၄. အတ္တကာမပါရိစရိယသိက္ခာပဒံ

၂၉၀. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မာ ဥဒါယီ သာဝတ္ထိယံ ကုလူပကော ဟောတိ၊ ဗဟုကာနိ ကုလာနိ ဥပသင်္ကမတိ. တေန ခေါ ပန သမယေန အညတရာ ဣတ္ထီ မတပတိကာ အဘိရူပါ ဟောတိ ဒဿနီယာ ပါသာဒိကာ. အထ ခေါ အာယသ္မာ ဥဒါယီ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန တဿာ ဣတ္ထိယာ နိဝေသနံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. အထ ခေါ သာ ဣတ္ထီ ယေနာယသ္မာ ဥဒါယီ တေနုပသင်္ကမိ၊ ဥပသင်္ကမိတွာ အာယသ္မန္တံ ဥဒါယိံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ တံ ဣတ္ထိံ အာယသ္မာ ဥဒါယီ ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ. အထ ခေါ သာ ဣတ္ထီ အာယသ္မတာ ဥဒါယိနာ ဓမ္မိယာ ကထာယ သန္ဒဿိတာ သမာဒပိတာ သမုတ္တေဇိတာ သမ္ပဟံသိတာ အာယသ္မန္တံ ဥဒါယိံ ဧတဒဝေါစ – ‘‘ဝဒေယျာထ၊ ဘန္တေ၊ ယေန အတ္ထော. ပဋိဗလာ မယံ အယျဿ ဒါတုံ ယဒိဒံ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရ’’န္တိ.

‘‘န ခေါ တေ၊ ဘဂိနိ၊ အမှာကံ ဒုလ္လဘာ ယဒိဒံ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာ. အပိစ၊ ယော အမှာကံ ဒုလ္လဘော တံ ဒေဟီ’’တိ. ‘‘ကိံ၊ ဘန္တေ’’တိ? ‘‘မေထုနဓမ္မ’’န္တိ. ‘‘အတ္ထော၊ ဘန္တေ’’တိ? ‘‘အတ္ထော၊ ဘဂိနီ’’တိ. ‘‘ဧဟိ၊ ဘန္တေ’’တိ၊ ဩဝရကံ ပဝိသိတွာ သာဋကံ နိက္ခိပိတွာ မဉ္စကေ ဥတ္တာနာ နိပဇ္ဇိ. အထ ခေါ အာယသ္မာ ဥဒါယီ ယေန သာ ဣတ္ထီ တေနုပသင်္ကမိ၊ ဥပသင်္ကမိတွာ – ‘‘ကော ဣမံ ဝသလံ ဒုဂ္ဂန္ဓံ အာမသိဿတီ’’တိ၊ နိဋ္ဌုဟိတွာ ပက္ကာမိ. အထ ခေါ သာ ဣတ္ထီ ဥဇ္ဈာယတိ ခိယျတိ ဝိပါစေတိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော. ဣမေ ဟိ နာမ ဓမ္မစာရိနော သမစာရိနော ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ နတ္ထိ ဣမေသံ ဗြဟ္မညံ၊ နဋ္ဌံ ဣမေသံ သာမညံ နဋ္ဌံ ဣမေသံ ဗြဟ္မညံ၊ ကုတော ဣမေသံ သာမညံ ကုတော ဣမေသံ ဗြဟ္မညံ၊ အပဂတာ ဣမေ သာမညာ အပဂတာ ဣမေ ဗြဟ္မညာ. ကထဉှိ နာမ သမဏော ဥဒါယီ မံ သာမံ မေထုနဓမ္မံ ယာစိတွာ၊ ‘ကော ဣမံ ဝသလံ ဒုဂ္ဂန္ဓံ အာမသိဿတီ’’တိ နိဋ္ဌုဟိတွာ ပက္ကမိဿတိ! ကိံ မေ ပါပကံ ကိံ မေ ဒုဂ္ဂန္ဓံ၊ ကဿာဟံ ကေန ဟာယာမီ’’တိ? အညာပိ ဣတ္ထိယော ဥဇ္ဈာယန္တိ ခိယျန္တိ ဝိပါစေန္တိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော။ပေ။ ကထဉှိ နာမ သမဏော ဥဒါယီ ဣမိဿာ သာမံ မေထုနဓမ္မံ ယာစိတွာ၊ ‘ကော ဣမံ ဝသလံ ဒုဂ္ဂန္ဓံ အာမသိဿတီ’တိ နိဋ္ဌုဟိတွာ ပက္ကမိဿတိ! ကိံ ဣမိဿာ ပါပကံ ကိံ ဣမိဿာ ဒုဂ္ဂန္ဓံ၊ ကဿာယံ ကေန ဟာယတီ’’တိ? အဿောသုံ ခေါ ဘိက္ခူ တာသံ ဣတ္ထီနံ ဥဇ္ဈာယန္တီနံ ခိယျန္တီနံ ဝိပါစေန္တီနံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဥဒါယီ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသိဿတီ’’တိ!

