၈. နာဝါဘိရုဟနသိက္ခာပဒံ

၁၈၆. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဆဗ္ဗဂ္ဂိယာ ဘိက္ခူ ဘိက္ခုနီဟိ သဒ္ဓိံ သံဝိဓာယ ဧကံ နာဝံ [ဧကနာဝံ (သျာ.)] အဘိရုဟန္တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ယထေဝ မယံ သပဇာပတိကာ နာဝါယ [ဧကနာဝါယ (သျာ.)] ကီဠာမ၊ ဧဝမေဝိမေ သမဏာ သကျပုတ္တိယာ ဘိက္ခုနီဟိ သဒ္ဓိံ သံဝိဓာယ နာဝါယ ကီဠန္တီ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ဘိက္ခုနီဟိ သဒ္ဓိံ သံဝိဓာယ ဧကံ နာဝံ အဘိရုဟိဿန္တီ’’တိ။ပေ။ ‘‘သစ္စံ ကိရ တုမှေ၊ ဘိက္ခဝေ၊ ဘိက္ခုနီဟိ သဒ္ဓိံ သံဝိဓာယ ဧကံ နာဝံ အဘိရုဟထာ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ ဘိက္ခုနီဟိ သဒ္ဓိံ သံဝိဓာယ ဧကံ နာဝံ အဘိရုဟိဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယော ပန ဘိက္ခု ဘိက္ခုနိယာ သဒ္ဓိံ သံဝိဓာယ ဧကံ နာဝံ [ဧကနာဝံ (သျာ.)] အဘိရုဟေယျ၊ ဥဒ္ဓံဂါမိနိံ ဝါ အဓောဂါမိနိံ ဝါ၊ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၁၈၇. တေန ခေါ ပန သမယေန သမ္ဗဟုလာ ဘိက္ခူ စ ဘိက္ခုနိယော စ သာကေတာ သာဝတ္ထိံ အဒ္ဓါနမဂ္ဂပ္ပဋိပန္နာ ဟောန္တိ. အန္တရာမဂ္ဂေ နဒီ တရိတဗ္ဗာ [ဥတ္တရိတဗ္ဗာ (သျာ.)] ဟောတိ. အထ ခေါ တာ ဘိက္ခုနိယော တေ ဘိက္ခူ ဧတဒဝေါစုံ – ‘‘မယမ္ပိ အယျေဟိ သဒ္ဓိံ ဥတ္တရိဿာမာ’’တိ. ‘‘န၊ ဘဂိနီ၊ ကပ္ပတိ ဘိက္ခုနိယာ သဒ္ဓိံ သံဝိဓာယ ဧကံ နာဝံ အဘိရုဟိတုံ၊ တုမှေ ဝါ ပဌမံ ဥတ္တရထ မယံ ဝါ ဥတ္တရိဿာမာ’’တိ. ‘‘အယျာ၊ ဘန္တေ၊ အဂ္ဂပုရိသာ. အယျာဝ ပဌမံ ဥတ္တရန္တူ’’တိ. အထ ခေါ တာသံ ဘိက္ခုနီနံ ပစ္ဆာ ဥတ္တရန္တီနံ စောရာ အစ္ဆိန္ဒိံသု စ ဒူသေသုဉ္စ. အထ ခေါ တာ ဘိက္ခုနိယော သာဝတ္ထိံ ဂန္တွာ ဘိက္ခုနီနံ ဧတမတ္ထံ အာရောစေသုံ. ဘိက္ခုနိယော ဘိက္ခူနံ ဧတမတ္ထံ အာရောစေသုံ. ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ တိရိယံ တရဏာယ ဘိက္ခုနိယာ သဒ္ဓိံ သံဝိဓာယ ဧကံ နာဝံ အဘိရုဟိတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၁၈၈. ‘‘ယော ပန ဘိက္ခု ဘိက္ခုနိယာ သဒ္ဓိံ သံဝိဓာယ ဧကံ နာဝံ အဘိရုဟေယျ ဥဒ္ဓံဂါမိနိံ ဝါ အဓောဂါမိနိံ ဝါ၊ အညတြ တိရိယံ တရဏာယ၊ ပါစိတ္တိယ’’န္တိ.

