၅. စီဝရဒါနသိက္ခာပဒံ

၁၆၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အညတရော ဘိက္ခု သာဝတ္ထိယံ အညတရိဿာ ဝိသိခါယ ပိဏ္ဍာယ စရတိ. အညတရာပိ ဘိက္ခုနီ တဿာ ဝိသိခါယ ပိဏ္ဍာယ စရတိ. အထ ခေါ သော ဘိက္ခု တံ ဘိက္ခုနိံ ဧတဒဝေါစ – ‘‘ဂစ္ဆ၊ ဘဂိနိ၊ အမုကသ္မိံ ဩကာသေ ဘိက္ခာ ဒိယျတီ’’တိ. သာပိ ခေါ ဧဝမာဟ – ‘‘ဂစ္ဆာယျ၊ အမုကသ္မိံ ဩကာသေ ဘိက္ခာ ဒိယျတီ’’တိ. တေ အဘိဏှဒဿနေန သန္ဒိဋ္ဌာ အဟေသုံ. တေန ခေါ ပန သမယေန သံဃဿ စီဝရံ ဘာဇီယတိ. အထ ခေါ သာ ဘိက္ခုနီ ဩဝါဒံ ဂန္တွာ ယေန သော ဘိက္ခု တေနုပသင်္ကမိ၊ ဥပသင်္ကမိတွာ တံ ဘိက္ခုံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတံ ခေါ တံ ဘိက္ခုနိံ သော ဘိက္ခု ဧတဒဝေါစ – ‘‘အယံ မေ၊ ဘဂိနိ၊ စီဝရပဋိဝီသော [ပဋိဝိံသော (သီ.)၊ ပဋိဝိသော (ဣတိပိ)]၊ သာဒိယိဿသီ’’တိ? ‘‘အာမာယျ၊ ဒုဗ္ဗလစီဝရာမှီ’’တိ.

အထ ခေါ သော ဘိက္ခု တဿာ ဘိက္ခုနိယာ စီဝရံ အဒါသိ. သောပိ ခေါ ဘိက္ခု ဒုဗ္ဗလစီဝရော ဟောတိ. ဘိက္ခူ တံ ဘိက္ခုံ ဧတဒဝေါစုံ – ‘‘ကရောဟိ ဒါနိ တေ၊ အာဝုသော၊ စီဝရ’’န္တိ. အထ ခေါ သော ဘိက္ခု ဘိက္ခူနံ ဧတမတ္ထံ အာရောစေသိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခု ဘိက္ခုနိယာ စီဝရံ ဒဿတီ’’တိ။ပေ။ ‘‘သစ္စံ ကိရ တွံ၊ ဘိက္ခု၊ ဘိက္ခုနိယာ စီဝရံ အဒါသီ’’တိ? ‘‘သစ္စံ၊ ဘဂဝါ’’တိ. ‘‘ဉာတိကာ တေ၊ ဘိက္ခု၊ အညာတိကာ’’တိ? ‘‘အညာတိကာ၊ ဘဂဝါ’’တိ. ‘‘အညာတကော၊ မောဃပုရိသ၊ အညာတိကာယ န ဇာနာတိ ပတိရူပံ ဝါ အပ္ပတိရူပံ ဝါ သန္တံ ဝါ အသန္တံ ဝါ. ကထဉှိ နာမ တွံ၊ မောဃပုရိသ၊ အညာတိကာယ ဘိက္ခုနိယာ စီဝရံ ဒဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

