၁. ဘူတဂါမသိက္ခာပဒံ

၈၉. တေန သမယေန ဗုဒ္ဓေါ ဘဂဝါ အာဠဝိယံ ဝိဟရတိ အဂ္ဂါဠဝေ စေတိယေ. တေန ခေါ ပန သမယေန အာဠဝကာ ဘိက္ခူ နဝကမ္မံ ကရောန္တာ ရုက္ခံ ဆိန္ဒန္တိပိ ဆေဒါပေန္တိပိ. အညတရောပိ အာဠဝကော ဘိက္ခု ရုက္ခံ ဆိန္ဒတိ. တသ္မိံ ရုက္ခေ အဓိဝတ္ထာ ဒေဝတာ တံ ဘိက္ခုံ ဧတဒဝေါစ – ‘‘မာ၊ ဘန္တေ၊ အတ္တနော ဘဝနံ ကတ္တုကာမော မယှံ ဘဝနံ ဆိန္ဒီ’’တိ. သော ဘိက္ခု အနာဒိယန္တော ဆိန္ဒိ ယေဝ၊ တဿာ စ ဒေဝတာယ ဒါရကဿ ဗာဟုံ အာကောဋေသိ. အထ ခေါ တဿာ ဒေဝတာယ ဧတဒဟောသိ – ‘‘ယံန္နူနာဟံ ဣမံ ဘိက္ခုံ ဣဓေဝ ဇီဝိတာ ဝေါရောပေယျ’’န္တိ. အထ ခေါ တဿာ ဒေဝတာယ ဧတဒဟောသိ – ‘‘န ခေါ မေတံ ပတိရူပံ ယာဟံ ဣမံ ဘိက္ခုံ ဣဓေဝ ဇီဝိတာ ဝေါရောပေယျံ. ယန္နူနာဟံ ဘဂဝတော ဧတမတ္ထံ အာရောစေယျ’’န္တိ. အထ ခေါ သာ ဒေဝတာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝတော ဧတမတ္ထံ အာရောစေသိ. ‘‘သာဓု သာဓု ဒေဝတေ! သာဓု ခေါ တွံ၊ ဒေဝတေ၊ တံ ဘိက္ခုံ ဇီဝိတာ န ဝေါရောပေသိ. သစဇ္ဇ တွံ၊ ဒေဝတေ၊ တံ ဘိက္ခုံ ဇီဝိတာ ဝေါရောပေယျာသိ၊ ဗဟုဉ္စ တွံ၊ ဒေဝတေ၊ အပုညံ ပသဝေယျာသိ. ဂစ္ဆ တွံ၊ ဒေဝတေ၊ အမုကသ္မိံ ဩကာသေ ရုက္ခော ဝိဝိတ္တော တသ္မိံ ဥပဂစ္ဆာ’’တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ ရုက္ခံ ဆိန္ဒိဿန္တိပိ ဆေဒါပေဿန္တိပိ ဧကိန္ဒြိယံ သမဏာ သကျပုတ္တိယာ ဇီဝံ ဝိဟေဌေဿန္တီ’’တိ!

အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာဠဝကာ ဘိက္ခူ ရုက္ခံ ဆိန္ဒိဿန္တိပိ ဆေဒါပေဿန္တိပီ’’တိ။ပေ။ ‘‘သစ္စံ ကိရ တုမှေ၊ ဘိက္ခဝေ၊ ရုက္ခံ ဆိန္ဒထာပိ ဆေဒါပေထာပီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တုမှေ၊ မောဃပုရိသာ၊ ရုက္ခံ ဆိန္ဒိဿထာပိ၊ ဆေဒါပေဿထာပိ! ဇီဝသညိနော ဟိ၊ မောဃပုရိသာ၊ မနုဿာ ရုက္ခသ္မိံ၊ နေတံ မောဃပုရိသာ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၉၀. ‘‘ဘူတဂါမပါတဗျတာယ ပါစိတ္တိယ’’န္တိ.

၉၁. ဘူတဂါမော နာမ ပဉ္စ ဗီဇဇာတာနိ – မူလဗီဇံ၊ ခန္ဓဗီဇံ၊ ဖဠုဗီဇံ၊ အဂ္ဂဗီဇံ၊ ဗီဇဗီဇမေဝ [ဗီဇဗီဇဉ္စေဝ (ဣတိပိ)] ပဉ္စမံ.

