၂၃၉. ဒွေနိဿာရဏာဒိကထာ

၃၉၅. ဒွေမာ၊ ဘိက္ခဝေ၊ နိဿာရဏာ. အတ္ထိ၊ ဘိက္ခဝေ၊ ပုဂ္ဂလော အပ္ပတ္တော နိဿာရဏံ. တဉ္စေ သံဃော နိဿာရေတိ၊ ဧကစ္စော သုနိဿာရိတော၊ ဧကစ္စော ဒုန္နိဿာရိတော. ကတမော စ၊ ဘိက္ခဝေ၊ ပုဂ္ဂလော အပ္ပတ္တော နိဿာရဏံ၊ တဉ္စေ သံဃော နိဿာရေတိ – ဒုန္နိဿာရိတော? ဣဓ ပန၊ ဘိက္ခဝေ၊ ဘိက္ခု သုဒ္ဓေါ ဟောတိ အနာပတ္တိကော. တဉ္စေ သံဃော နိဿာရေတိ – ဒုန္နိဿာရိတော. အယံ ဝုစ္စတိ၊ ဘိက္ခဝေ၊ ပုဂ္ဂလော အပ္ပတ္တော နိဿာရဏံ၊ တဉ္စေ သံဃော နိဿာရေတိ – ဒုန္နိဿာရိတော.

ကတမော စ၊ ဘိက္ခဝေ၊ ပုဂ္ဂလော အပ္ပတ္တော နိဿာရဏံ၊ တဉ္စေ သံဃော နိဿာရေတိ – သုနိဿာရိတော? ဣဓ ပန၊ ဘိက္ခဝေ၊ ဘိက္ခု ဗာလော ဟောတိ အဗျတ္တော အာပတ္တိဗဟုလော အနပဒါနော၊ ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ၊ တဉ္စေ သံဃော နိဿာရေတိ – သုနိဿာရိတော. အယံ ဝုစ္စတိ၊ ဘိက္ခဝေ၊ ပုဂ္ဂလော အပ္ပတ္တော နိဿာရဏံ၊ တဉ္စေ သံဃော နိဿာရေတိ – သုနိဿာရိတော.

၃၉၆. ဒွေမာ၊ ဘိက္ခဝေ၊ ဩသာရဏာ. အတ္ထိ၊ ဘိက္ခဝေ၊ ပုဂ္ဂလော အပ္ပတ္တော ဩသာရဏံ တဉ္စေ သံဃော ဩသာရေတိ၊ ဧကစ္စော သောသာရိတော၊ ဧကစ္စော ဒေါသာရိတော. ကတမော စ၊ ဘိက္ခဝေ၊ ပုဂ္ဂလော အပ္ပတ္တော ဩသာရဏံ၊ တဉ္စေ သံဃော ဩသာရေတိ – ဒေါသာရိတော? ပဏ္ဍကော၊ ဘိက္ခဝေ၊ အပ္ပတ္တော ဩသာရဏံ၊ တဉ္စေ သံဃော ဩသာရေတိ – ဒေါသာရိတော. ထေယျသံဝါသကော၊ ဘိက္ခဝေ၊ အပ္ပတ္တော ဩသာရဏံ၊ တဉ္စေ သံဃော ဩသာရေတိ – ဒေါသာရိတော. တိတ္ထိယပက္ကန္တကော၊ ဘိက္ခဝေ။ပေ။ တိရစ္ဆာနဂတော၊ ဘိက္ခဝေ။ မာတုဃာတကော၊ ဘိက္ခဝေ။ ပိတုဃာတကော၊ ဘိက္ခဝေ။ အရဟန္တဃာတကော၊ ဘိက္ခဝေ။ ဘိက္ခုနိဒူသကော၊ ဘိက္ခဝေ။ သံဃဘေဒကော၊ ဘိက္ခဝေ။ လောဟိတုပ္ပါဒကော၊ ဘိက္ခဝေ။ ဥဘတောဗျဉ္ဇနကော၊ ဘိက္ခဝေ၊ အပ္ပတ္တော၊ ဩသာရဏံ၊ တဉ္စေ သံဃော ဩသာရေတိ – ဒေါသာရိတော. အယံ ဝုစ္စတိ၊ ဘိက္ခဝေ၊ ပုဂ္ဂလော အပ္ပတ္တော ဩသာရဏံ၊ တဉ္စေ သံဃော ဩသာရေတိ – ဒေါသာရိတော. ဣမေ ဝုစ္စန္တိ၊ ဘိက္ခဝေ၊ ပုဂ္ဂလာ အပ္ပတ္တာ ဩသာရဏံ၊ တေ စေ သံဃော ဩသာရေတိ – ဒေါသာရိတာ.