အထ ခေါ တေ ဘိက္ခူ အာယသ္မန္တံ ဥဒါယိံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဥဒါယိံ ပဋိပုစ္ဆိ – ‘‘သစ္စံ ကိရ တွံ၊ ဥဒါယိ၊ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသသီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ၊ မောဃပုရိသ၊ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တွံ၊ မောဃပုရိသ၊ မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသိဿသိ! နနု မယာ၊ မောဃပုရိသ၊ အနေကပရိယာယေန ဝိရာဂါယ ဓမ္မော ဒေသိတော နော သရာဂါယ။ပေ။ ကာမပရိဠာဟာနံ ဝူပသမော အက္ခာတော? နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၂၉၁. ‘‘ယော ပန ဘိက္ခု ဩတိဏ္ဏော ဝိပရိဏတေန စိတ္တေန မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသေယျ – ‘ဧတဒဂ္ဂံ၊ ဘဂိနိ၊ ပါရိစရိယာနံ ယာ မာဒိသံ သီလဝန္တံ ကလျာဏဓမ္မံ ဗြဟ္မစာရိံ ဧတေန ဓမ္မေန ပရိစရေယျာတိ မေထုနုပသံဟိတေန’၊ သံဃာဒိသေသော’’တိ.

၂၉၂. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဩတိဏ္ဏော နာမ သာရတ္တော အပေက္ခဝါ ပဋိဗဒ္ဓစိတ္တော.

ဝိပရိဏတန္တိ ရတ္တမ္ပိ စိတ္တံ ဝိပရိဏတ္တံ၊ ဒုဋ္ဌမ္ပိ စိတ္တံ ဝိပရိဏတံ၊ မူဠှမ္ပိ စိတ္တံ ဝိပရိဏတံ. အပိစ၊ ရတ္တံ စိတ္တံ ဣမသ္မိံ အတ္ထေ အဓိပ္ပေတံ ဝိပရိဏတန္တိ.

မာတုဂါမော နာမ မနုဿိတ္ထီ၊ န ယက္ခီ၊ န ပေတီ၊ န တိရစ္ဆာနဂတာ. ဝိညူ ပဋိဗလာ သုဘာသိတဒုဗ္ဘာသိတံ ဒုဋ္ဌလ္လာဒုဋ္ဌုလ္လံ အာဇာနိတုံ.

မာတုဂါမဿ သန္တိကေတိ မာတုဂါမဿ သာမန္တာ၊ မာတုဂါမဿ အဝိဒူရေ.

အတ္တကာမန္တိ အတ္တနော ကာမံ အတ္တနော ဟေတုံ အတ္တနော အဓိပ္ပါယံ အတ္တနော ပါရိစရိယံ.

ဧတဒဂ္ဂန္တိ ဧတံ အဂ္ဂံ ဧတံ သေဋ္ဌံ ဧတံ မောက္ခံ ဧတံ ဥတ္တမံ ဧတံ ပဝရံ.

ယာတိ ခတ္တိယီ [ခတ္တိယာ (သျာ.)] ဝါ ဗြာဟ္မဏီ ဝါ ဝေဿီ ဝါ သုဒ္ဒီ ဝါ.

မာဒိသန္တိ ခတ္တိယံ ဝါ ဗြာဟ္မဏံ ဝါ ဝေဿံ ဝါ သုဒ္ဒံ ဝါ.

သီလဝန္တန္တိ ပါဏာတိပါတာ ပဋိဝိရတံ၊ အဒိန္နာဒါနာ ပဋိဝိရတံ၊ မုသာဝါဒါ ပဋိဝိရတံ.

ဗြဟ္မစာရိန္တိ မေထုနဓမ္မာ ပဋိဝိရတံ.

ကလျာဏဓမ္မော နာမ တေန စ သီလေန တေန စ ဗြဟ္မစရိယေန ကလျာဏဓမ္မော ဟောတိ.

ဧတေန ဓမ္မေနာတိ မေထုနဓမ္မေန.

ပရိစရေယျာတိ အဘိရမေယျ.

မေထုနုပသံဟိတေနာတိ မေထုနဓမ္မပ္ပဋိသံယုတ္တေန.

သံဃာဒိသေသောတိ။ပေ။ တေနပိ ဝုစ္စတိ သံဃာဒိသေသောတိ.

၂၉၃. ဣတ္ထီ စ ဟောတိ ဣတ္ထိသညီ သာရတ္တော စ. ဘိက္ခု စ နံ ဣတ္ထိယာ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ သံဃာဒိသေသဿ.