‘‘ယော ပန ဘိက္ခု အညာတိကာယ ဘိက္ခုနိယာ စီဝရံ ဒဒေယျ၊ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၁၇၀. တေန ခေါ ပန သမယေန ဘိက္ခူ ကုက္ကုစ္စာယန္တာ ဘိက္ခုနီနံ ပါရိဝတ္တကံ [ပါရိဝဋ္ဋကံ (ဣတိပိ)] စီဝရံ န ဒေန္တိ. ဘိက္ခုနိယော ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အယျာ အမှာကံ ပါရိဝတ္တကံ စီဝရံ န ဒဿန္တီ’’တိ! အဿောသုံ ခေါ ဘိက္ခူ တာသံ ဘိက္ခုနီနံ ဥဇ္ဈာယန္တီနံ ခိယျန္တီနံ ဝိပါစေန္တီနံ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ပဉ္စန္နံ ပါရိဝတ္တကံ ဒါတုံ. ဘိက္ခုဿ၊ ဘိက္ခုနိယာ၊ သိက္ခမာနာယ၊ သာမဏေရဿ၊ သာမဏေရိယာ – အနုဇာနာမိ၊ ဘိက္ခဝေ၊ ဣမေသံ ပဉ္စန္နံ ပါရိဝတ္တကံ ဒါတုံ. ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၁၇၁. ‘‘ယော ပန ဘိက္ခု အညာတိကာယ ဘိက္ခုနိယာ စီဝရံ ဒဒေယျ၊ အညတြ ပါရိဝတ္တကာ၊ ပါစိတ္တိယ’’န္တိ.

၁၇၂. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

အညာတိကာ နာမ မာတိတော ဝါ ပိတိတော ဝါ ယာဝ သတ္တမာ ပိတာမဟယုဂါ အသမ္ဗဒ္ဓါ.

ဘိက္ခုနီ နာမ ဥဘတောသံဃေ ဥပသမ္ပန္နာ.

စီဝရံ နာမ ဆန္နံ စီဝရာနံ အညတရံ စီဝရံ ဝိကပ္ပနုပဂံ ပစ္ဆိမံ [ဝိကပ္ပနုပဂပစ္ဆိမံ (သီ.)].

အညတြ ပါရိဝတ္တကာတိ ဌပေတွာ ပါရိဝတ္တကံ ဒေတိ၊ အာပတ္တိ ပါစိတ္တိယဿ.

၁၇၃. အညာတိကာယ အညာတိကသညီ စီဝရံ ဒေတိ၊ အညတြ ပါရိဝတ္တကာ၊ အာပတ္တိ ပါစိတ္တိယဿ. အညာတိကာယ ဝေမတိကော စီဝရံ ဒေတိ၊ အညတြ ပါရိဝတ္တကာ၊ အာပတ္တိ ပါစိတ္တိယဿ. အညာတိကာယ ဉာတိကသညီ စီဝရံ ဒေတိ၊ အညတြ ပါရိဝတ္တကာ၊ အာပတ္တိ ပါစိတ္တိယဿ.

ဧကတော ဥပသမ္ပန္နာယ စီဝရံ ဒေတိ၊ အညတြ ပါရိဝတ္တကာ၊ အာပတ္တိ ဒုက္ကဋဿ. ဉာတိကာယ အညာတိကသညီ၊ အာပတ္တိ ဒုက္ကဋဿ. ဉာတိကာယ ဝေမတိကော၊ အာပတ္တိ ဒုက္ကဋဿ. ဉာတိကာယ ဉာတိကသညီ၊ အနာပတ္တိ.

၁၇၄. အနာပတ္တိ ဉာတိကာယ၊ ပါရိဝတ္တကံ ပရိတ္တေန ဝါ ဝိပုလံ၊ ဝိပုလေန ဝါ ပရိတ္တံ၊ ဘိက္ခုနီ ဝိဿာသံ ဂဏှာတိ၊ တာဝကာလိကံ ဂဏှာတိ၊ စီဝရံ ဌပေတွာ အညံ ပရိက္ခာရံ ဒေတိ၊ သိက္ခမာနာယ၊ သာမဏေရိယာ၊ ဥမ္မတ္တကဿ၊ အာဒိကမ္မိကဿာတိ.

စီဝရဒါနသိက္ခာပဒံ နိဋ္ဌိတံ ပဉ္စမံ.