မူလဗီဇံ နာမ – ဟလိဒ္ဒိ၊ သိင်္ဂိဝေရံ၊ ဝစာ၊ ဝစတ္တံ၊ အတိဝိသာ၊ ကဋုကရောဟိဏီ၊ ဥသီရံ၊ ဘဒ္ဒမူတ္တကံ၊ ယာနိ ဝါ ပနညာနိပိ အတ္ထိ မူလေ ဇာယန္တိ၊ မူလေ သဉ္ဇာယန္တိ၊ ဧတံ မူလဗီဇံ နာမ.

ခန္ဓဗီဇံ နာမ – အဿတ္ထော၊ နိဂြောဓော၊ ပိလက္ခော၊ ဥဒုမ္ဗရော၊ ကစ္ဆကော၊ ကပိတ္ထနော၊ ယာနိ ဝါ ပနညာနိပိ အတ္ထိ ခန္ဓေ ဇာယန္တိ၊ ခန္ဓေ သဉ္ဇာယန္တိ၊ ဧတံ ခန္ဓဗီဇံ နာမ.

ဖဠုဗီဇံ နာမ – ဥစ္ဆု၊ ဝေဠု၊ နဠော၊ ယာနိ ဝါ ပနညာနိပိ အတ္ထိ ပဗ္ဗေ ဇာယန္တိ၊ ပဗ္ဗေ သဉ္ဇာယန္တိ၊ ဧတံ ဖဠုဗီဇံ နာမ.

အဂ္ဂဗီဇံ နာမ – အဇ္ဇုကံ၊ ဖဏိဇ္ဇကံ၊ ဟိရိဝေရံ၊ ယာနိ ဝါ ပနညာနိပိ အတ္ထိ အဂ္ဂေ ဇာယန္တိ၊ အဂ္ဂေ သဉ္ဇာယန္တိ၊ ဧတံ အဂ္ဂဗီဇံ နာမ.

ဗီဇဗီဇံ နာမ – ပုဗ္ဗဏ္ဏံ၊ အပရဏ္ဏံ၊ ယာနိ ဝါ ပနညာနိပိ အတ္ထိ ဗီဇေ ဇာယန္တိ၊ ဗီဇေ သဉ္ဇာယန္တိ၊ ဧတံ ဗီဇဗီဇံ နာမ.

၉၂. ဗီဇေ ဗီဇသညီ ဆိန္ဒတိ ဝါ ဆေဒါပေတိ ဝါ၊ ဘိန္ဒတိ ဝါ ဘေဒါပေတိ ဝါ၊ ပစတိ ဝါ ပစာပေတိ ဝါ၊ အာပတ္တိ ပါစိတ္တိယဿ. ဗီဇေ ဝေမတိကော ဆိန္ဒတိ ဝါ ဆေဒါပေတိ ဝါ၊ ဘိန္ဒတိ ဝါ ဘေဒါပေတိ ဝါ၊ ပစတိ ဝါ ပစာပေတိ ဝါ၊ အာပတ္တိ ဒုက္ကဋဿ. ဗီဇေ အဗီဇသညီ ဆိန္ဒတိ ဝါ ဆေဒါပေတိ ဝါ၊ ဘိန္ဒတိ ဝါ ဘေဒါပေတိ ဝါ၊ ပစတိ ဝါ ပစာပေတိ ဝါ၊ အနာပတ္တိ. အဗီဇေ ဗီဇသညီ အာပတ္တိ ဒုက္ကဋဿ. အဗီဇေ ဝေမတိကော၊ အာပတ္တိ ဒုက္ကဋဿ. အဗီဇေ အဗီဇသညီ၊ အနာပတ္တိ.

၉၃. အနာပတ္တိ – ‘‘ဣမံ ဇာန၊ ဣမံ ဒေဟိ၊ ဣမံ အာဟရ၊ ဣမိနာ အတ္ထော၊ ဣမံ ကပ္ပိယံ ကရောဟီ’’တိ ဘဏတိ၊ အသဉ္စိစ္စ၊ အဿတိယာ၊ အဇာနန္တဿ၊ ဥမ္မတ္တကဿ၊ အာဒိကမ္မိကဿာတိ.

ဘူတဂါမသိက္ခာပဒံ နိဋ္ဌိတံ ပဌမံ.