ဣတ္ထီ စ ဟောတိ ဝေမတိကော။ပေ။ ပဏ္ဍကသညီ။ ပုရိသသညီ။ တိရစ္ဆာနဂတသညီ သာရတ္တော စ. ဘိက္ခု စ နံ ဣတ္ထိယာ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ထုလ္လစ္စယဿ.

ပဏ္ဍကော စ ဟောတိ ပဏ္ဍကသညီ သာရတ္တော စ. ဘိက္ခု စ နံ ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ထုလ္လစ္စယဿ.

ပဏ္ဍကော စ ဟောတိ ဝေမတိကော။ပေ။ ပုရိသသညီ။ တိရစ္ဆာနဂတသညီ။ ဣတ္ထိသညီ သာရတ္တော စ. ဘိက္ခု စ နံ ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ဒုက္ကဋဿ.

ပုရိသော စ ဟောတိ။ပေ။ တိရစ္ဆာနဂတော စ ဟောတိ တိရစ္ဆာနဂတသညီ။ပေ။ ဝေမတိကော ဣတ္ထိသညီ။ ပဏ္ဍကသညီ။ ပုရိသသညီ သာရတ္တော စ. ဘိက္ခု စ နံ တိရစ္ဆာနဂတဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ဒုက္ကဋဿ.

ဒွေ ဣတ္ထိယော ဒွိန္နံ ဣတ္ထီနံ ဣတ္ထိသညီ သာရတ္တော စ. ဘိက္ခု စ နံ ဒွိန္နံ ဣတ္ထီနံ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ဒွိန္နံ သံဃာဒိသေသာနံ။ပေ။.

ဣတ္ထီ စ ပဏ္ဍကော စ ဥဘိန္နံ ဣတ္ထိသညီ သာရတ္တော စ. ဘိက္ခု စ နံ ဥဘိန္နံ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ သံဃာဒိသေသေန ဒုက္ကဋဿ။ပေ။.

၂၉၄. အနာပတ္တိ ‘‘စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရေန ဥပဋ္ဌဟာ’’တိ ဘဏတိ၊ ဥမ္မတ္တကဿ အာဒိကမ္မိကဿာတိ.

ဝိနီတဝတ္ထုဥဒ္ဒါနဂါထာ

ကထံ ဝဉ္ဈာ လဘေ ပုတ္တံ၊ ပိယာ စ သုဘဂါ သိယံ၊

ကိံ ဒဇ္ဇံ ကေနုပဋ္ဌေယျံ၊ ကထံ ဂစ္ဆေယျံ သုဂ္ဂတိန္တိ.

ဝိနီတဝတ္ထု

၂၉၅. တေန ခေါ ပန သမယေန အညတရာ ဝဉ္ဈာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ၊ ဘန္တေ၊ ဝိဇာယေယျ’’န္တိ? ‘‘တေန ဟိ၊ ဘဂိနိ၊ အဂ္ဂဒါနံ ဒေဟီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဝိဇာယိနီ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ၊ ဘန္တေ၊ ပုတ္တံ လဘေယျ’’န္တိ? ‘‘တေန ဟိ၊ ဘဂိနိ၊ အဂ္ဂဒါနံ ဒေဟီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ၊ ဘန္တေ၊ သာမိကဿ ပိယာ အဿ’’န္တိ? ‘‘တေန ဟိ၊ ဘဂိနိ၊ အဂ္ဂဒါနံ ဒေဟီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ၊ ဘန္တေ၊ သုဘဂါ အဿ’’န္တိ? ‘‘တေန ဟိ၊ ဘဂိနိ၊ အဂ္ဂဒါနံ ဒေဟီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကျာဟံ၊ ဘန္တေ၊ အယျဿ ဒဇ္ဇာမီ’’တိ? ‘‘အဂ္ဂဒါနံ၊ ဘဂိနီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကေနာဟံ၊ ဘန္တေ၊ အယျံ ဥပဋ္ဌေမီ’’တိ? ‘‘အဂ္ဂဒါနေန၊ ဘဂိနီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

တေန ခေါ ပန သမယေန အညတရာ ဣတ္ထီ ကုလူပကံ ဘိက္ခုံ ဧတဒဝေါစ – ‘‘ကထာဟံ၊

ဘန္တေ၊ သုဂတိံ ဂစ္ဆေယျ’’န္တိ? ‘‘တေန ဟိ၊ ဘဂိနိ၊ အဂ္ဂဒါနံ ဒေဟီ’’တိ. ‘‘ကိံ၊ ဘန္တေ၊ အဂ္ဂဒါန’’န္တိ? ‘‘မေထုနဓမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော သံဃာဒိသေသ’’န္တိ.

အတ္တကာမပါရိစရိယသိက္ခာပဒံ နိဋ္ဌိတံ စတုတ္ထံ.