၂၃၈. ပါရိဝါသိကာဒိကထာ

၃၉၃. ပါရိဝါသိကစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ – အကမ္မံ န စ ကရဏီယံ. မူလာယ ပဋိကဿနာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ – အကမ္မံ န စ ကရဏီယံ. မာနတ္တာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ – အကမ္မံ န စ ကရဏီယံ. မာနတ္တစာရိကစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ – အကမ္မံ န စ ကရဏီယံ. အဗ္ဘာနာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ – အကမ္မံ န စ ကရဏီယံ.

၃၉၄. ဧကစ္စဿ၊ ဘိက္ခဝေ၊ သံဃမဇ္ဈေ ပဋိက္ကောသနာ ရုဟတိ၊ ဧကစ္စဿ န ရုဟတိ. ကဿ စ၊ ဘိက္ခဝေ၊ သံဃမဇ္ဈေ ပဋိက္ကောသနာ န ရုဟတိ? ဘိက္ခုနိယာ၊ ဘိက္ခဝေ၊ သံဃမဇ္ဈေ ပဋိက္ကောသနာ န ရုဟတိ. သိက္ခမာနာယ၊ ဘိက္ခဝေ။ပေ။ သာမဏေရဿ၊ ဘိက္ခဝေ။ သာမဏေရိယာ၊ ဘိက္ခဝေ။ သိက္ခာပစ္စက္ခာတကဿ ဘိက္ခဝေ။ အန္တိမဝတ္ထုံ အဇ္ဈာပန္နကဿ၊ ဘိက္ခဝေ ။ ဥမ္မတ္တကဿ၊ ဘိက္ခဝေ။ ခိတ္တစိတ္တဿ၊ ဘိက္ခဝေ။ ဝေဒနာဋ္ဋဿ၊ ဘိက္ခဝေ။ အာပတ္တိယာ အဒဿနေ ဥက္ခိတ္တကဿ၊ ဘိက္ခဝေ။ အာပတ္တိယာ အပ္ပဋိကမ္မေ ဥက္ခိတ္တကဿ၊ ဘိက္ခဝေ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကဿ၊ ဘိက္ခဝေ။ ပဏ္ဍကဿ၊ ဘိက္ခဝေ။ ထေယျသံဝါသကဿ၊ ဘိက္ခဝေ။ တိတ္ထိယပက္ကန္တကဿ၊ ဘိက္ခဝေ ။ တိရစ္ဆာနဂတဿ ဘိက္ခဝေ။ မာတုဃာတကဿ၊ ဘိက္ခဝေ။ ပိတုဃာတကဿ၊ ဘိက္ခဝေ။ အရဟန္တဃာတကဿ၊ ဘိက္ခဝေ။ ဘိက္ခုနိဒူသကဿ၊ ဘိက္ခဝေ။ သံဃဘေဒကဿ၊ ဘိက္ခဝေ။ လောဟိတုပ္ပါဒကဿ၊ ဘိက္ခဝေ။ ဥဘတောဗျဉ္ဇနကဿ၊ ဘိက္ခဝေ။ နာနာသံဝါသကဿ၊ ဘိက္ခဝေ။ နာနာသီမာယ ဌိတဿ၊ ဘိက္ခဝေ။ ဣဒ္ဓိယာ ဝေဟာသေ ဌိတဿ၊ ဘိက္ခဝေ၊ ယဿ သံဃော ကမ္မံ ကရောတိ၊ တဿ စ [တဿ (သျာ.)]၊ ဘိက္ခဝေ၊ သံဃမဇ္ဈေ ပဋိက္ကောသနာ န ရုဟတိ. ဣမေသံ ခေါ၊ ဘိက္ခဝေ၊ သံဃမဇ္ဈေ ပဋိက္ကောသနာ န ရုဟတိ.

ကဿ စ၊ ဘိက္ခဝေ၊ သံဃမဇ္ဈေ ပဋိက္ကောသနာ ရုဟတိ? ဘိက္ခုဿ၊ ဘိက္ခဝေ၊ ပကတတ္တဿ

သမာနသံဝါသကဿ သမာနသီမာယ ဌိတဿ အန္တမသော အာနန္တရိကဿာပိ [အနန္တရိကဿာပိ (သျာ.)] ဘိက္ခုနော ဝိညာပေန္တဿ သံဃမဇ္ဈေ ပဋိက္ကောသနာ ရုဟတိ. ဣမဿ ခေါ၊ ဘိက္ခဝေ၊ သံဃမဇ္ဈေ ပဋိက္ကောသနာ ရုဟတိ.

ပါရိဝါသိကာဒိကထာ နိဋ္ဌိတာ.