၂၄၀. အဓမ္မကမ္မာဒိကထာ

၃၉၇. ဣဓ ပန၊ ဘိက္ခဝေ၊ ဘိက္ခုဿ န ဟောတိ အာပတ္တိ ဒဋ္ဌဗ္ဗာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိ’’န္တိ? သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဿေယျ’’န္တိ. တံ သံဃော အာပတ္တိယာ အဒဿနေ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ န ဟောတိ အာပတ္တိ ပဋိကာတဗ္ဗာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဋိကရောဟိ တံ အာပတ္တိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမယံ ပဋိကရေယျ’’န္တိ. တံ သံဃော အာပတ္တိယာ အပ္ပဋိကမ္မေ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ န ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘ပါပိကာ တေ၊ အာဝုသော၊ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ ပါပိကာ ဒိဋ္ဌိ၊ ယမဟံ ပဋိနိဿဇ္ဇေယျ’’န္တိ. တံ သံဃော ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ န ဟောတိ အာပတ္တိ ဒဋ္ဌဗ္ဗာ၊ န ဟောတိ အာပတ္တိ ပဋိကာတဗ္ဗာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိ? ပဋိကရောဟိ တံ အာပတ္တိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဿေယျံ. နတ္ထိ မေ၊ အာဝုသော၊ အာပတ္တိ၊ ယမဟံ ပဋိကရေယျ’’န္တိ. တံ သံဃော အဒဿနေ ဝါ အပ္ပဋိကမ္မေ ဝါ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ န ဟောတိ အာပတ္တိ ဒဋ္ဌဗ္ဗာ၊ န ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိံ? ပါပိကာ တေ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဿေယျံ၊ နတ္ထိ မေ၊ အာဝုသော၊ ပါပိကာ ဒိဋ္ဌိ၊ ယမဟံ ပဋိနိဿဇ္ဇေယျ’’န္တိ. တံ သံဃော အဒဿနေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ န ဟောတိ အာပတ္တိ ပဋိကာတဗ္ဗာ၊ န ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဋိကရောဟိ တံ အာပတ္တိံ၊ ပါပိကာ တေ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဋိကရေယျံ. နတ္ထိ မေ၊ အာဝုသော၊ ပါပိကာ ဒိဋ္ဌိ၊ ယမဟံ ပဋိနိဿဇ္ဇေယျ’’န္တိ. တံ သံဃော အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ န ဟောတိ အာပတ္တိ ဒဋ္ဌဗ္ဗာ၊ န ဟောတိ အာပတ္တိ ပဋိကာတဗ္ဗာ၊ န ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိံ? ပဋိကရောဟိ တံ အာပတ္တိံ၊ ပါပိကာ တေ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဿေယျံ. နတ္ထိ မေ၊ အာဝုသော၊ အာပတ္တိ၊ ယမဟံ ပဋိကရေယျံ. နတ္ထိ မေ၊ အာဝုသော၊ ပါပိကာ ဒိဋ္ဌိ၊ ယမဟံ ပဋိနိဿဇ္ဇေယျ’’န္တိ. တံ သံဃော အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ.

၃၉၈. ဣဓ ပန၊ ဘိက္ခဝေ၊ ဘိက္ခုဿ ဟောတိ အာပတ္တိ ဒဋ္ဌဗ္ဗာ. တမေနံ စောဒေတိ. သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိ’’န္တိ? သော ဧဝံ ဝဒေတိ – ‘‘အာမာဝုသော၊ ပဿာမီ’’တိ. တံ သံဃော အာပတ္တိယာ အဒဿနေ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ ဟောတိ အာပတ္တိ ပဋိကာတဗ္ဗာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဋိကရောဟိ တံ အာပတ္တိ’’န္တိ. သော ဧဝံ ဝဒေတိ – ‘‘အာမာဝုသော၊ ပဋိကရိဿာမီ’’တိ. တံ သံဃော အာပတ္တိယာ အပ္ပဋိကမ္မေ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘ပါပိကာ တေ၊ အာဝုသော၊ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘အာမာဝုသော၊ ပဋိနိဿဇ္ဇိဿာမီ’’တိ. တံ သံဃော ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိပတိ – အဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ ဟောတိ အာပတ္တိ ဒဋ္ဌဗ္ဗာ၊ ဟောတိ အာပတ္တိ ပဋိကာတဗ္ဗာ။ပေ။ ဟောတိ အာပတ္တိ ဒဋ္ဌဗ္ဗာ၊ ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ပေ။ ဟောတိ အာပတ္တိ ပဋိကာတဗ္ဗာ၊ ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ပေ။ ဟောတိ အာပတ္တိ ဒဋ္ဌဗ္ဗာ၊ ဟောတိ အာပတ္တိ ပဋိကာတဗ္ဗာ၊ ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိံ? ပဋိကရောဟိ တံ အာပတ္တိံ၊ ပါပိကာ တေ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘အာမာဝုသော၊ ပဿာမိ၊ အာမ ပဋိကရိဿာမိ၊ အာမ ပဋိနိဿဇ္ဇိဿာမီ’’တိ. တံ သံဃော အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – အဓမ္မကမ္မံ.