၁၈၉. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဘိက္ခုနီ နာမ ဥဘတောသံဃေ ဥပသမ္ပန္နာ.

သဒ္ဓိန္တိ ဧကတော.

သံဝိဓာယာတိ ‘‘အဘိရုဟာမ၊ ဘဂိနိ၊ အဘိရုဟာမာယျ၊ အဘိရုဟာမာယျ၊ အဘိရုဟာမ၊ ဘဂိနိ၊ အဇ္ဇ ဝါ ဟိယျော ဝါ ပရေ ဝါ အဘိရုဟာမာ’’တိ သံဝိဒဟတိ အာပတ္တိ ဒုက္ကဋဿ.

ဘိက္ခုနိယာ အဘိရုဠှေ ဘိက္ခု အဘိရုဟတိ၊ အာပတ္တိ ပါစိတ္တိယဿ. ဘိက္ခုမှိ အဘိရုဠှေ ဘိက္ခုနီ အဘိရုဟတိ၊ အာပတ္တိ ပါစိတ္တိယဿ. ဥဘော ဝါ အဘိရုဟန္တိ၊ အာပတ္တိ ပါစိတ္တိယဿ.

ဥဒ္ဓံဂါမိနိန္တိ ဥဇ္ဇဝနိကာယ.

အဓောဂါမိနိန္တိ ဩဇဝနိကာယ.

အညတြ တိရိယံ တရဏာယာတိ ဌပေတွာ တိရိယံ တရဏံ.

ကုက္ကုဋသမ္ပာတေ ဂါမေ၊ ဂါမန္တရေ ဂါမန္တရေ အာပတ္တိ ပါစိတ္တိယဿ. အဂါမကေ အရညေ၊ အဍ္ဎယောဇနေ အဍ္ဎယောဇနေ အာပတ္တိ ပါစိတ္တိယဿ.

၁၉၀. သံဝိဒဟိတေ သံဝိဒဟိတသညီ ဧကံ နာဝံ အဘိရုဟတိ ဥဒ္ဓံဂါမိနိံ ဝါ အဓောဂါမိနိံ ဝါ၊ အညတြ တိရိယံ တရဏာယ၊ အာပတ္တိ ပါစိတ္တိယဿ. သံဝိဒဟိတေ ဝေမတိကော ဧကံ နာဝံ အဘိရုဟတိ ဥဒ္ဓံဂါမိနိံ ဝါ အဓောဂါမိနိံ ဝါ၊ အညတြ တိရိယံ တရဏာယ၊ အာပတ္တိ ပါစိတ္တိယဿ. သံဝိဒဟိတေ အသံဝိဒဟိတသညီ ဧကံ နာဝံ အဘိရုဟတိ ဥဒ္ဓံဂါမိနိံ ဝါ အဓောဂါမိနိံ ဝါ၊ အညတြ တိရိယံ တရဏာယ၊ အာပတ္တိ ပါစိတ္တိယဿ.

ဘိက္ခု သံဝိဒဟတိ၊ ဘိက္ခုနီ န သံဝိဒဟတိ၊ အာပတ္တိ ဒုက္ကဋဿ. အသံဝိဒဟိတေ သံဝိဒဟိတသညီ၊ အာပတ္တိ ဒုက္ကဋဿ. အသံဝိဒဟိတေ ဝေမတိကော၊ အာပတ္တိ ဒုက္ကဋဿ. အသံဝိဒဟိတေ၊ အသံဝိဒဟိတသညီ၊ အနာပတ္တိ.

၁၉၁. အနာပတ္တိ တိရိယံ တရဏာယ၊ အသံဝိဒဟိတွာ အဘိရုဟန္တိ၊ ဘိက္ခုနီ သံဝိဒဟတိ၊ ဘိက္ခု န သံဝိဒဟတိ၊ ဝိသင်္ကေတေန အဘိရုဟန္တိ၊ အာပဒါသု ဥမ္မတ္တကဿ၊ အာဒိကမ္မိဿာတိ.

နာဝါဘိရုဟနသိက္ခာပဒံ နိဋ္ဌိတံ အဋ္ဌမံ.