၈. အဋ္ဌမသိက္ခာပဒံ

၁၁၅၄. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရာ သိက္ခမာနာ ထုလ္လနန္ဒံ ဘိက္ခုနိံ ဥပသင်္ကမိတွာ ဥပသမ္ပဒံ ယာစိ. ထုလ္လနန္ဒာ ဘိက္ခုနီ တံ သိက္ခမာနံ ‘‘သစေ မံ တွံ၊ အယျေ၊ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ၊ နေဝ ဝုဋ္ဌာပေတိ န ဝုဋ္ဌာပနာယ ဥဿုက္ကံ ကရောတိ. အထ ခေါ သာ သိက္ခမာနာ ဘိက္ခုနီနံ ဧတမတ္ထံ အာရောစေသိ. ယာ တာ ဘိက္ခုနိယော အပ္ပိစ္ဆာ။ပေ။ တာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ ထုလ္လနန္ဒာ သိက္ခမာနံ – သစေ မံ တွံ၊ အယျေ၊ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီတိ ဝတွာ၊ နေဝ ဝုဋ္ဌာပေဿတိ န ဝုဋ္ဌာပနာယ ဥဿုက္ကံ ကရိဿတီ’’တိ။ပေ။ သစ္စံ ကိရ၊ ဘိက္ခဝေ၊ ထုလ္လနန္ဒာ ဘိက္ခုနီ သိက္ခမာနံ – ‘‘သစေ မံ တွံ အယျေ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ၊ နေဝ ဝုဋ္ဌာပေတိ န ဝုဋ္ဌာပနာယ ဥဿုက္ကံ ကရောတီတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ၊ ဘိက္ခဝေ၊ ထုလ္လနန္ဒာ ဘိက္ခုနီ သိက္ခမာနံ – ‘‘သစေ မံ တွံ၊ အယျေ၊ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’’တိ ဝတွာ၊ နေဝ ဝုဋ္ဌာပေဿတိ န ဝုဋ္ဌာပနာယ ဥဿုက္ကံ ကရိဿတိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဘိက္ခုနိယော ဣမံ သိက္ခာပဒံ ဥဒ္ဒိသန္တု –

၁၁၅၅. ‘‘ယာ ပန ဘိက္ခုနီ သိက္ခမာနံ – ‘သစေ မံ တွံ အယျေ ဒွေ ဝဿာနိ အနုဗန္ဓိဿသိ ဧဝါဟံ တံ ဝုဋ္ဌာပေဿာမီ’တိ ဝတွာ၊ သာ ပစ္ဆာ အနန္တရာယိကိနီ နေဝ ဝုဋ္ဌာပေယျ န ဝုဋ္ဌာပနာယ ဥဿုက္ကံ ကရေယျ၊ ပါစိတ္တိယ’’န္တိ.

၁၁၅၆. ယာ ပနာတိ ယာ ယာဒိသာ။ပေ။ ဘိက္ခုနီတိ။ပေ။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ.

သိက္ခမာနာ နာမ ဒွေ ဝဿာနိ ဆသု ဓမ္မေသု သိက္ခိတသိက္ခာ.

သစေ မံ တွံ အယျေ ဒွေ ဝဿာနိ အနုဗန္ဓိဿသီတိ ဒွေ သံဝစ္ဆရာနိ ဥပဋ္ဌဟိဿသိ.

ဧဝါဟံ တံ ဝုဋ္ဌာပေဿာမီတိ ဧဝါဟံ တံ ဥပသမ္ပာဒေဿာမိ.

သာ ပစ္ဆာ အနန္တရာယိကိနီတိ အသတိ အန္တရာယေ.

နေဝ ဝုဋ္ဌာပေယျာတိ န သယံ ဝုဋ္ဌာပေယျ.

န ဝုဋ္ဌာပနာယ ဥဿုက္ကံ ကရေယျာတိ န အညံ အာဏာပေယျ. ‘‘နေဝ ဝုဋ္ဌာပေဿာမိ န ဝုဋ္ဌာပနာယ ဥဿုက္ကံ ကရိဿာမီ’’တိ ဓုရံ နိက္ခိတ္တမတ္တေ အာပတ္တိ ပါစိတ္တိယဿ.

၁၁၅၇. အနာပတ္တိ သတိ အန္တရာယေ၊ ပရိယေသိတွာ န လဘတိ၊ ဂိလာနာယ၊ အာပဒါသု၊ ဥမ္မတ္တိကာယ၊ အာဒိကမ္မိကာယာတိ.

အဋ္ဌမသိက္ခာပဒံ နိဋ္ဌိတံ.