၃၉၉. ဣဓ ပန၊ ဘိက္ခဝေ၊ ဘိက္ခုဿ ဟောတိ အာပတ္တိ ဒဋ္ဌဗ္ဗာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိ’’န္တိ? သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဿေယျ’’န္တိ. တံ သံဃော အာပတ္တိယာ အဒဿနေ ဥက္ခိပတိ – ဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ ဟောတိ အာပတ္တိ ပဋိကာတဗ္ဗာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဋိကရောဟိ တံ အာပတ္တိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဋိကရေယျ’’န္တိ. တံ သံဃော အာပတ္တိယာ အပ္ပဋိကမ္မေ ဥက္ခိပတိ – ဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘ပါပိကာ တေ၊ အာဝုသော၊ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ ပါပိကာ ဒိဋ္ဌိ၊ ယမဟံ ပဋိနိဿဇ္ဇေယျ’’န္တိ. တံ သံဃော ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိပတိ – ဓမ္မကမ္မံ.

ဣဓ ပန၊ ဘိက္ခဝေ၊ ဘိက္ခုဿ ဟောတိ အာပတ္တိ ဒဋ္ဌဗ္ဗာ၊ ဟောတိ အာပတ္တိ ပဋိကာတဗ္ဗာ။ပေ။

ဟောတိ အာပတ္တိ ဒဋ္ဌဗ္ဗာ၊ ဟောတိ ပါပိကာ ဒိဋ္ဌိ ပဋိနိဿဇ္ဇေတာ။ပေ။ ဟောတိ အာပတ္တိ ပဋိကာတဗ္ဗာ၊ ဟောတိ ပါပိကာ ဒိဋ္ဌိ ပဋိနိဿဇ္ဇေတာ ။ပေ။ ဟောတိ အာပတ္တိ ဒဋ္ဌဗ္ဗာ၊ ဟောတိ အာပတ္တိ ပဋိကာတဗ္ဗာ၊ ဟောတိ ပါပိကာ ဒိဋ္ဌိ ပဋိနိဿဇ္ဇေတာ. တမေနံ စောဒေတိ သံဃော ဝါ သမ္ဗဟုလာ ဝါ ဧကပုဂ္ဂလော ဝါ – ‘‘အာပတ္တိံ တွံ၊ အာဝုသော၊ အာပန္နော၊ ပဿသေတံ အာပတ္တိံ? ပဋိကရောဟိ တံ အာပတ္တိံ. ပါပိကာ တေ ဒိဋ္ဌိ၊ ပဋိနိဿဇ္ဇေတံ ပါပိကံ ဒိဋ္ဌိ’’န္တိ. သော ဧဝံ ဝဒေတိ – ‘‘နတ္ထိ မေ၊ အာဝုသော၊ အာပတ္တိ၊ ယမဟံ ပဿေယျံ. နတ္ထိ မေ၊ အာဝုသော၊ အာပတ္တိ ယမဟံ ပဋိကရေယျံ. နတ္ထိ မေ၊ အာဝုသော၊ ပါပိကာ ဒိဋ္ဌိ၊ ယမဟံ ပဋိနိဿဇ္ဇေယျ’’န္တိ. တံ သံဃော အဒဿနေ ဝါ အပ္ပဋိကမ္မေ ဝါ အပ္ပဋိနိဿဂ္ဂေ ဝါ ဥက္ခိပတိ – ဓမ္မကမ္မန္တိ.

အဓမ္မကမ္မာဒိကထာ နိဋ္ဌိတာ.