၂. သပ္ပါဏကသိက္ခာပဒံ

၃၈၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဆဗ္ဗဂ္ဂိယာ ဘိက္ခူ ဇာနံ သပ္ပါဏကံ ဥဒကံ ပရိဘုဉ္ဇန္တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဇာနံ သပ္ပါဏကံ ဥဒကံ ပရိဘုဉ္ဇိဿန္တီ’’တိ။ပေ။ သစ္စံ ကိရ တုမှေ၊ ဘိက္ခဝေ၊ ဇာနံ သပ္ပါဏကံ ဥဒကံ ပရိဘုဉ္ဇထာတိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ ဇာနံ သပ္ပါဏကံ ဥဒကံ ပရိဘုဉ္ဇိဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၃၈၈. ‘‘ယော ပန ဘိက္ခု ဇာနံ သပ္ပါဏကံ ဥဒကံ ပရိဘုဉ္ဇေယျ၊ ပါစိတ္တိယ’’န္တိ.

၃၈၉. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဇာနာတိ နာမ သာမံ ဝါ ဇာနာတိ၊ အညေ ဝါ တဿ အာရောစေန္တိ. ‘‘သပ္ပါဏက’’န္တိ ဇာနန္တော၊ ‘‘ပရိဘောဂေန မရိဿန္တီ’’တိ ဇာနန္တော ပရိဘုဉ္ဇတိ၊ အာပတ္တိ ပါစိတ္တိယဿ.

၃၉၀. သပ္ပါဏကေ သပ္ပါဏကသညီ ပရိဘုဉ္ဇတိ၊ အာပတ္တိ ပါစိတ္တိယဿ. သပ္ပါဏကေ ဝေမတိကော ပရိဘုဉ္ဇတိ၊ အာပတ္တိ ဒုက္ကဋဿ. သပ္ပါဏကေ အပ္ပါဏကသညီ ပရိဘုဉ္ဇတိ၊ အနာပတ္တိ. အပ္ပါဏကေ သပ္ပါဏကသညီ၊ အာပတ္တိ ဒုက္ကဋဿ. အပ္ပါဏကေ ဝေမတိကော၊ အာပတ္တိ ဒုက္ကဋဿ. အပ္ပါဏကေ အပ္ပါဏကသညီ၊ အနာပတ္တိ.

၃၉၁. အနာပတ္တိ ‘‘သပ္ပါဏက’’န္တိ အဇာနန္တော၊ ‘‘အပ္ပါဏက’’န္တိ ဇာနန္တော၊ ‘‘ပရိဘောဂေန န မရိဿန္တီ’’တိ ဇာနန္တော ပရိဘုဉ္ဇတိ၊ ဥမ္မတ္တကဿ၊ အာဒိကမ္မိကဿာတိ.

သပ္ပါဏကသိက္ခာပဒံ နိဋ္ဌိတံ ဒုတိယံ.