဏံ၊ ခရံ ဒီဃဉ္စ ဝါပိတံ၊

ကစ္စိ သံသီဒတိ မဂ္ဂေါ၊ သဒ္ဓါ ဒါနေန ကမ္မုနာတိ.

ဝိနီတဝတ္ထု

၂၈၈. တေန ခေါ ပန သမယေန အညတရာ ဣတ္ထီ နဝရတ္တံ ကမ္ဗလံ ပါရုတာ ဟောတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘လောဟိတံ ခေါ တေ၊ ဘဂိနီ’’တိ. သာ န ပဋိဝိဇာနိ. ‘‘အာမာယျ၊ နဝရတ္တော ကမ္ဗလော’’တိ. တဿ ကုက္ကုစ္စံ အဟောသိ ‘‘ဘဂဝတာ သိက္ခာပဒံ ပညတ္တံ၊ ကစ္စိ နု ခေါ အဟံ သံဃာဒိသေသံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရာ ဣတ္ထီ ခရကမ္ဗလံ ပါရုတာ ဟောတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ကက္ကသလောမံ ခေါ တေ၊ ဘဂိနီ’’တိ. သာ န ပဋိဝိဇာနိ. ‘‘အာမာယျ၊ ခရကမ္ဗလကော’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရာ ဣတ္ထီ နဝါဝုတံ ကမ္ဗလံ ပါရုတာ ဟောတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘အာကိဏ္ဏလောမံ ခေါ တေ၊ ဘဂိနီ’’တိ. သာ န ပဋိဝိဇာနိ. ‘‘အာမာယျ၊ နဝါဝုတော ကမ္ဗလော’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရာ ဣတ္ထီ ခရကမ္ဗလံ ပါရုတာ ဟောတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ခရလောမံ ခေါ တေ၊ ဘဂိနီ’’တိ. သာ န ပဋိဝိဇာနိ. ‘‘အာမာယျ၊ ခရကမ္ဗလကော’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရာ ဣတ္ထီ ပါဝါရံ [ဒီဃပါဝါရံ (သျာ.)] ပါရုတာ ဟောတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ဒီဃလောမံ ခေါ တေ၊ ဘဂိနီ’’တိ. သာ န ပဋိဝိဇာနိ. ‘‘အာမာယျ၊ ပါဝါရော’’ [ဒီဃပါဝါရော (သျာ.)] တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

၂၈၉. တေန ခေါ ပန သမယေန အညတရာ ဣတ္ထီ ခေတ္တံ ဝပါပေတွာ အာဂစ္ဆတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘ဝါပိတံ ခေါ တေ၊ ဘဂိနီ’’တိ? သာ န ပဋိဝိဇာနိ. ‘‘အာမာယျ၊ နော စ ခေါ ပဋိဝုတ္တ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု ပရိဗ္ဗာဇိကံ ပဋိပထေ ပဿိတွာ သာရတ္တော တံ ပရိဗ္ဗာဇိကံ ဧတဒဝေါစ – ‘‘ကစ္စိ၊ ဘဂိနိ၊ မဂ္ဂေါ သံသီဒတီ’’တိ? သာ န ပဋိဝိဇာနိ. ‘‘အာမ ဘိက္ခု၊ ပဋိပဇ္ဇိဿသီ’’တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ထုလ္လစ္စယဿာ’’တိ.

တေန ခေါ ပန သမယေန အညတရော ဘိက္ခု သာရတ္တော အညတရံ ဣတ္ထိံ ဧတဒဝေါစ – ‘‘သဒ္ဓါသိ တွံ၊ ဘဂိနိ. အပိစ၊ ယံ သာမိကဿ ဒေသိ တံ နာမှာကံ ဒေသီ’’တိ. ‘‘ကိံ၊ ဘန္တေ’’တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရော ဘိက္ခု သာရတ္တော အညတရံ ဣတ္ထိံ ဧတဒဝေါစ – ‘‘သဒ္ဓါသိ တွံ၊ ဘဂိနိ. အပိစ၊ ယံ အဂ္ဂဒါနံ တံ နာမှာကံ ဒေသီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဣတ္ထီ ကမ္မံ ကရောတိ. အညတရော ဘိက္ခု သာရတ္တော တံ ဣတ္ထိံ ဧတဒဝေါစ – ‘‘တိဋ္ဌ၊ ဘဂိနိ၊ အဟံ ကရိဿာမီတိ။ပေ။ နိသီဒ၊ ဘဂိနိ၊ အဟံ ကရိဿာမီတိ။ပေ။ နိပဇ္ဇ၊ ဘဂိနိ၊ အဟံ ကရိဿာမီ’’တိ. သာ န ပဋိဝိဇာနိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သံဃာဒိသေသဿ၊ အာပတ္တိ ဒုက္ကဋဿာ’’တိ.

ဒုဋ္ဌုလ္လဝါစာသိက္ခာပဒံ နိဋ္ဌိတံ တတိယံ.