ကတမော စ၊ ဘိက္ခဝေ၊ ပုဂ္ဂလော အပ္ပတ္တော ဩသာရဏံ၊ တဉ္စေ သံဃော ဩသာရေတိ – သောသာရိတော? ဟတ္ထစ္ဆိန္နော၊ ဘိက္ခဝေ၊ အပ္ပတ္တော ဩသာရဏံ၊ တဉ္စေ သံဃော ဩသာရေတိ၊ သောသာရိတော. ပါဒစ္ဆိန္နော၊ ဘိက္ခဝေ။ပေ။ ဟတ္ထပါဒစ္ဆိန္နော၊ ဘိက္ခဝေ။ ကဏ္ဏစ္ဆိန္နော၊ ဘိက္ခဝေ။ နာသစ္ဆိန္နော၊ ဘိက္ခဝေ။ ကဏ္ဏနာသစ္ဆိန္နော၊ ဘိက္ခဝေ။ အင်္ဂုလိစ္ဆိန္နော၊ ဘိက္ခဝေ။ အဠစ္ဆိန္နော၊ ဘိက္ခဝေ။ ကဏ္ဍရစ္ဆိန္နော၊ ဘိက္ခဝေ။ ဖဏဟတ္ထကော၊ ဘိက္ခဝေ။ ခုဇ္ဇော၊ ဘိက္ခဝေ။ ဝါမနော၊ ဘိက္ခဝေ။ ဂလဂဏ္ဍီ၊ ဘိက္ခဝေ။ လက္ခဏာဟတော၊ ဘိက္ခဝေ။ ကသာဟတော၊ ဘိက္ခဝေ။ လိခိတကော၊ ဘိက္ခဝေ။ သီပဒိကော၊ ဘိက္ခဝေ။ ပါပရောဂီ၊ ဘိက္ခဝေ။ ပရိသဒူသကော၊ ဘိက္ခဝေ။ ကာဏော၊ ဘိက္ခဝေ။ ကုဏီ၊ ဘိက္ခဝေ။ ခဉ္ဇော၊ ဘိက္ခဝေ။ ပက္ခဟတော၊ ဘိက္ခဝေ။ ဆိန္နိရိယာပထော၊ ဘိက္ခဝေ။ ဇရာဒုဗ္ဗလော၊ ဘိက္ခဝေ။ အန္ဓော၊ ဘိက္ခဝေ။ မူဂေါ၊ ဘိက္ခဝေ။ ဗဓိရော၊ ဘိက္ခဝေ။ အန္ဓမူဂေါ၊ ဘိက္ခဝေ။ အန္ဓဗဓိရော၊ ဘိက္ခဝေ။ မူဂဗဓိရော၊ ဘိက္ခဝေ။ အန္ဓမူဂဗဓိရော၊ ဘိက္ခဝေ၊ အပ္ပတ္တော ဩသာရဏံ၊ တဉ္စေ သံဃော ဩသာရေတိ – သောသာရိတော. အယံ ဝုစ္စတိ၊ ဘိက္ခဝေ၊ ပုဂ္ဂလော အပ္ပတ္တော ဩသာရဏံ၊ တဉ္စေ သံဃော ဩသာရေတိ – သောသာရိတော. ဣမေ ဝုစ္စန္တိ၊ ဘိက္ခဝေ၊ ပုဂ္ဂလာ အပ္ပတ္တာ ဩသာရဏံ၊ တေ စေ သံဃော ဩသာရေတိ – သောသာရိတာ.

ဒွေနိဿာရဏာဒိကထာ နိဋ္ဌိတာ.

ဝါသဘဂါမဘာဏဝါရော နိဋ္ဌိတော ပဌမော.